កីឡាករចាស់ជាងគេលើលោក បន្តកុងត្រាថ្មី លេងយ៉ាងតិចដល់អាយុ ៥៧ឆ្នាំ

កីឡាករ Kazuyoshi Miura បានចុះហត្ថលេខាបន្តកុងត្រា​នៅក្លិបលីគទី២ ព័រទុយហ្គាល់ Oliveirense មួយរដូវកាលទៀត ដែលមានន័យថារូបលោកនឹងត្រូវលេងរហូតដល់អាយុ ៥៧ឆ្នាំ បង្កើនកំណត់ត្រាចាស់របស់ខ្លួន ក្នុងនាមជាកីឡាករបាល់ទាត់អាជីព ដែលចាស់ជាងគេបំផុតលើពិភពលោក។

កីឡាករសញ្ជាតិជប៉ុនរូបនេះ បានចាប់ផ្តើមអាជីពដំបូងកាលពី ៣៧ ឆ្នាំមុន តាំងពីឆ្នាំ ១៩៨៦ ជាមួយក្លិប Santos នៅប្រទេសប្រេស៊ីល។ ក្រោយចំណាយពេល ៤ឆ្នាំ នៅទ្វីបអាមេរិកខាងត្បូង Miura បានត្រលប់ទៅស្រុកកំណើតវិញ ហើយទទួលបានភាពជោគជ័យដ៏អស្ចារ្យជាមួយក្លិប Verdy Kawasaki ក្នុងឆ្នាំ ១៩៩០។

ខ្សែប្រយុទ្ធរហ្សសនាម King Kazu បានផ្ទេរទៅក្លិប Yokohama កាលពីឆ្នាំ ២០០៥ ដោយបង្ហាញខ្លួនបាន ២៧៨ លើកស៊ុតបញ្ចូលទីបាន ២៧ គ្រាប់។ នៅចន្លោះឆ្នាំ ១៩៩០ ដល់ឆ្នាំ ២០០០ Miura បង្ហាញខ្លួនឲ្យជម្រើសជាតិជប៉ុនបាន ៨៩ ប្រកួតស៊ុតបញ្ចូលទី ៥៥ គ្រាប់។

ទោះវ័យកាន់តែចាស់បែបនេះក្ដី Miura មិនទាន់​មាន​គម្រោង​​បញ្ចប់​អាជីព​របស់ខ្លួននៅឡើយទេ។ លោកធ្លាប់​ប្រាប់ Sport TV ថា៖ “ខ្ញុំ​មាន​បំណង​លេង​រហូត​ដល់​អាយុ ៦០ ឆ្នាំ”៕