ផល សោភ័ណ្ឌ បង្ហាញអារម្មណ៍ ពេលបានជួបរបស់ពិត ចុងសហ្ដហ៍នេះ

ដំរីភ្លុកពិឃាដ ផល សោភ័ណ្ឌ នឹងត្រូវជួបអ្នកប្រដាល់ព័រទុយហ្គាល់ មីហ្គេល ទ្រីនដាឌី (Miguel Trindade) នៅសង្វៀន តេជោសន្តិភាព គុនខ្មែរ វើលឆេមពាន (Techo Santepheap Kun Khmer World Champion) នាថ្ងៃទី១៦ ខែកក្កដា ឆ្នាំ ២០២៣ នៅស្ថានីយទូរទស្សន៍ថោន ហ្វូលអេចឌីធីវី វេលាម៉ោង ៧ យប់។

មីហ្គេល ទ្រីនដាឌី ជាអ្នកប្រដាល់កម្រិត A មួយរូប ដែលធ្លាប់ផ្ដួលអ្នកប្រដាល់ថៃ ប៉ ត ថ (Por Tor Thor Petchrungruang) ឲ្យសន្លប់នៅក្នុងកម្មវិធី Thai Fight នៅប្រទេសអ៊ីតាលី កាលពីថ្ងៃទី ២២ ខែ​ មេសា ឆ្នាំ ២០២៣។ ចំណែក ផល សោភ័ណ្ឌ ក៏មិនធម្មតាដែរ ដោយបានយកឈ្នះកីឡាករថៃ ខាថាវុធ ក្នុងកម្មវិធីប្រដាល់គុនខ្មែរ ជើងឯកគូបូតា បច្ចេកវិទ្យាកសិកម្មថ្មី កាលពីថ្ងៃសុក្រ ទី៧ ខែកក្កដា ឆ្នាំ២០២៣។

មុនការប្រកួតនៅសង្វៀន តេជោសន្តិភាព គុនខ្មែរ វើលឆេមពាន មកដល់ ផល សោភ័ណ្ឌ បាននិយាយថា៖ «សម្រាប់ខ្ញុំមានអារម្មណ៍ថាសប្បាយរីករាយដែលបានជួបរបស់ពិតហើយខ្លាំង ខ្ញុំក៏ដឹងពីសមត្ថភាពគាត់ ហើយគាត់ក៏ដឹងពីសមត្ថភាពខ្ញុំ ចំពោះខ្ញុំក៏សប្បាយចិត្តដែរ បានជួបអ្នកខ្លាំង​ ទោះបីជាចាញ់ឬឈ្នះក៏សប្បាយចិត្តដែរ»។

សម្រាប់កីឡាករទាំង ២ សុទ្ធតែជាជើងខ្លាំងដូចគ្នា ដូច្នេះបងប្អូនដែលជាអ្នកគាំទ្រប្រដាល់គុនខ្មែរប្រាកដជាទន្ទឹងរង់ចាំការប្រកួតដ៏កក្រើកមួយនេះ។ ផល សោភ័ណ្ឌ បន្ថែមថា​​៖ «សម្រាប់កីឡាប្រដាល់តែងតែមានចាញ់និងឈ្នះ សំខាន់ចាញ់ឬឈ្នះគឺយើងប្រកួតឲ្យ​អស់ពីសមត្ថភាពដែលយើងមាន ហើយត្រូវប្រកួតឲ្យល្អមើល»៕

អត្ថបទ៖ ផា រតនា