គូសងសឹក កម្ពុជា-ថៃ ដែលអ្នកគាំទ្ររង់ចាំអស់រយៈពេល ១០​ ឆ្នាំ

អ្នកប្រដាល់គុនខ្មែរ រឿង សោភ័ណ្ឌ ត្រូវជួបតទល់អ្នកប្រដាល់ថៃ ឆាងភឿក ចេស្ដា ក្រោយរង់ចាំអស់រយៈពេល ១០ឆ្នាំ នៅសង្វៀន តេជោសន្តិភាព គុនខ្មែរ វើលឆេមពាន (Techo Santepheap Kun Khmer World Champion) នាថ្ងៃទី១៦ ខែកក្កដា ឆ្នាំ ២០២៣ នៅស្ថានីយទូរទស្សន៍ថោន ហ្វូលអេចឌីធីវី វេលាម៉ោង ៧ យប់។

កីឡាករទាំង ២​ ធ្លាប់ជួបគ្នាកាលពី ១០ ឆ្នាំមុន ដោយកីឡាករ រឿង សោភ័ណ្ឌ ចាញ់ដោយសាររងរបួសដៃ បន្ទាប់ពីការកាច់ផ្ដួលពីកីឡករថៃ ឆាងភឿក ចេស្ដា។ នេះជាជំនួបសងសឹកដ៏គួរឲ្យចាប់អារម្មណ៍ ដែលអ្នកគាំទ្រគុនខ្មែរទន្ទឹងរង់ចាំអស់រយៈពេលជាយូរ។ 

មុនប៉ះចេស្ដានៅពេលនេះ រឿង សោភ័ណ្ឌ ឡើងដៃខ្លាំងមែនទែន ដោយឈ្នះអ្នកប្រដាល់អ៊ីតាលី កាលពីថ្ងៃទី២ ខែកក្កដា បន្ទាប់ពីឈ្នះមេដាយមាសស៊ីហ្គេម ជូនជាតិកាលពីខែឧសភា។

ចំណែក ឆាងភឿក ចេស្ដា ក៏មិនធម្មតាដែរ។ កីឡាករថៃរូបនេះ ជាអ្នកប្រដាល់​ធន់ខ្លាំង និងមានបទពិសោធប្រកួតនៅទឹកដីកម្ពុជាជាច្រើនលើក ដោយប៉ះជើងខ្លាំងជាច្រើន ដូចជា កែវ រំចង់, ឡៅ ចន្ទា្រ និង ពេជ្រ សីហា ជាដើម។

មុនការប្រកួតមកដល់ កីឡាករដៃភ្លើងជើងរន្ទះ រឿង សោភ័ណ្ឌ បាន​និយាយថា៖ «ខ្ញុំនឹងបញ្ចេញឲ្យអស់ពីសមត្ថភាព ហើយសូមឲ្យកីឡាករថៃបញ្ចេញឲ្យអស់ពីសមត្ថភាពដូចគ្នា បើមានឱកាសផ្ដួលគូប្រកួត ខ្ញុំនឹងផ្ដួលតែបើអត់មានឱកាសខ្ញុំវ៉ៃតាមធម្មតា»៕

អត្ថបទ៖ ផា រតនា