ខេត្តបាត់ដំបងឈរលេខ១ក្នុងការប្រកួតទាញព្រ័ត្រជើងឯកថ្នាក់ជាតិ

ខេត្តបាត់ដំបងដណ្តើមបានមេដាយមាសច្រើនជាងគេក្នុងការប្រកួតកីឡាទាញព្រ័ត្រជ្រើសរើសជើងឯកថ្នាក់ជាតិលើកទី ៧ ប្រចាំឆ្នាំ ២០២៣ ចាប់ពីថ្ងៃទី១២ ដល់​ទី១៥ ខែកក្កដា ឆ្នាំ២០២៣ នៅរាជធានីភ្នំពេញ។

សម្រាប់សមាគមកីឡាទាញព្រ័ត្រខេត្តបាត់ដំបងដណ្ដើមបានមេដាយមាស២ និងមេដាយបា្រក់១ ក្នុងការប្រកួតកីឡាទាញព្រ័ត្រជ្រើសរើសជើងឯកថ្នាក់ជាតិលើកទី ៧ ។ ក្នុងនោះមេដាយមាស ២ លើវិញ្ញាសា ៨នាក់ទល់៨នាក់ ផ្នែកនារី (៥០០គីឡូក្រាម) និងវិញ្ញាសា ៨នាក់ទល់៨នាក់ផ្នែកបុរស (៦០០គីឡូក្រាម) និងមេដាយបា្រក់ ១លើវិញ្ញាសា ៤នាក់ទល់៤នាក់ ផ្នែកនារី (២៥០គីឡូក្រាម)។

ការ​ប្រកួត​កីឡា​ទាញ​ព្រ័ត្រ​ជើង​ឯក​ថ្នាក់​ជាតិ ឆ្នាំ​២០២៣​នេះ ​មាន​៤​វិញ្ញាសា រួមមាន៖ វិញ្ញាសា ៨នាក់ ទល់ ៨នាក់ ផ្នែកបុរស ទម្ងន់ ៦០០គីឡូក្រោម, វិញ្ញាសា ៨នាក់ ទល់៨នាក់ ផ្នែកនារី ទម្ងន់ ៥០០គីឡូក្រោម, វិញ្ញាសា៤នាក់ ទល់ ៤នាក់ ផ្នែកបុរស ទម្ងន់ ៣០០គីឡូក្រោម និង​ វិញ្ញាសា ៤នាក់ ទល់ ៤នាក់ ផ្នែកនារី ទម្ងន់ ២៥០គីឡូក្រោម។

ការ​ប្រកួត​ឆ្នាំ​នេះ​ មានសមាគម និងក្លិបចូលរួមចំនួន ១២ រួមមានសមាគមកីឡាទាញព្រ័ត្រ ខេត្តកណ្តាល សមាគមកីឡាទាញព្រ័ត្រ ខេត្តកំពត សមាគមកីឡាទាញព្រ័ត្រ ក្រសួងមហាផ្ទៃ សមាគមកីឡាទាញព្រ័ត្រ ខេត្តបាត់ដំបង សមាគមកីឡាទាញព្រ័ត្រ ខេត្តកំពង់ចាម សមាគមកីឡាទាញព្រ័ត្រ ខេត្តស្វាយរៀង សមាគមកីឡាទាញព្រ័ត្រ រាជធានីភ្នំពេញ សមាគមកីឡាទាញព្រ័ត្រ ខេត្តកំពង់ឆ្នាំង សមាគមកីឡាទាញព្រ័ត្រ ខេត្តក្រចេះ សមាគមកីឡាទាញព្រ័ត្រ ខេត្តត្បួងឃ្មុំ សមាគមកីឡាទាញព្រ័ត្រមជ្ឈមណ្ឌល ខ.ភ.ម និង សមាគមកីឡាទាញព្រ័ត្រ បញ្ជាការដ្ឋានកងទ័ពជើងទឹក។

អត្ថបទ៖ ផា រតនា