កីឡា

នូវែលសេឡង់ ជួបហេតុការណ៍បាញ់ប្រហារចំថ្ងៃប្រកួត World Cup នារី

បានផុស

១ year មុន

នៅ

ថ្ងៃព្រហស្បតិ៍ ២០ កក្កដា ២០២៣

ដោយ

យ៉ាងហោចណាស់មនុស្ស២នាក់បានស្លាប់នៅក្នុងការបាញ់ប្រហារដ៏សាហាវមួយនៅទីក្រុង Auckland ប្រទេសនូវែលសេឡង់ ចំថ្ងៃនៃព្រឹត្តិការណ៍បាល់ទាត់នារីពិភពលោក ចាប់ផ្ដើមបើកការប្រកួត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ូលិសបានបញ្ជាក់ថា ខ្មាន់កាំភ្លើងក៏បានស្លាប់ផងដែរ ជាមួយនឹងអ្នករងរបួសចំនួន ៦នាក់ដែលឧប្បត្តិហេតុនេះបានកើតឡើងនៅផ្លូវ Queen Street ជិតសណ្ឋាគារមួយដែលក្រុមបាល់ទាត់នារីន័រវេស ស្នាក់នៅ។

សហព័ន្ធកីឡាបាល់ទាត់អន្តរជាតិ (FIFA) បានចេញសេចក្តីថ្លែងការណ៍មួយថា ប្រធានរបស់ខ្លួនគឺលោក Gianni Infantino និងអគ្គលេខាធិការ Fatma Samoura មានទំនាក់ទំនងជាប្រចាំជាមួយអាជ្ញាធរមូលដ្ឋាន និងក្រុមដែលចូលរួមនៅក្នុងតំបន់នោះ។

ក្នុងសេចក្តីថ្លែងការណ៍មួយទៀតបានលើកឡើងថា ស្ថាប័នគ្រប់គ្រងបាល់ទាត់ពិភពលោកត្រូវបានជូនដំណឹងពីឧបទ្ទវហេតុនេះគឺដាច់ដោយឡែកពោលគឺមិនទាក់ទងទៅនឹងប្រតិបត្តិការបាល់ទាត់ ហើយការប្រកួតបើកឆាកនឹងដំណើរការតាមការគ្រោងទុក។

ប្រទេសនូវែលសេឡង់ នឹងចាប់ផ្ដើមបើកឆាកការប្រកួតសន្សំពិន្ទុក្នុងពូលជាមួយន័រវេស ខណៈប្រធានក្រុមន័រវេស Maren Mjelde ជាខ្សែការពាររបស់ក្លិប Chelsea បាននិយាយថា គ្រប់គ្នាហាក់ដូចជា “ស្ងប់ស្ងាត់”។

នាងបាននិយាយថា ៖«យើងមានអារម្មណ៍ថាមានសុវត្ថិភាព»។

គួររម្លឹកថា កាលពីឆ្នាំ២០១៩ ការវាយប្រហារភេរវករនៅក្នុងវិហារអ៊ីស្លាម ក្នុងទីក្រុង Christchurch បានសម្លាប់មនុស្ស ៥០នាក់ ដោយពេលនោះនាយករដ្ឋមន្ត្រី Jacinda Ardern បានពណ៌នាថា វាជា “ថ្ងៃដ៏ខ្មៅងងឹតបំផុតក្នុងប្រវត្តិសាស្ត្ររបស់ប្រទេសនូវែលសេឡង់”។

អ្នកចាំទី Atta Elayyan របស់ក្រុមបាល់ទាត់ហ្វូតសាល Zealand ក៏ត្រូវបានសម្លាប់នៅក្នុងការសម្លាប់រង្គាលកាលពីបួនឆ្នាំមុនផងដែរ៕