កីឡា

កីឡាករវ័យក្មេង៦រូបគួរឲ្យចាប់អារម្មណ៍ក្នុងលីគកំពូលកម្ពុជារដូវកាលថ្មី

បានផុស

២ years មុន

នៅ

ថ្ងៃអង្គារ ១ សីហា ២០២៣

ដោយ

បច្ចុប្បន្ននេះ ក្លិបបាល់ទាត់នៅក្របខណ្ឌលីគកំពូលកម្ពុជាមានយុវជនជាច្រើនដែលមានទេពកោសល្យ និងសមត្ថភាពគួរឲ្យចាប់អារម្មណ៍ ដូចជា លឹម ពិសុទ្ធ, មិន រតនៈ និង ស៊ិន សុវណ្ណមករ៉ា ជាដើម ប៉ុន្តែនៅទីនេះសូមបង្ហាញកីឡាករវ័យក្មេង៦រូបពីក្លិបផ្សេងគ្នា៦ដែលអាចនឹងលេចធ្លោក្នុងលីគកំពូលកម្ពុជារដូវកាលថ្មី ២០២៣-២៤។

លឹម វិសាល របស់ភ្នំពេញក្រោន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករវ័យក្មេង លឹម វិសាល អាចនឹងត្រូវបានអ្នកគាំទ្រចាប់អារម្មណ៍ ប្រសិនបើរូបគេអាចទទួលបានឱកាសបង្ហាញខ្លួនឲ្យភ្នំពេញក្រោនសម្រាប់ខេមបូឌានព្រីមៀរលីករដូវកាលថ្មីនេះ។ ប្អូនប្រុសបង្កើតរបស់ លឹម ពិសុទ្ធ បានធ្វើឲ្យមានការចាប់អារម្មណ៍ខ្លាំងសម្រាប់ការប្រកួតមិត្តភាពរបស់ភ្នំពេញក្រោននៅប្រទេសថៃកាលពីពេលថ្មីៗនេះ។ យ៉ាងណា កីឡាករអាយុទើបឈានចូល១៧ឆ្នាំមិនសូវមានបទពិសោធច្រើនទេ សូម្បីតែក្នុងឈុតវជនជម្រើសជាតិ។

ឡេង ណូរ៉ា របស់វិសាខា

ខ្សែបម្រើការពារអាយុ១៨ឆ្នាំរបស់ក្លិបបាល់ទាត់វិសាខានឹងក្លាយជាកីឡាករវ័យក្មេងគួរឲ្យចាប់អារម្មណ៍ម្នាក់ក្នុងព្រឹត្តិការណ៍ខេមបូឌានព្រីមៀរលីគរដូវកាលថ្មី២០២៣-២៤។ កីឡាករកម្ពស់១.៦៦ម៉ែត្ររូបនេះជាអតីតយុវជនរបស់វិសាខាចន្លោះឆ្នាំ២០១៨-២១ មុនពេលទៅលេងនៅក្រុមខេត្តព្រៃវែង និងវិលត្រឡប់មកក្រុមធំវិសាខាចាប់ពីឆ្នាំ២០២២។ រូបគេបានជាប់ជម្រើសជាតិកម្ពុជាទាំងឈុតយុវជនអាយុក្រោម២៣ឆ្នាំ និងឈុតធំតាំងពីឆ្នាំ២០២១។

សុវណ្ណ ដូណា របស់អង្គរថាយហ្គឺរ

ខ្សែប្រយុទ្ធរបស់អង្គរថាយហ្គឺរបានធ្វើឲ្យមានការចាប់អារម្មណ៍ជាបន្តទាំងការបង្ហាញខ្លួនឲ្យក្លិប និងជម្រើសជាតិកម្ពុជាអាយុក្រោម២២ឆ្នាំ។ រូបគេជាតួសំខាន់ក្នុងក្លិបអង្គរថាយហ្គឺរដែលបានបង្ហាញខ្លួនទាំងក្នុងលីគ និងពានរង្វាន់សម្តេចតេជោ។ ជាមួយគ្នានេះ រូបគេបានជាប់ជម្រើសជាតិកម្ពុជាអាយុក្រោម១៨ឆ្នាំ និង២២ឆ្នាំ។ កីឡាករអាយុ១៩ឆ្នាំរូបនេះរកបានគ្រាប់បាល់ឲ្យ U19 កម្ពុជាក្នុងព្រឹត្តិការណ៍ AFF U19 Championship ឆ្នាំ២០២២ នៅប្រទេសឥណ្ឌូណេស៊ី។

លឹម អារុណ រ៉េយមិន របស់ ណាហ្គាវើលដ៍

យុវជនកូនកាត់នូវែលសេឡង់-កម្ពុជាកំពុងត្រូវបានអ្នកគាំទ្រចាប់អារម្មណ៍ខ្លាំងនៅពេលរូបគេបានបង្ហាញខ្លួនឲ្យក្លិបណាហ្គាវើលដ៍ក្នុងពានរង្វាន់បើករដូវកាល ខេមបូឌានលីគខាប់ ឆ្នាំ២០២៣ កាលពីពេលថ្មីៗ។ កីឡាករអាយុ២០ឆ្នាំធ្លាប់ជាយុវជននៅបឹងកេតកាលពីឆ្នាំ២០២០ មុនពេលគិរីវង់សុខសែនជ័យខ្ចីជើងហើយបានលេងក្នុងលីគកំពូលកម្ពុជារដូវកាលមុន។ បន្ទាប់មករូបគេបានវិលត្រឡប់មកបឹងកេតវិញមុនពេលផ្ទេរទៅណាហ្គាវើលដ៍ជាផ្លូវការនៅឆ្នាំ២០២៣។ ជាមួយគ្នានេះ រូបគេបានជាប់ជម្រើសជាតិកម្ពុជាអាយុក្រោម២២ឆ្នាំ និងបានបង្ហាញខ្លួនក្នុងកីឡាស៊ីហ្គេមដែរ។

ជូ ស៊ិនទិ របស់ព្រះខ័នរាជស្វាយរៀង

ស្ថិតក្នុងវ័យទើប២០ឆ្នាំ សមាជិកក្លិបបាល់ទាត់ព្រះខ័នរាជស្វាយរៀងបានជាប់ជម្រើសជាតិកម្ពុជាក្នុងឈុតធំតាំងពីឆ្នាំ២០២២ និងបានបង្ហាញខ្លួនក្នុងព្រឹត្តិការណ៍ AFC Asian Cup ហើយក៏បានជាប់ក្នុងឈុតស៊ីហ្គេមផងដែរ។ រូបគេមានប្រភពចេញពីខេត្តបាត់ដំបង និងចូលហ្វឹកហាត់នៅសាលាបាល់ទាត់ជាតិបាទី មុនពេលចូលព្រះខ័នរាជស្វាយរៀងតាំងពីឆ្នាំ២០២១។

ញាណ សុស៊ីដាន របស់ក្រសួងការពារជាតិ

សុស៊ីដាន ជាសមាជិកដ៏សំខាន់ម្នាក់របស់ក្លិបក្រសួងការពារជាតិដែលមានបទពិសោធច្រើនទាំងក្លិប និងជម្រើសជាតិ។ រូបគេបានបង្ហាញខ្លួនជាញឹកញាប់ឲ្យក្រុមទ័ពក្នុងពានលីគកំពូលកម្ពុជា និងពានសម្តេចតេជោពីរឆ្នាំចុងក្រោយ។ ជាមួយគ្នានេះ កីឡាករអាយុ២០ឆ្នាំត្រូវបានកោះហៅចូលជម្រើសជាតិទាំងឈុតយុវជនអាយុក្រោម២២ឆ្នាំ និងឈុតធំ។

ខេមបូឌានព្រីមៀរលីគរដូវកាល ២០២៣-២៤ នឹងចាប់ផ្តើមនៅថ្ងៃសៅរ៍ ទី៥ ខែសីហា ខាងមុខនេះដែលមានក្លិបអាជីពចំនួន១០ចូលរួមប្រកួតប្រជែងដែលច្រើនជាងកាលពីឆ្នាំ២០២២ ដែលមានត្រឹមតែ៨ក្លិប៕

អត្ថបទ៖ វីរបុត្រ

Related Topics:ខេមបូឌានលីគ (Cambodian Premier League)