កីឡា

ក្រុមបាល់ទះកូរ៉េខាងត្បូងជាម្ចាស់មេដាយមាស៣សម័យនឹងប៉ះកម្ពុជាក្នុងកីឡាទ្វីបអាស៊ី

បានផុស

២ years មុន

នៅ

ថ្ងៃពុធ ២ សីហា ២០២៣

ដោយ

chean virakbot

ក្រុមបាល់ទះជម្រើសជាតិកម្ពុជាឈានជើងចូលព្រឹត្តិការណ៍កីឡាទ្វីបអាស៊ី Asian Games វិញហើយ បន្ទាប់ពីបានបាត់មុខតាំងពីឆ្នាំ១៩៧០។

ការវិលត្រឡប់ចូលកីឡាទ្វីបអាស៊ីលើកដំបូងក្នុងរយៈពេលជិត៥០ឆ្នាំនេះ ក្រុមកម្ពុជា ស្ថិតនៅក្នុងពូល C ជាមួយក្រុមខ្លាំងកូរ៉េខាងត្បូង និងឥណ្ឌា ក្នុងកីឡាទ្វីបអាស៊ី លើកទី១៩ ឆ្នាំ២០២២ (លើកមកឆ្នាំ២០២៣) នៅទីក្រុង Hangzhou ប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាល់ទះកូរ៉េខាងត្បូងត្រូវបានចាត់ទុកជាក្រុមខ្លាំងមួយប្រចាំអាស៊ី ដែលមានបទពិសោធ និងប្រវត្តិប្រកួតលើឆាកអន្តរជាតិច្រើន ទាំងក្នុងការប្រកួតបាល់ទះជើងឯកអាស៊ី កីឡាទ្វីបអាស៊ី ជើងឯកពិភពលោក ជើងឯក World Grand Prix ជើងឯក Nations Leaguee និងក្នុងព្រឹត្តិការណ៍អូឡាំពិកជាដើម។

បើនិយាយតែក្នុងកីឡាទ្វីបអាស៊ី ក្រុមបាល់ទះកូរ៉េខាងត្បូងធ្លាប់បានចូលរួមប្រកួត១៥ដងហើយក្នុងចំណោមព្រឹត្តិការណ៍កីឡាអាស៊ី១៨កន្លងមក។ សម្រាប់ការចូលរួមទាំង១៥លើកនេះ កូរ៉េខាងត្បូងធ្លាប់បានឈ្នះមេដាយមាស៣លើក គឺឆ្នាំ១៩៧៨ ២០០២ និង២០០៦, ឈ្នះមេដាយប្រាក់៣ដងគឺឆ្នាំ១៩៧៤ ១៩៩០ និង១៩៩៨ ព្រមទាំងធ្លាប់ឈ្នះមេដាយសំរិទ្ធ៤ដងគឺឆ្នាំ១៩៨២ ១៩៩៤ ២០១០ និង២០១៨។

រយៈពេលជាង៣០ឆ្នាំចុងក្រោយគិតចាប់តាំងពីកីឡាទ្វីបអាស៊ី ឆ្នាំ១៩៩០ នៅប្រទេសចិនមក ក្រុមកូរ៉េខាងត្បូងតែងតែបានឡើងដល់វគ្គពាក់កណ្តាលផ្តាច់ព្រ័ត្ររហូត។ សម្រាប់កីឡាទ្វីបអាស៊ី លើកទី១៩ ឆ្នាំ២០២៣ នៅប្រទេសចិននេះ ក្រុមកូរ៉េខាងត្បូងនឹងមិនបាកក្នុងឡើងទៅវគ្គពាក់កណ្តាលផ្តាច់ព្រ័ត្រឡើយនៅពេលជួបឥណ្ឌា និងកម្ពុជា នៅក្នុងពូល C។

និយាយពីក្រុមបាល់ទះជម្រើសជាតិកម្ពុជាធ្លាប់ខ្លាំងនៅក្នុងកីឡាទ្វីបអាស៊ី កាលមុនសម័យសង្គ្រាម ដោយធ្លាប់ចូលរួមប្រកួតលើកដំបូងនៅឆ្នាំ១៩៦២ នៅប្រទេសឥណ្ឌូណេស៊ីទទួលបានចំណាត់ថ្នាក់លេខ៧ និងឆ្នាំ១៩៧០នៅប្រទេសថៃទទួលបានចំណាត់ថ្នាក់លេខ៤។

ចាប់តាំងពីពេលនោះ ក្រុមបាល់ទះកម្ពុជាមិនធ្លាប់បានចូលរួមប្រកួតទេទើបតែឆ្នាំ២០២៣នេះបានចូលរួមប្រកួតសាជាថ្មី បន្ទាប់ពីធ្វើបានល្អក្នុងកីឡាស៊ីហ្គេមពីរលើកចុងក្រោយ។

ក្រុមកម្ពុជាក្រោមការដឹកនាំរបស់គ្រូបង្វឹកជនជាតិចិន លោក Li Jun បាននាំក្រុមកម្ពុជាឡើងវគ្គពាក់កណ្តាលផ្តាច់ព្រ័ត្រ កីឡាស៊ីហ្គេម ឆ្នាំ២០២២ ទទួលបានមេដាយសំរិទ្ធ និងឡើងវគ្គផ្តាច់ព្រ័ត្រស៊ីហ្គេម ឆ្នាំ២០២៣ ទទួលបានមេដាយប្រាក់។

នេះជាការសាកល្បងសមត្ថភាពដ៏ធំបំផុតសម្រាប់ក្រុមបាល់ទះជម្រើសជាតិកម្ពុជាក្នុងរយៈពេលជិត៥០ឆ្នាំចុងក្រោយ ជាពិសេសក្រុមខ្លាំងក្នុងពូលគឺជាការលំបាកបំផុតសម្រាប់ក្រុមកម្ពុជា។ ទោះបីជាយ៉ាងណា បើមិនឆ្លងកាត់ក្រុមខ្លាំងៗទេ នោះក៏មិនដឹងច្បាស់ពីសមត្ថភាពនៅកម្រិតណាស និងទទួលបានបទពិសោធយ៉ាងណាដែរ៕