កីឡា

តើវិសាខាអាចយកបាន៣ពិន្ទុពីណាហ្គាវើលដ៍បានទេថ្ងៃសៅរ៍នេះ?

បានផុស

១ year មុន

នៅ

ថ្ងៃសុក្រ ១១ សីហា ២០២៣

ដោយ

ក្លិបបាល់ទាត់ណាហ្គាវើលដ៍ត្រូវបើកទ្វារកីឡដ្ឋានកំពង់ស្ពឺ ទទួលក្លិបបាល់ទាត់ វិសខា សម្រាប់សបា្ដហ៍ទី២ក្នុងពានរង្វាន់ខេមបូឌានព្រីមៀរលីគ វេលាម៉ោង៦ល្ងាច ថ្ងៃសៅរ៍ទី ១២ ខែសីហា ឆ្នាំ ២០២៣។

នេះជាជំនួបធំប្រចាំសប្តាហ៍មួយទៀត បន្ទាប់ពីព្រះខ័នរាជស្វាយរៀងទទួលភ្នំពេញក្រោនវេលាម៉ោង៦ល្ងាចថ្ងៃសុក្រនេះ។ បើកឆាកគូទាំងពីររកបាន៣ពិន្ទុដូចគ្នា។ វិសាខារក្សាសំណាញ់ទីរបស់ខ្លួនបានយ៉ាងស្អាតដោយមិនឲ្យដៃគូស៊ុតចូលឡើយ។ ផ្ទុយទៅវិញ ណាហ្គាវើលដ៍ ថ្វីបើទទួលបានជ័យជម្នះ ប៉ុន្តែត្រូវបានក្រុមខេត្តព្រៃវែងស៊ុតចូល៤គ្រាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅដើមឆ្នាំ២០២៣ ណាហ្គាវើលដ៍ ក្រោមការដឹកនាំដោយគ្រូបង្វឹកវ័យក្មេង ឃីម បូរី ទើបតែបានឈ្នះពានរង្វាន់ត្រៀមរដូវកាលមួយ និងទទួលបានចំណាត់ថ្នាក់លេខ២ក្នុងពានរង្វាន់ ខេមបូឌានលីគខាប់ បន្ទាប់ពីចាញ់ ភ្នំពេញក្រោននៅវគ្គផ្តាច់ព្រ័ត្រ។

ខ្សែប្រយុទ្ធប្រេស៊ីល២រូបរបស់ណាហ្គាវើលដ៍គឺកីឡាករ Marques Marcio និង Santos Cristian កំពុងក្លាយជាដៃគូប្រយុទ្ធដ៏គ្រោះថ្នាក់។ គ្រាប់បាល់៥គ្រាប់លើក្រុមខេត្តព្រៃវែងកាលពីសប្តាហ៍ទី១ Marcio ស៊ុតបាន៣គ្រាប់ និងជាអ្នកធ្វើបានហែតទ្រីកមុនគេក្នុងលីគរដូវកាលថ្មី ហើយ Cristian ក៏រកបាន១គ្រាប់ដែរ។

វិសាខាត្រូវដើរតួនាទីភ្ញៀងល្អបង្កការភ័យខ្លាចដល់ម្ចាស់ផ្ទះណាហ្គាវើលដ៍។ ពួកគេនឹងអវត្តមានខ្សែការពារ ឆេង ម៉េង ដោយសារជាប់ពិន័យកាតក្រហម ប៉ុន្តែខ្សែការពារ អ៊ុក សុវណ្ណ ដែលជាប់ជាកីឡាករល្អប្រចាំការប្រកួតនឹងជាតួសំខាន់ក្នុងការរារាំងខ្សែបម្រើប្រយុទ្ធលេចធ្លោ Marcio ដែលជាតួសំខាន់របស់ណាហ្គាវើលដ៍។

កីឡាករទីម័រខាងកើត Mouzinho ទទួលបានការចាប់អារម្មណ៍ខ្លាំងជាងគេ និងជាតួក្រឡុករបស់វិសាខានៅតំបន់ប្រយុទ្ធ។ ចំណែកខ្សែប្រយុទ្ធកម្ពស់ខ្ពស់សញ្ជាតិប្រេស៊ីល Jonata សមាជិកថ្មីរបស់វិសាខានៅមិនទាន់បង្ហាញអ្វីគួរឲ្យចាប់អារម្មណ៍ខ្លាំងទេ។ រូបគេបង្ហាញខ្លួនបាន២ប្រកួតឲ្យវិសាខាគឺរកបាន១គ្រាប់ ដែលជាការស៊ុតប៉េណាល់ទីលើគិរីវង់សុខសែនជ័យ។

ប្រវត្តិជួបគ្នា៩លើកក្នុងខេមបូឌានព្រីមៀរលីគ ចាប់តាំងពីឆ្នាំ២០១៩ វិសាខា ឈ្នះ៤លើក ណាហ្គាវើល៍ឈ្នះ១លើក និងស្មើគ្នា៤លើក។

យ៉ាងណាជួបគ្នា២លើកចុងក្រោយវគ្គពាក់កណ្តាលផ្តាច់ព្រ័ត្រ ពានរង្វាន់ ខេមបូឌានលីគខាប់ឆ្នាំ២០២៣ គឺណាហ្គាវើលដ៍ឈ្នះ១-០ នៅក្នុងដីរបស់ខ្លួន និងស្មើគ្នា១-១នៅទឹកដីវិសាខា៕

អត្ថបទ៖ ផា រតនា