កីឡា

គ្រូព្រះខ័នរាជស្វាយរៀងសរសើរណាហ្គាវើលដ៍ចំណុចនេះ មុនប៉ះគ្នាថ្ងៃអាទិត្យ

បានផុស

១០ ខែ មុន

នៅ

ថ្ងៃសុក្រ ១៨ សីហា ២០២៣

ដោយ

ក្លិបបាល់ទាត់ព្រះខ័នរាជស្វាយរៀងនឹងបើកទ្វារកីឡដ្ឋានខេត្តស្វាយរៀងទទួលក្រុមណាហ្គាវើលដ៍ វេលាម៉ោង៦ល្ងាច ថ្ងៃអាទិត្យ ទី២០ ខែសីហា ក្នុងសប្តាហ៍ទី៣នៃខេមបូឌានព្រីមៀរលីគ រដូវកាល២០២៣-២៣។

ឆ្លងកាត់២ប្រកួតក្នុងការប្រកួតខេមបូឌានព្រីមៀរលីគ ព្រះខ័នរាជស្វាយរៀងទទួលបានជ័យជម្នះទាំងពីរលើកគឺឈ្នះក្រសួងការពារជាតិដោយលទ្ធផល ០-២ នៅក្រៅដីសម្រាប់សប្តាហ៍ទី១ និងឈ្នះភ្នំពេញក្រោន ដោយលទ្ធផល ២-១ នៅផ្ទះរបស់ខ្លួនក្នុងសប្តាហ៍ទី២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះណាហ្គាវើលដ៍ ទទួលបានជ័យជម្នះនៅសប្តាហ៍ទី១ និងចាញ់សប្តាហ៍ទី២ ក្នុងនោះបានឈ្នះដោយលទ្ធផល ៤-៥ លើម្ចាស់ផ្ទះខេត្តព្រៃវែង ប៉ុន្តែចាញ់ក្នុងផ្ទះរបស់ខ្លួនដោយលទ្ធផល ១-៤ ក្រោមថ្វីជើងរបស់ក្រុមភ្ញៀវវិសាខា។ ២ប្រកួតដំបូង ណាហ្គាវើលដ៍របូតគ្រាប់៨គ្រាប់។

សម្រាប់ជំនួបថ្ងៃអាទិត្យនេះគឺជាការប្រកួតក្នុងដីលើកទី២របស់ព្រះខ័នរាជស្វាយរៀង និងជាការប្រកួតក្រៅដីលើកទី២របស់ណាហ្គាវើលដ៍។ ជុំវិញការប្រកួតលោក Pep Muñoz គ្រូបង្វឹកព្រះខ័នរាជស្វាយរៀងបាននិយាយថា ក្រុមរបស់លោកបានត្រៀមខ្លួនពោរពេញដោយទំនុកចិត្តសម្រាប់ការជួបណាហ្គាវើលដ៍ដែលជាក្រុមលេងទម្រង់ការពារ និងវាយបកដ៏គ្រោះថ្នាក់។

លោកបានប្រាប់សារព័ត៌មាន«កម្ពុជាថ្មី»ថា ៖«យើងបានត្រៀមខ្លួនសម្រាប់ការប្រកួតជាមួយណាហ្គាវើលដ៍ ប្រកបដោយទំនុកចិត្តពីជ័យជម្នះដែលយើងទទួលបាន២លើកកន្លងមក។ យើងខ្ញុំពិតជាដឹងពីភាពខ្លាំងរបស់ណាហ្គាវើលដ៍»។

«គ្មានអ្វីត្រូវលាក់បាំងទេ! ណាហ្គាវើលដ៍ជាក្រុមត្រៀមខ្លួនបានយ៉ាងល្អ ជាក្រុមមានការប្រកួតប្រជែងខ្ពស់ ជាពិសេសកីឡាករល្អៗដែលពូកែលេងទម្រង់វាយបក។ យុទ្ធសាស្ត្រទាំងនេះជាអ្វីដែលណាហ្គាវើលដ៍តែងតែទទួលបានលទ្ធផលល្អ»។ លោក Pep បានលើកឡើង។

លោកបានបន្ថែមថា ៖«យើងត្រូវតែលេងឲ្យបានល្អនៅថ្ងៃអាទិត្យនេះដើម្បីទទួលបានជ័យជម្នះសម្រាប់ការប្រកួតនេះ»។

ជួបគ្នា១៣លើកគិតចាប់តាំងពីឆ្នាំ២០១៧មក ព្រះខ័នរាជស្វាយរៀងឈ្នះ៧លើក ណាហ្គាវើលដ៍ឈ្នះ៣លើក និងស្មើ៣ លើក៕