កីឡា

គ្រូគិរីវង់ថា មិនគួររិះគន់អាជ្ញាកណ្ដាលតាមបណ្ដាញសង្គមឬជាសាធារណៈ

បានផុស

១ year មុន

នៅ

ថ្ងៃអង្គារ ២២ សីហា ២០២៣

ដោយ

លោក សាប៊ូន វិនតា គ្រូបង្គោលក្លិប គិរីវង់សុខសែនជ័យ បានចាត់ទុកការរិះគន់លើអាជ្ញាកណ្តាលតាមរយៈបណ្តាញទំនាក់ទំនងសង្គម និងជាសាធារណៈគឺប្រការគួរជៀសវាង ប៉ុន្តែត្រូវរិះគន់តវ៉ា អំឡុងពេលប្រក្រួតនៅលើទីលាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រូបង្វឹកវ័យក្មេង សាប៊ូន វិនតា បានលើកឡើងថា ៖«ក្នុងអំឡុងពេលការប្រកួត ខ្ញុំនិយាយតវ៉ាអំពីកំហុសមួយចំនួនកើតឡើងប្រាប់អាជ្ញាកណ្តាល ប៉ុន្តែក្រោយការប្រកួត ខ្ញុំគោរពនូវអ្វីដែលក្រុមអាជ្ញាកណ្ដាលបានខិតខំធ្វើសម្រាប់លីគបាល់ទាត់កម្ពុជាយើង។ នេះគឺជាផ្នែកមួយនៃបាល់ទាត់ ប៉ុន្តែខ្ញុំមិនដែលត្អួញត្អែរ ឬតវ៉ាពាក់ព័ន្ធនឹងការកាត់ក្តីរបស់អាជ្ញាកណ្ដាលជាសាធារណៈ ឬនៅលើបណ្តាញសង្គមទេ»។

មួយរយៈពេលចុងក្រោយតាមបណ្តាញទំនាក់ទំនងសង្គមត្រូវបានមើលឃើញពីបុគ្គលមួយចំនួនបានលើកឡើងពីកង្វះខាតរបស់អាជ្ញាកណ្តាលដែលបានកាត់សេចក្តីក្នុងការប្រកួតលីគបាល់ទាត់កំពូលកម្ពុជា។ ក្នុងនោះក៏មានគ្រូបង្វឹក និងកីឡាករបាល់ទាត់ផងដែរដែលបានលើកឡើងជុំវិញអាជ្ញាកណ្តាល។

អាជ្ញាកណ្តាលក៏មានភ្នែកពីរដូចមនុស្សទូទៅដែរ ដូច្នេះច្បាស់ណាស់ការសម្រេចចិត្តរបស់ពួកគាត់មិនមែនសុទ្ធត្រូវឥតខ្ចោះ១០០%នោះទេ។ មិនថា អាជ្ញាកណ្តាលនៅប្រទេសកម្ពុជា ឬតំបន់អាស៊ានទេ សូម្បីនៅតំបន់អាស៊ី អឺរ៉ុប និងកម្រិតពិភពលោកក៏គេចមិនផុតតែមានកំហុសខ្លះដូចគ្នាមិនខានឡើយ។

ហេតុដូច្នេះហើយបាន សហព័ន្ធកីឡាបាល់ទាត់អន្តរជាតិ (FIFA) ឈានដល់ការប្រើប្រាស់បច្ចេកទេសដើម្បីជាជំនួយដល់ការសម្រេចរបស់អាជ្ញាកណ្តាលមានដូចជា បច្ចេកទេសខ្សែបន្ទាត់ដើម្បីពិនិត្យមើលគ្រាប់បាល់ចូលឬមិនចូល បច្ចេកទេសវីដេអូជំនួសអាជ្ញាកណ្តាល VAR ដើម្បីពិនិត្យមើលបាល់ Offside, បាល់ប៉ះដៃ និងកំហុសឆ្គងផ្សេងៗ។ ទាំងអស់នេះផ្នែកជួយសម្រាលបន្ទុករបស់អាជ្ញាកណ្តាល។

កាលពីថ្ងៃសៅរ៍ ទី១៩ ខែសីហា ឆ្នាំ២០២៣ ជាការប្រកួតសប្តាហ៍ទី៣ នៃពានរង្វាន់ខេមបូឌានព្រីមៀរលីគ ក្លិបគិរីវង់សុខសែនជ័យ របស់លោក សាប៊ូន វិនតា បានបរាជ័យក្រោមថ្វីជើងម្ចាស់ផ្ទះ អង្គរថាយហ្គឺរ ដោយលទ្ធផល ២-០ នៅកីឡដ្ឋាន ហនុមាន ខេត្តសៀមរាប៕