គ្រូ​ភ្នំពេញក្រោនបង្ហាញផលលំបាកប៉ះ Tampines Rovers យប់នេះ

ក្លិបបាល់ទាត់ ភ្នំពេញក្រោន នឹង​ប្រកួត​ជា​មួយ​ម្ចាស់​ផ្ទះ​សិង្ហបុរី Tampines Rovers FC នៅកីឡដ្ឋាន Jalan Besar វេលា​ម៉ោង​៧:៣០​នាទី​យប់ (ម៉ោង​៦:៣០​នាទី​នៅ​កម្ពុជា) ថ្ងៃទី២៣ ខែសីហា ឆ្នាំ ២០២៣ នៅ​វគ្គ Play-off ​ដើម្បី​យក​ក្រុមឈ្នះ​​ឡើង​ទៅ​វគ្គ​ចែក​ពូល​ពាន​រង្វាន់ AFC CUP ។

ក្រុម​ភ្នំពេញ​ក្រោន​បាន​ទៅ​ដល់​ប្រទេស​សិង្ហបុរី​ហើយ​ បន្ទាប់​ពី​ធ្វើ​ដំណើរ​ទៅ​កាល​ពី​ថ្ងៃ​ទី​២១ ខែ​សីហា ឆ្នាំ​២០២២។

វា​ជា​បញ្ហា​លំបាក​​​សម្រាប់​ភ្នំពេញ​ក្រោន​ដែល​មាន​ពេល​វេលា​ដ៏​មមាញឹក​ទាំង​ការ​ប្រកួត​លីគ​កំពូល​កម្ពុជា និង​ពាន​រង្វាន់ AFC Cup។ មិន​ត្រឹម​តែ​ប៉ុណ្ណោះ​ទី​លាន​ក៏​ប្រហែល​ជា​បញ្ហា​លំបាក​មួយ​​ទៀត​សម្រាប់​ក្រុម​ភ្ញៀវ​ពី​កម្ពុជា។

លោក Oleg Starynskyi គ្រូបង្គោលភ្នំពេញក្រោននិយាយថា ៖«បើនិយាយពីគុណភាពនៃការប្រកួត ខ្ញុំគិតថា វាអាក្រក់ណាស់ក្នុងការលេងលើស្មៅសិប្បនិម្មិត ប៉ុន្តែខ្ញុំយល់ឃើញថា នៅ​សិង្ហបុរី​មានទីលានស្មៅ​ធម្មជាតិមិនមានច្រើនទេ»។

«ពួកគេតែងតែលេងនៅលើទីលានស្មៅសិប្បនិម្មិត​ ព្រោះទីលានស្មៅសិប្បនិម្មិត​ផ្តល់ថាមពលឲ្យពួកគេ តែវាធ្វើឲ្យមានការបារម្ភពីបញ្ហារបួស​ច្រើន។ ខ្ញុំចង់មានការប្រកួតនេះធ្វើនៅកីឡដ្ឋាន Tarasang ជាជាងកីឡដ្ឋាន Jalan Besar»។ សំដី​របស់​គ្រូ​ភ្នំពេញ​ក្រោន​បាន​សង្កត់​ធ្ងន់។

ការលើកឡើងបែបនេះដោយសារ​ភ្នំពេញ​ក្រោន​មិនសូវមានបទពិសោធច្រើន ក្នុងការលេងលើទីលានស្មៅសិប្បនិម្មិត​ទេ ដូច្នេះទើបគ្រូភ្នំពេញ​ក្រោន​​បារម្ភ និងចង់ប្តូរកីឡដ្ឋានប្រកួត។

ក្លិបទាំង២ធ្លាប់បានជួបគ្នាម្តងកាលពីថ្ងៃទី១៦ ខែឧសភា ឆ្នាំ២០១២ ពេលនោះក្លិប Tampines Rovers បានយកឈ្នះ ភ្នំពេញក្រោន ដោយលទ្ធផល ៤-៣។

ក្លិប Tampines Rovers FC ដែលដឹកនាំដោយលោក Gavin Lee ជនជាតិសិង្ហបុរី​ ធ្វើមិនសូវ​បានល្អ​សម្រាប់​ការ​ប្រកួត​ប៉ុន្មាន​លើក​ចុង​ក្រោយ​នៃ​លីគ​កំពូល​សិង្ហបុរី​គឺចាញ់៣ និងឈ្នះ២ ដោយរបូតគ្រាប់បាល់១៦គ្រាប់។ បច្ចុប្បន្នក្លិបនេះឈរនៅលេខ៣នៃតារាងពិន្ទុលីគកំពូល​សិង្ហបុរី​ បន្ទាប់ពីប្រកួត២២លើក ឈ្នះ ១៣ ស្មើ៥ និង៤ មាន ៤៤ពិន្ទុ។

Tampines Rovers មានកីឡាករបរទេស៤រូបក្នុងនោះកីឡាករជប៉ុន២រូប កីឡាករម៉ុងតេណេហ្គ្រោ១រូប និងកីឡាករស៊ែប៊ី១រូប។

ចំពោះ​៣ប្រកួតចុងក្រោយរបស់ ក្លិបភ្នំពេញក្រោន គឺឈ្នះ២និងចាញ់១។ ការប្រកួត​២លើកក្នុងពានរង្វាន់ខេមបូឌានព្រីមៀរលីគ ភ្នំពេញក្រោន យកឈ្នះ​បឹងកេត ២-១ និងចាញ់​ព្រះខ័នរាជស្វាយរៀង ២-១។ ការ​​ប្រកួតចុងក្រោយ ភ្នំពេញក្រោន បានយកឈ្នះក្រុម​ជើង​ឯក​លីគ​ឡាវ​ Young Elephants ដោយលទ្ធផល ៣-០ វគ្គជម្រុះបឋម ពានរង្វាន់ AFC Cup ឆ្នាំ២០២៣។

នៅថ្ងៃពុធ​ ទី២៣ ខែសីហា ឆ្នាំ២០២៣ ជាជំនួបអន្តរជាតិលើកទី​២របស់ក្លិបភ្នំពេញក្រោន​ដើម្បី​រក​កៅអីឆ្ពោះ​ទៅ​កាន់​វគ្គ​ចែក​ពូល​ក្នុង​ពាន​រង្វាន់លំដាប់​ទី​២​អាស៊ី AFC Cup។

លោក Oleg Starynskyi បានបញ្ជាក់បន្ដែមថា ៖«ខ្ញុំអាចនិយាយបានថា ការ​ប្រកួតនេះគឺ៥០/៥០ ប៉ុន្តែបើនិយាយឲ្យត្រង់ទៅ សម្រាប់លីគកម្ពុជា និងលីគសិង្ហបុរី កម្រិតលេងមិន​លើស​ខ្វះ​គ្នា​ប៉ុន្មាន​ទេ។ វាមិនដូចកាលពី៥ឆ្នាំមុនពេលដែលយើងជួប Home United FC ទេ»៕

អត្ថបទ៖ ផា រតនា