កីឡា

ព្រឹត្តិការណ៍គុនខ្មែរពិភពលោកនឹងធ្វើនៅសៀមរាបខែវិច្ឆិកា

បានផុស

១ year មុន

នៅ

ថ្ងៃសុក្រ ២៥ សីហា ២០២៣

ដោយ

សហព័ន្ធកីឡាប្រដាល់គុនខ្មែរអន្តរជាតិនឹងរៀបចំព្រឹត្តិការណ៍ប្រកួតគុនខ្មែរពិភពលោកនៅខេត្តសៀមរាប ព្រះរាជាណាចក្រកម្ពុជារយៈពេល៣ថ្ងៃដោយចាប់ពីថ្ងៃទី២៦ ដល់ទី២៨ ខែវិច្ឆិកា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមលិខិតអញ្ជើញរបស់សហព័ន្ធកីឡាប្រដាល់គុនខ្មែរអន្តរជាតិទៅកាន់បណ្តាសមាជិកទាំងអស់គឺមានន័យថា នឹងមានបណ្តាប្រទេសនឹងចូលរួម ពីព្រោះរហូតដល់ពេលនេះមានសមាជិកច្រើនជិត១០០ប្រទេសទៅហើយ។

ក្នុងនោះ សហព័ន្ធកីឡាប្រដាល់គុនខ្មែរប្រចាំនៅប្រទេសរុស្ស៊ី និងកីឡាករ កីឡាការិនីរុស្ស៊ីក៏ត្រូវបានអញ្ជើញឲ្យចូលរួមព្រឹត្តិការណ៍ធំនេះដែរ។

ព្រឹត្តិការណ៍គុនខ្មែរធំជាលើកដំបូងនេះនឹងមានកីឡាករ កីឡាការិនីរាប់រយនាក់ដែលត្រូវប្រកួត៣ប្រភេទគុនខ្មែរគឺលក្ខណៈស្ម័គ្រចិត្ត ពាក់កណ្តាលអាជីព និងអាជីពដែលនឹងមានខ្សែក្រវាត់ និងពានរង្វាន់សម្រាប់ជយលាភីនីមួយៗ។

នេះជាផ្នែកមួយដ៏សំខាន់ក្នុងការអភិវឌ្ឍ និងផ្សព្វផ្សាយកីឡាប្រដាល់គុនខ្មែរឲ្យកាន់តែរីកចម្រើន និងមានប្រជាប្រិយភាពកាន់តែទូលំទូលាយនៅលើឆាកអន្តរជាតិ។

សូមបញ្ជាក់ថា កីឡាប្រដាល់គុនខ្មែរត្រូវបានដាក់ចូលក្នុងកីឡាស៊ីហ្គេមជាលើកដំបូងនៅឆ្នាំ២០២៣ និងត្រូវបានដាក់បញ្ចូលក្នុងធម្មនុញ្ញស៊ីហ្គេមថែមទៀត។

តាមការឲ្យដឹងពីលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាថា មហិច្ឆតារបស់កម្ពុជាគឺនាំឆ្ពោះ«គុនខ្មែរ»ចូលទៅក្នុងកីឡាកម្រិតអាស៊ី និងអូឡាំពិក បន្ទាប់ពីទទួលបានជោគជ័យនៅតំបន់អាស៊ាន៕