ប្រធានបាល់ទាត់​អេ​ស្ប៉ា​ញ​ សុំទោស​ចំពោះ​ការ​ថើបមាត់កីឡាការិនីដែលឈ្នះជើងឯក World Cup

ប្រធានសហព័ន្ធកីឡាបាល់ទាត់អេស្ប៉ាញ (RFEF) លោក Luis Rubiales បានសារភាពថា “មានកំហុស”ចំពោះ​ការថើបបបូមាត់កីឡាការិនី​បាល់ទាត់អេស្ប៉ាញ Jennifer Hermoso បន្ទាប់ពីកីឡាការិនី​វ័យ៣៣ឆ្នាំរូបនេះបានទទួលមេដាយមាសរបស់នាង ក្រោយពីយកឈ្នះលើ ក្រុម​នារីអង់គ្លេស។

លោក Rubiales បានប្រឈមមុខការរិះគន់យ៉ាងខ្លាំង​ចំពោះទង្វើ​នេះ​ ដោយអ្នកនយោបាយ និងអ្នកកាសែតបានដាក់ស្លាកអាកប្បកិរិយារបស់​លោក​ថា “មិនអាចទទួលយកបាន” និង “គួរឱ្យស្អប់ខ្ពើម”។

ប្រធាន RFEF បាននិយាយនៅក្នុងសេចក្តីថ្លែងការណ៍​មួយថា ៖«មានឧបទ្ទវហេតុ​កើត​ឡើង​ ដែលខ្ញុំត្រូវតែសោកស្តាយ។ ជាអ្វីគ្រប់យ៉ាងដែលបានកើតឡើងរវាងកីឡាការិនី និងខ្ញុំ ជាមួយនឹងទំនាក់ទំនងដ៏អស្ចារ្យរវាងយើងទាំងពីរ ដូចគ្នានឹង​កីឡាការិនី​ផ្សេង​ទៀត​ដែរ។ ខ្ញុំប្រាកដជាមានកំហុស ខ្ញុំត្រូវតែទទួលស្គាល់វា។ ក្នុងពេលដ៏រីករាយ ដោយគ្មានចេតនា និងបំណងអាក្រក់អ្វីឡើយ»។

លោក Rubiales ស្ថិត​នៅលើឆាកសម្រាប់ពិធីប្រគល់ពានរង្វាន់របស់ FIFA បន្ទាប់ពីការប្រកួតវគ្គផ្តាច់ព្រ័ត្រ រួមជាមួយនឹងឥស្សរជនផ្សេងទៀត ក្នុង​នោះ​ទាំងប្រធានស្ថាប័នគ្រប់គ្រងបាល់ទាត់ពិភពលោក លោក Gianni Infantino ម្ចាស់ក្សត្រីយ៍ Letizia របស់អេស្ប៉ាញ និងនាយករដ្ឋមន្ត្រីអូស្ត្រាលី Anthony Albanese។

ការប្រកួតបាល់ទាត់នារីពិភពលោក នៅប្រទេសអូស្ត្រាលី និងនូវែលសេឡង់ គឺជាការប្រកួតដំបូងដែលមានក្រុមចំនួន​៣២​ ហើយធ្វើឡើងជាលើកដំបូងនៅក្នុងប្រទេសជា​សហម្ចាស់​ផ្ទះ​ពីរ។ វាបានបញ្ចប់នៅថ្ងៃអាទិត្យ (ថ្ងៃទី២០ ខែសីហា) ដោយក្រុមនារីអេស្ប៉ាញ គ្រងជើងឯក៕

ប្រែសម្រួល៖ មន្នីរ័ត្ន
ប្រភព៖ insidethegames.biz