កីឡា

សហព័ន្ធបាល់ទះកម្ពុជាកែទម្រង់៣ចំណុចធ្វើឲ្យជោគជ័យកីឡាស៊ីហ្គេម២លើកជាប់គ្នា

បានផុស

២ years មុន

នៅ

ថ្ងៃសៅរ៍ ២៦ សីហា ២០២៣

ដោយ

សហព័ន្ធកីឡាបាល់ទះកម្ពុជាបានរៀបចំសន្និបាតវិសាមញ្ញ អាណត្តិទី៦របស់ខ្លួននៅព្រឹកថ្ងៃសៅរ៍ ទី២៦ ខែសីហា ឆ្នាំ២០២៣ នៅក្លិបបាល់ទះវិសាខាដើម្បីជ្រើសតាំងគណៈកម្មការប្រតិបត្តិអាណត្តិថ្មី និងដាក់ផែនការយុទ្ធសាស្ត្រថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងមហាសន្និបាតវិសាមញ្ញនេះ សហព័ន្ធកីឡាបាល់ទះកម្ពុជាបានបង្ហាញកំណែទម្រង់ដែលបានផ្តល់ឲ្យក្រុមបាល់ទះជម្រើសជាតិកម្ពុជាទទួលបានជោគជ័យក្នុងការប្រកួតកីឡាស៊ីហ្គេមពីរលើកចុងក្រោយ និងការប្រកួតសំខាន់ផ្សេងៗទៀត។

ឯកឧត្តមសន្តិបណ្ឌិតឧបនាយករដ្ឋមន្ត្រី នេត សាវឿន ប្រធានសហព័ន្ធកីឡាបាល់ទះកម្ពុជាបានរម្លឹកឲ្យមហាសន្និបាតទាំងមូលដឹងថា សហព័ន្ធបានធ្វើកំណែទម្រង់ធំ៣ដែលនាំឲ្យទទួលបានជោគជ័យជាប្រវត្តិសាស្ត្រក្នុងកីឡាស៊ីហ្គេមពីរលើកចុងក្រោយ។ ទី១ កំណែទម្រង់ធន់ធានមនុស្ស មានដូចជា មន្ត្រីបច្ចេកទេស អាជ្ញាកណ្តាល គ្រូបង្វឹក និងកីឡាករ។ ទី២ កំណែទម្រង់ហេដ្ឋារចនាសម្ព័ន្ធ និងទី៣ កំណែទម្រង់លើហិរញ្ញវត្ថុ។

ប្រធានសហព័ន្ធបានបញ្ជាក់ថា បន្ទាប់ពីរៀបចំកំណែទម្រង់ ក្នុងរយៈពេលត្រីមាសដំបូង ក្រុមបាល់ទះជម្រើសជាតិកម្ពុជាបានបង្កើតកំណត់ត្រាជាប្រវត្តិសាស្ត្រថ្មីក្នុងរយៈពេល៤០ឆ្នាំចុងក្រោយដោយបានឈ្នះមេដាយសំរិទ្ធក្នុងកីឡាស៊ីហ្គេម ឆ្នាំ២០២១ (លើកឆ្នាំ២០២២) បន្ទាប់ពីបានយកឈ្នះលើក្រុមបាល់ទះជម្រើសជាតិថៃនៅប្រទេសវៀតណាម។

បន្ទាប់មកសហព័ន្ធបានដាក់ផែនការយុទ្ធសាស្ត្រជាច្រើនទៀតទាំងការប្រកួតក្នុងស្រុក និងក្រៅស្រុកជាបន្តបន្ទាប់រហូតឈានដល់ការបង្កើតកំណត់ត្រាជាប្រវត្តិសាស្ត្រថ្មីទៀតគឺឡើងដល់វគ្គផ្តាច់ព្រ័ត្រក្នុងកីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ និងទទួលបានមេដាយប្រាក់ជាលើកដំបូង។

ជាបន្តទៅទៀតនេះ ក្រុមបាល់ទះកម្ពុជាបានបោះជំហានចូលក្នុងព្រឹត្តិការណ៍កីឡាទ្វីបអាស៊ី (Asian Games) វិញ បន្ទាប់ពីខកខានតាំងពីឆ្នាំ១៩៧០ ដូច្នេះសម្រាប់គណៈកម្មការប្រតិបត្តិអាណត្តិថ្មីគឺដាក់ផែនការពង្រឹងក្រុមបាល់ទះបុរសកម្ពុជាសម្រាប់ការប្រកួតលើឆាកអន្តរជាតិ ព្រមទាំងពង្រឹងអភិវឌ្ឍបន្ថែមលើក្រុមបាល់ទះនារីកម្ពុជា និងយុវជនថ្នាលគ្រប់កម្រិត។

សម្រាប់អាណត្តិថ្មី ឯកឧត្តមសន្តិបណ្ឌិតឧបនាយករដ្ឋមន្ត្រី នេត សាវឿន ជាប្រធានកិត្តិយស និងមានសមាជិកកិត្តិយស៥រូបទៀតមានដូចជា លោក គង់ វិបុល, ឧកញ៉ា ឃុន សៀ, ឧកញ៉ា លាង ឃុន, ឧកញ៉ា សុខ ហុង និងលោក គៀត ច័ន្ទថារិទ្ធ។

ចំពោះគណៈកម្មការប្រតិបត្តិផ្ទាល់មានឯកឧត្តមឧបនាយករដ្ឋមន្ត្រី ស សុខា ជាប្រធាន និងលោក ស ថេត ជាអនុប្រធានអចិន្ត្រៃយ៍ ព្រមទាំងអនុប្រធាន៦រូប ខណៈលោក អាំង សិរីពិសិដ្ឋ ក៏ជាអនុប្រធាន និងជាអគ្គលេខាធិការ ហើយក៏មានសមាជិកជាច្រើនរូបទៀត៕