កីឡា

កម្ពុជាដាក់កីឡាករបាល់ទះបរទេស៣រូបត្រៀមកីឡាទ្វីបអាស៊ី

បានផុស

១ year មុន

នៅ

ថ្ងៃអង្គារ ២៩ សីហា ២០២៣

ដោយ

តាមរយៈសហព័ន្ធកីឡាបាល់ទះកម្ពុជា កីឡាករបាល់ទះគុយបា៣រូបទទួលបានសញ្ជាតិខ្មែរដើម្បីក្លាយជាកីឡាករបាល់ទះជម្រើសជាតិកម្ពុជាសម្រាប់ការប្រកួតក្នុងព្រឹត្តិការណ៍អន្តរជាតិ ជាពិសេសកីឡាទ្វីបអាស៊ី ឆ្នាំ២០២៣ នៅប្រទេសចិននាពេលខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជាបានបញ្ជាក់កាលពីថ្ងៃទី២៦ ខែសីហា ថា ការបញ្ចូលកីឡាករបរទេសក្នុងក្រុមបាល់ទះបុរសក្នុងសាលកម្ពុជាគឺដើម្បីបង្កើនសមត្ថភាពក្រុមបាល់ទះជម្រើសជាតិកម្ពុជា ពីព្រោះពួកគេមានសមត្ថភាព។

បន្ទាប់ពីដាក់បញ្ចូលកីឡាករគុយបាទាំង៣រូបបានចូលរួម ក្រុមបាល់ទះកម្ពុជាបានចេញហ្វឹកហាត់នៅប្រទេសចិនដើម្បីហ្វឹកហាត់ត្រៀមខ្លួនប្រកួតកីឡាទ្វីបអាស៊ីចាប់ពីថ្ងៃទី២៣ ខែកញ្ញា ដល់ថ្ងៃទី៨ ខែតុលា ឆ្នាំ២០២៣ នៅប្រទេសចិន។

ក្រុមបាល់ទះជម្រើសជាតិកម្ពុជានឹងចូលរួមប្រកួតកីឡាទ្វីបអាស៊ីជាលើកដំបូងវិញក្នុងរយៈពេលប្រហែលជា៥០ឆ្នាំចុងក្រោយនេះ បន្ទាប់ពីធ្លាប់បានចូលរួមប្រកួតចុងក្រោយតាំងពីឆ្នាំ១៩៧០។ ការចូលរួមប្រកួតកីឡាទ្វីបអាស៊ីនេះ ក៏បន្ទាប់ពីក្រុមបាល់ទះកម្ពុជាធ្វើបានល្អរហូតឈ្នះមេដាយសំរិទ្ធ និងប្រាក់កីឡាស៊ីហ្គេមពីរលើកចុងក្រោយ។

កីឡាករបាល់ទះគុយបាទាំង៣រូបដែលបានចូលជាសញ្ជាតិខ្មែររួមមាន៖

កីឡាករ Henry Pelayo Bernal អាយុ២២ឆ្នាំ និងមានកម្ពស់ ២,០៩ម៉ែត្រ
កីឡាករ Lester Armando Sanchez Cabrera អាយុ៣៣ឆ្នាំ និងមានកម្ពស់ ១,៨៤ម៉ែត្រ
កីឡាករ Raciel Herrera អាយុ២៥ឆ្នាំ និងមានកម្ពស់១,៩៧ម៉ែត្រ

សូមបញ្ជាក់ថា ក្រុមបាល់ទះកម្ពុជាស្ថិតនៅពូល C ជាមួយក្រុមសុទ្ធតែខ្លាំងនៅអាស៊ីគឺកូរ៉េខាងត្បូង និងឥណ្ឌា ក្នុងព្រឹត្តិការណ៍កីឡាទ្វីបអាស៊ី Asian Games លើកទី១៩ ឆ្នាំ២០២២ (លើកមកឆ្នាំ២០២៣) នៅប្រទេសចិន៕