សមាជិកថ្មីរបស់ក្លិបអង្គរស៊ីធីជាបងប្អូនជីដូន Mouzinho របស់វិសាខា

ក្រុម​បាល់ទាត់​អង្គរស៊ីធី​​បានសម្រេចចុះកុងត្រានាំយកកីឡាករខ្សែបម្រើវ័យ១៩ឆ្នាំរបស់​ជម្រើស​ជាតិ​ទីម័រខាង​កើត​ ដើម្បីពង្រឹងក្រុម ក្នុងការប្រកួតប្រជែងក្នុងលីគទី២របស់កម្ពុជា ដែលនឹងចាប់ផ្តើមនៅថ្ងៃទី១៦ ខែកញ្ញា ឆ្នាំ២០២៣។

Cristevao Fernandes គឺជាកីឡាករទី១ដែលអង្គរស៊ីធី​បាននាំយកមកក្នុងរដូវកាលនេះ។ ក្នុងវ័យត្រឹមតែ​១៩ឆ្នាំ កីឡាកររូបនេះមានបទពិសោធច្រើនជាមួយ​ក្រុមជម្រើសជាតិទីម័រខាង​កើត​ ដោយធ្លាប់ជាប់ក្នុងក្រុមជម្រើសជាតិ​ចាប់​ពី​កម្រិត​អាយុក្រោម១៩ឆ្នាំ ២៣ឆ្នាំ និង​ឈុត​ធំ។

មុនពេលផ្ទេរមក​កាន់​ក្រុម​​​ដែល​មាន​មូលដ្ឋាន​នៅ​ខេត្ត​សៀម​រាប់ Cristevao Fernandes ជាកីឡាកររបស់ក្លិប​ SLB Laulara ដែល​រូប​គេ​ជាបងប្អូនជីដូនមួយរបស់កីឡាករវិសាខា​ Mouzinho ជា​កីឡាករ​ទីម័រ​ខាង​កើត​​ដំបូងគេ​មក​លេង​នៅ​ទឹក​ដី​កម្ពុជា។

ក្រុម​អង្គរស៊ីធី​​ដែល​ដឹកនាំដោយលោក Charlie Pomroy ​ជា​គ្រូកម្រិត UEFA A License និង AFC A License បានដឹងច្បាស់ពីគុណភាពរបស់ខ្សែបម្រើកណ្ដាលរូបនេះ និង​​ការនាំយកកីឡាករវ័យក្មេងរូបនេះក៏ជាផ្តល់ឱកាស ឲ្យរូបគេបានបង្ហាញសមត្ថភាពក្នុងការប្រកួតប្រជែងក្នុងលីគទី២។

លោក Charlie Pomroy បានបញ្ជាក់ថា លោក​មិន​​ត្រឹម​តែ​រំពឹង​ទុក Cristevao ឲ្យជួយក្រុមក្នុងរយៈពេលវែងប៉ុណ្ណោះ​ទេ​ ប៉ុន្តែ​​លោកចង់ឃើញកីឡាករ​រូប​នេះ​អភិវឌ្ឍ​ខ្លួន​រហូត​ឈាន​ទៅ​លេង​​នៅ​​ក្លិបលីគកំពូល ព្រោះនេះ​ជាគោលការណ៍របស់ក្លិប​នៅ​ខេត្ត​សៀមរាប​ដែលផ្តោតសំខាន់លើការអភិវឌ្ឍ​យុវជន​នៅកម្ពុជា។

នេះក៏ជាបទពិសោធថ្មីមួយទៀតសម្រាប់កីឡាករ Cristevao Fernandes ដែលចូលរួមជាមួយក្លិបអង្គរស៊ីធី និង​សង្ឃឹមថា រូបគេ​ធ្វើបានល្អក្នុងការប្រកួត ហើយឱកាសបានផ្ទេរទៅកាន់ក្លិបនៅលីគកំពូលកម្ពជានា​ពេល​អនាគត។

នៅថ្ងៃទី១៦ ខែកញ្ញា ឆ្នាំ២០២៣ ក្រុម​អង្គរស៊ីធី នឹង​ប្រកួត​ជា​មួយ​ក្រុម​បាល់ទាត់ឡាយហ្វខេត្តព្រះស៊ីហនុ៕

អត្ថបទ៖ ផា រតនា