កីឡា

ជួន ចាន់ចាវ ៖«ដល់ពេលត្រូវកែប្រែប្រវត្តិសាស្ត្រហើយ»ប៉ះហុងកុងថ្ងៃស្អែក

បានផុស

១ year មុន

នៅ

ថ្ងៃពុធ ៦ កញ្ញា ២០២៣

ដោយ

ក្រុមបាល់ទាត់ជម្រើសជាតិកម្ពុជានឹងប្រកួតជាមួយក្រុមហុងកុងវេលាម៉ោង៦ល្ងាចថ្ងៃទី៧ ខែកញ្ញា ឆ្នាំ២០២៣ ក្នុងជំនួបមិត្តភាពអន្តរជាតិ FIFA Days នៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទសារព័ត៌មាននៅព្រឹកថ្ងៃទី៦ ខែកញ្ញា ឆ្នាំ២០២៣ កីឡាករ ជួន ចាន់ចាវ ប្រធានក្រុមបាល់ទាត់ជម្រើសជាតិកម្ពុជាបានលើកឡើងថា ក្នុងប្រវត្តិជួបគ្នាកន្លងមក កម្ពុជាមិនធ្លាប់ឈ្នះហុងកុងទេ ដូច្នេះដល់ពេលដែលកម្ពុជាត្រូវធ្វើអ្វីមួយថ្មីដើម្បីកែប្រែប្រវត្តិសាស្ត្រហើយ។

កីឡាករបាននិយាយថា ៖«សម្រាប់ខ្ញុំក្នុងនាមជាកីឡាករ ការប្រកួតថ្ងៃស្អែកជាការប្រកួតមួយដ៏ធំ ការប្រកួតដ៏ពិបាក ប៉ុន្តែខ្ញុំជឿជាក់លើមិត្តរួមក្រុម និងគ្រូបង្វឹកដែលយើងអាចធ្វើបាន ពីព្រោះមើលតាមការប្រកួតកន្លងមក យើងអត់ដែលឈ្នះហុងកុងទេ។ អីចឹងខ្ញុំគិតថា ដល់ពេលដែលយើងត្រូវធ្វើអ្វីមួយថ្មី។ ធ្វើអ្វីមួយដើម្បីកែប្រែលទ្ធផល។ និយាយមែនទែនទៅ ខ្ញុំចង់ឈ្នះការប្រកួតនេះ»។

ក្នុងប្រវត្តិសាស្ត្រគិតចាប់តាំងពីឆ្នាំ១៩៥៧រហូតដល់ដើមខែកញ្ញា ឆ្នាំ២០២៣នេះ កម្ពុជា និង ហុងកុង ធ្លាប់ជួបគ្នា៨លើក ប៉ុន្តែកម្ពុជាមិនធ្លាប់ហុងកុងឡើយក្នុងនោះ ចាញ់៧ដង និងស្មើ១ដង។