កីឡា

Bounphachan ជាកីឡាករឡាវទី១រកបានគ្រាប់បាល់ក្នុងលីគកម្ពុជា

បានផុស

១ year មុន

នៅ

ថ្ងៃសៅរ៍ ១៦ កញ្ញា ២០២៣

ដោយ

ព្រះខ័នរាជស្វាយរៀងរកបាន៣ពិន្ទុពេញបន្ថែមទៀត បន្ទាប់ពីបានឈ្នះលើក្រុមអង្គរថាយហ្គឺរដោយលទ្ធផល ៥-២ សម្រាប់ការប្រកួតសប្តាហ៍ទី៥នៃខេមបូឌានព្រីមៀរលីគរដូវកាល២០២៣-២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

៥គ្រាប់របស់ព្រះខ័នរាជស្វាយរៀងរកបានដោយកីឡាករ៥រូបផ្សេងគ្នាគឺខ្សែបម្រើ គឹម សុខយុទ្ធ នៅនាទីទី១០ ខ្សែការពារ សារ៉េត គ្រីយ៉ា នៅនាទីទី៤១ ខ្សែបម្រើកណ្តាលជប៉ុន Ryo Fujii នៅនាទីទី៦២ ខ្សែប្រយុទ្ធកាណាដា Marcus Haber នៅនាទីទី៧១ និងចុងក្រោយខ្សែបម្រើប្រយុទ្ធឡាវ Bounkong Bounphachan នៅនាទី៩០+៥។

ចំណែក២គ្រាប់របស់អង្គរថាយហ្គឺររកបានដោយកីឡាករ Nugent Ben William នៅនាទីទី២៥ និងកីឡាករ Blasco នៅនាទីទី៨០។

Bounkong Bounphachan បានក្លាយជាកីឡាករឡាវទី១ដែលបានរកគ្រាប់បាល់ក្នុងលីគបាល់ទាត់កំពូលកម្ពុជា ហើយរូបគេក៏ជាកីឡាករឡាវទី១ដែលមកលេងនៅលីគកំពូលកម្ពុជា។ រូបគេត្រូវបានដូរចូលជំនួសកីឡាករ Nick Taylor និងទទួលបានឱកាសបាន៣លើក ក៏សម្រេចទីបាន១គ្រាប់។

នៅថ្ងៃនេះដែរ ក្រុមក្រសួងការពារជាតិក៏រកបាន៣ពិន្ទុពេញ បន្ទាប់ពីបានយកឈ្នះលើក្រុមព្រៃវែងដោយលទ្ធផល ០-៣ នៅទឹកដីខេត្តព្រៃវែង។

សម្រាប់ការប្រកួតនៅទឹកដីស្វាយរៀងក្នុងសប្តាហ៍ទី៥នេះ មានអ្នកទស្សនាផ្ទាល់រហូតដល់ជាង៤ពាន់នាក់ពិតជាល្អខ្លាំងមែនទែន។

រហូតដល់ពេលនេះ ព្រះខ័នរាជស្វាយរៀងនៅតែរក្សាកំណត់ត្រាជ័យជម្នះរហូតដោយការប្រកួត៥សប្តាហ៍ក្នុងលីគកំពូលកម្ពុជារដូវកាលថ្មីនេះមិនទាន់ស្គាល់បរាជ័យឡើយ ហើយឈរលើកំពូលតារាងមាន១៥ពិន្ទុពេញ៕

អត្ថបទ៖ វីរបុត្រ