កីឡា

សឿត បារាំង តាំងចិត្តយក៣ពិន្ទុពីម្ចាស់ផ្ទះ Cebu FC ដើម្បីអ្នកគាំទ្រកម្ពុជា

បានផុស

១ year មុន

នៅ

ថ្ងៃពុធ ២០ កញ្ញា ២០២៣

ដោយ

ខ្សែបម្រើការពារ សឿត បារាំង បានតាំងចិត្តរួមគ្នាជាមួយមិត្តរួមក្រុមភ្នំពេញក្រោនដើម្បីស្វែងរកឲ្យបានជ័យជម្នះពីម្ចាស់ផ្ទះ Dynamic Herb Cebu FC របស់ហ្វីលីពីន វេលាម៉ោង៧យប់ ក្នុងការប្រកួតសន្សំពិន្ទុក្នុងពូល F ពានរង្វាន់ AFC Cup។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទសារព័ត៌មាន សឿត បារាំង បានលើកឡើងថា ក្រុមទាំងមូលរីករាយដែលបានមកប្រកួតនៅប្រទេសហ្វីលីពីន និងតាំងចិត្តស្វែងរកជ័យជម្នះដើម្បីជូនអ្នកគាំទ្រនៅកម្ពុជា។

កីឡាករបាននិយាយថា ៖«ការប្រកួតថ្ងៃស្អែកគឺជាការប្រកួតដ៏សំខាន់សម្រាប់ពួកយើងដើម្បីយក៣ពិន្ទុពីក្រុមម្ចាស់ផ្ទះជូនអ្នកគាំទ្ររបស់យើង។ យើងនឹងខិតខំប្រឹងប្រែងឲ្យអស់ពីលទ្ធភាពដើម្បីស្វែងជ័យជម្នះឲ្យបាន»។

Dynamic Herb Cebu FC ជាក្រុមថ្មីមួយនៅប្រទេសហ្វីលីពីនដែលទើបបង្កើតឡើងកាលពីឆ្នាំ២០២១ពោលគឺទើបតែបាន២ឆ្នាំប៉ុណ្ណោះ ប៉ុន្តែធ្វើបានល្អនារដូវកាល២០២២-២៣កន្លងទៅក្នុងលីគហ្វីលីពីនដោយពួកគេស្ថិតនៅចំណាត់ថ្នាក់លេខ២ដើម្បីទទួលបានកៅអីក្នុងពានរង្វាន់ AFC Cup វគ្គសន្សំពិន្ទុក្នុងពូលតែម្តង។

ចំណែក ភ្នំពេញក្រោន ធ្លាប់ចូលរួមប្រកួតពានរង្វាន់ AFC Cup ៣ដងហើយគិតទាំងឆ្នាំ២០២៣នេះ។ លើកទី១ ឆ្នាំ២០១៧ ក្នុងវគ្គ Playoff ក្រុមតំណាងកម្ពុជាមួយនេះបានចាញ់ ក្រុមសិង្ហបុរី Home United ទាំងពីរជើង សរុបគ្រាប់បាល់ ៣-៧។ ឆ្នាំ២០២២ ភ្នំពេញក្រោនបានប្រកួតក្នុងវគ្គសន្សំពិន្ទុក្នុងពូល I ដោយបានចាញ់ក្រុមសិង្ហបុរី Hangang United ៣-៤, ស្មើក្រុមវៀតណាម Viettel ០-០ និងឈ្នះក្រុម Young Elephant ៤-២ ស្ថិតនៅលេខ៣។

នៅឆ្នាំ២០២៣ នៅជម្រុះបឋម ភ្នំពេញក្រោន បានឈ្នះក្រុមឡាវ Young Elephant ៣-០ និងវគ្គ Playoff ឈ្នះសិង្ហបុរី Tampines Rovers ៣-២ ដើម្បីបានឡើងទៅវគ្គចែកពូល ដោយស្ថិតនៅពូល F ជាមួយក្រុម DH Cebu (ហ្វីលីពីន) Macarthur FC (អូស្ត្រាលី) និង Shan United (មីយ៉ាន់ម៉ា)៕