UEFA សម្រេច​ឲ្យក្រុមយុវជនរុស្ស៊ីចូលរួមប្រកួតកម្រិតអឺរ៉ុបវិញ

គណៈកម្មាធិការប្រតិបត្តិរបស់សហព័ន្ធបាល់ទាត់ទ្វីបអឺរ៉ុប (UEFA) បានបោះឆ្នោតដើម្បីបញ្ជូលក្រុមយុវជនរុស្ស៊ី​ឲ្យ​បាន​ចូល​រួម​ប្រកួតអន្តរជាតិរបស់ខ្លួន ដោយលើកហេតុផលថា “អនីតិជនជំនាន់មួយ” មិនត្រូវដកហូតសិទ្ធិក្នុងការប្រកួតបាល់ទាត់អន្តរជាតិដោយសារ​សង្រ្គាម​កំពុងបន្តនៅប្រទេសអ៊ុយក្រែន។

ការសម្រេចចិត្តនេះត្រូវបានធ្វើឡើងក្នុងអំឡុងពេលកិច្ចប្រជុំដែលធ្វើឡើងនៅទីក្រុង Limassol ក្នុងប្រទេស Cyprus ដោយ UEFA បាននិយាយថា ក្រុមយុវជន​រុស្ស៊ីនឹងត្រូវបានបញ្ចូលទៅក្នុងការប្រកួតរបស់ខ្លួន​រដូវកាលនេះ។

គណៈកម្មាធិការប្រតិបត្តិក៏បានស្នើឱ្យរកដំណោះស្រាយបច្ចេកទេសមួយ ដើម្បីអាចឱ្យក្រុមយុវជន ទាំង​បុរស និង​នារីអាយុក្រោម ១៧ឆ្នាំរបស់រុស្សីចូលប្រកួតឡើងវិញ បើទោះបីជាការចាប់ឆ្នោតបែងចែកពូលបានធ្វើឡើងរួចហើយក្តី។

គណៈកម្មាធិការក៏ឆ្លៀតឱកាសដើម្បីបញ្ជាក់ឡើងវិញនូវការថ្កោលទោសរបស់ខ្លួនចំពោះការលុកលុយរបស់រុស្ស៊ីលើអ៊ុយក្រែន និងបានបញ្ជាក់ថា ការព្យួរក្លិប និងក្រុមជម្រើសជាតិឈុតធំរបស់រុស្ស៊ីនឹងនៅដដែលរហូតដល់សង្គ្រាមបញ្ចប់។

ប្រធាន UEFA លោក Aleksander Čeferin បាននិយាយថា ៖«ការបន្តផ្អាករបស់ UEFA ប្រឆាំងនឹងក្រុមមនុស្សពេញវ័យរុស្ស៊ីឆ្លុះបញ្ចាំងពីការប្តេជ្ញាចិត្តរបស់ខ្លួនក្នុងការប្រកាន់ជំហរប្រឆាំងនឹងអំពើហិង្សា និងការឈ្លានពាន។ UEFA កំណត់ថា ជំហរនេះនឹងបន្តរហូតដល់សង្គ្រាមចប់»។

គួររម្លឹកថា UEFA បានផ្អាកក្រុមរុស្ស៊ីទាំងអស់ពីការប្រកួតរបស់ខ្លួនក្នុងខែកុម្ភៈ ឆ្នាំ២០២២ ភ្លាមៗបន្ទាប់ពីការលុកលុយ​លើអ៊ុយក្រែន៕

ប្រែសម្រួល៖ មន្នីរ័ត្ន
ប្រភព៖ insidethegames.biz