កីឡា

អបអរសាទរ! ស្រួង ភាវី ត្រូវបានរដ្ឋាភិបាលកូរ៉េផ្តល់ពានរង្វាន់មួយដ៏ថ្លៃថ្លា

បានផុស

៩ ខែ មុន

នៅ

ថ្ងៃព្រហស្បតិ៍ ៥ តុលា ២០២៣

ដោយ

កីឡាការិនីស្នូកឃ័រ និងប៊ីយ៉ាជម្រើសជាតិកម្ពុជា ស្រួង ភាវី ត្រូវបានរដ្ឋាភិបាលនៃប្រទេសកូរ៉េខាងត្បូងផ្តល់ពានរង្វាន់ «វប្បធម៌បង្រួបបង្រួមជាតិពហុវប្បធម៌ និងពានរង្វាន់ពីក្រសួងព័ត៌មាន ក៏ដូចជាកាសែត និងទស្សនាវដ្តី» ក្នុងចំណោមជយលាភី៦រូប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពានរង្វាន់ដ៏មហាកិត្តិយសនេះ បន្ទាប់ពីកីឡាការិនីកម្ពុជារូបនេះចូលរួមយ៉ាងសកម្មក្នុងបុព្វហេតុមនុស្សធម៌ទាំងនៅក្នុងប្រទេសកូរ៉េ និងជាពិសេសនៅប្រទេសកម្ពុជា។ នាងបានធ្វើជាទូតសុច្ឆន្ទៈជាបន្តបន្ទាប់ឲ្យអង្ការ និងស្ថាប័នសប្បុរសធម៌ ក៏ដូចជាចូលរួមសកម្មនានាជាច្រើន។

ជាពិសេស ស្រួង ភាវី ជាកីឡាការិនីឆ្នើមផ្នែកកីឡាស្នូកឃ័រ និងប៊ីយ៉ា នៅប្រទេសកូរ៉េខាងត្បូងដែលត្រូវបានស្ថាប័នព័ត៌មានទូទាំងប្រទេសកូរ៉េចាប់អារម្មណ៍ដើម្បីផ្សព្វផ្សាយ ហើយមានពលរដ្ឋកូរ៉េស្រឡាញ់ចូលចិត្តច្រើន។ ក្នុងឆ្នាំ២០២៣នេះ នាងបានឈ្នះមេដាយមាសជូនជាតិ នៅពេលកម្ពុជាធ្វើម្ចាស់ផ្ទះរៀបចំការប្រកួតកីឡាស៊ីហ្គេម។

ស្រួង ភាវី បាននិយាយថា ៖«អ្នកដែលទទួលបានពានរង្វាន់«វប្បធម៌បង្រួបបង្រួមជាតិពហុវប្បធម៌»នេះគឺជាបុគ្គលដែលទទួលជោគជ័យក្នុងជីវិត និងធ្វើកិច្ចការដែលមានគុណតម្លៃសម្រាប់ជាតិ និងប្រជាជន ហើយបានធ្វើឱ្យជាតិរីកចម្រើន ព្រមទាំងបានលើកកិត្យានុភាពជាតិឱ្យមានភាពល្បីល្បាញថែមទៀតផង។ សម្រាប់រូបនាងខ្ញុំបានលើកកិត្យានុភាពជាតិទាំងពីរ ជាតិកំណើត និងជាតិស្នាក់អាស្រ័យ»៕