កីឡា

ប្រធាន AFF លោក ខៀវ សាម៉េត រំពឹង វៀតណាមបានទៅ World Cup 2026 ជុំផ្តាច់ព្រ័ត្រ

បានផុស

១២ ខែ មុន

នៅ

ថ្ងៃសៅរ៍ ៧ តុលា ២០២៣

ដោយ

លោក ខៀវ សាម៉េត ប្រធានសហព័ន្ធកីឡាបាល់ទាត់អាស៊ីអាគ្នេយ៍ (AFF) បានកោតសរសើរចំពោះភាពរីកចម្រើនរបស់កីឡាបាល់ទាត់វៀតណាម និងរំពឹងក្រុមអាស៊ានមួយអាចទទួលបានកៅអីប្រចាំតំបន់អាស៊ីឡើងទៅជុំផ្តាច់ព្រ័ត្រ ជើងឯកពិភពលោកឆ្នាំ២០២៦ (FIFA World Cup 2026)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីសប្តាហ៍មុននេះ សហព័ន្ធកីឡាបាល់ទាត់អាស៊ាន (AFF) បានរៀបចំមហាសន្និបាទប្រចាំឆ្នាំរបស់ខ្លួននៅទីក្រុងហូជីមិញ ប្រទេសវៀតណាម ដែលមានតំណាងសហព័ន្ធកីឡាបាល់ទាត់អាស៊ី (AFC) តំណាងសហព័ន្ធកីឡាបាល់ទាត់អន្តរជាតិ (FIFA) និងតំណាងស្ថាប័នបាល់ទាត់អន្តរជាតិផ្សេងៗទៀតចូលរួមមានដូចជា ប្រធានសហព័ន្ធកីឡាបាល់ទាត់អាល្លឺម៉ង់ បែលហ្ស៊ិក ហុល្លង់ និងអាហ្វ្រិកខាងត្បូងជាដើម។

លោក ខៀត សាម៉េត បានប្រាប់«កម្ពុជាថ្មី»ថា លោកបានចូលរួមអបអរដល់វិស័យកីឡាបាល់ទាត់វៀតណាមដែលបានរីកចម្រើនគួរឲ្យកត់សំគាល់ទាំងបុរស និងនារី។ ជាពិសេសក្រុមបាល់ទាត់នារីវៀតណាមទទួលបានកៅអីទៅជុំផ្តាច់ព្រ័ត្រ FIFA World Cup Women នៅឆ្នាំ២០២៣នេះ។

ជាមួយគ្នានេះ លោករំពឹងក្រុមបាល់ទាត់ជម្រើសជាតិវៀតណាមបានទៅជុំផ្តាច់ព្រ័ត្រ World Cup នៅឆ្នាំ២០២៦។ លោកប្រធាន AFF បានបញ្ជាក់ថា ៖«ខ្ញុំរំពឹង ក្រុមបាល់ទាត់ជម្រើសជាតិវៀតណាមបានកៅអីទៅជុំផ្តាច់ព្រ័ត្រ តែពួកគាត់ទាល់តែប្រកួតឈ្នះវគ្គជម្រុះទើបទទួលបានកៅអីឡើងទៅជុំផ្តាច់ព្រ័ត្រ។ គ្មាននរណាគេដាក់ក្រុមឲ្យទៅលេងដោយគ្មានការប្រកួតជម្រុះទេ។ សូម្បីតែអាហ្សង់ទីន ឬប្រេស៊ីល ក៏ត្រូវតែធ្វើការប្រកួតជម្រុះដែរ»។

សម្រាប់ World Cup ឆ្នាំ២០២៦ ដែលសហម្ចាស់ផ្ទះកាណាដា សហរដ្ឋអាមេរិក និងម៉ិកស៊ិកមានលក្ខណៈពិសេសប្លែកជាងមុនៗ ដោយសារក្រុមជម្រើសជាតិត្រូវបានបង្កើនរហូតដល់៤៨មកពី៦ទ្វីបផ្សេងគ្នា។

តំបន់អាស៊ី (AFC) ទទួលបានកៅអីចំនួន ៨កន្លះ ក្នុងចំណោមកៅអី៤៨នៅជុំផ្តាច់ព្រ័ត្រ ដូច្នេះក្រុមជម្រើសជាតិ និងកោះនៅតំបន់អាស៊ីចំនួន៤៦ត្រូវគ្នាដែលត្រូវប្រកួតជម្រុះបឋមនៅថ្ងៃទី១២ ខែតុលា ឆ្នាំ២០២៣។

ដោយមានចំណាត់ថ្នាក់ FIFA ខ្ពស់ ក្រុមជម្រើសជាតិវៀតណាមមិនប្រកួតជម្រុះជុំទី១ទេ ដោយពួកគេចាប់ផ្តើមជម្រុះនៅជុំទី២ដែលស្ថិតនៅពូល F មានក្រុមជម្រើសជាតិអ៊ីរ៉ាក់ ហ្វីលីពីន និង១ក្រុមទៀតឡើងមកពីក្រុមជម្រុះជុំទី១។

ចំពោះក្រុមបាល់ទាត់ជម្រើសជាតិកម្ពុជាត្រូវប្រកួតជម្រុះជុំទី១ជាមួយប៉ាគីស្ថាន ជើងទី១ ថ្ងៃទី១២ និងជើងទី២ ថ្ងៃទី១៧ ខែតុលា។ ក្រុមទទួលបានជ័យជម្នះឡើងទៅជុំទី២ដែលត្រូវប្រកួតសន្សំពិន្ទុក្នុងពូល៕