បញ្ជីឈ្មោះកីឡាករអាស៊ីល្អបំផុតប្រចាំឆ្នាំដែលលេងនៅអឺរ៉ុប

ពានរង្វាន់ AFC Annual Awards Doha 2022 ដែលរៀបចំនៅ​ប្រទេសកាតារ លើកដំបូងនឹងចាប់ផ្តើមនៅម៉ោង៨យប់នៅថ្ងៃទី៣១ ខែតុលា បន្ទាប់ពីបានផ្អាកអស់រយៈពេល៤ឆ្នាំ។ នេះជាកម្មវិធីដ៏ធំមួយក្នុងតំបន់អាស៊ីដែលប្រគល់ពានរង្វាន់ជាច្រើនដល់កីឡាករ កីឡាការិនី និង​គ្រូ​បង្វឹក។

ខាងក្រោមនេះជាបញ្ជីឈ្មោះបេក្ខភាពកីឡាករអាស៊ីដែលប្រកបអាជីពនៅតំបន់អឺរ៉ុបល្អប្រចាំឆ្នាំ (AFC Asian International Player of the Year)

១.កីឡាករ Mehdi Tarem

ខ្សែប្រយុទ្ធរបស់ក្លិប FC Porto កីឡាករ Mehdi Tarem ជា​សមាជិក​ជម្រើស​ជាតិជាតិអ៉ីរ៉ង់ ជាបេក្ខភាពមួយក្នុងចំណោមបេក្ខភាព៣រូបដែល​បាន​ជាប់ឈ្មោះប្រជែងក្នុងពានរង្វាន់កីឡាករអាស៊ី​លេង​នៅតំបន់អឺរ៉ុបល្អបំផុតប្រចាំឆ្នាំ។ ក្នុងរដូវកាលឆ្នាំ២០២២-២៣ កីឡាករ Mehdi Tarem ក៏ជាសមាជិកសំខាន់មួយរូបដែលជួយឲ្យក្លិប FC Porto ឈ្នះពានរង្វាន់៣ រួមមានពានរង្វាន់ Portuguese Supercup, Portuguese League Cup និង​ Portuguese Cup។

២.កីឡាករ Kaoru Mitoma

ខ្សែបម្រើស្លាបឆ្វេងរបស់ក្លិប Brighton កីឡាករ Kaoru Mitoma ជា​សមាជិក​ជម្រើស​ជាតិជប៉ុន វ័យ២៦ ឆ្នាំត្រូវបានជ្រើសរើសចូលក្នុងបញ្ជីបេក្ខភាព៣រូបចុងក្រោយក្នុងការប្រជែងពានរង្វាន់កីឡាករអាស៊ីដែលប្រកបអាជីពនៅតំបន់អឺរ៉ុបល្អបំផុតប្រចាំឆ្នាំ។ Mitoma ជាសមាជិកសំខាន់មួយដែលជួយឲ្យក្លិប Brighton ឈរលេខ៦ ក្នុងរដូវកាលមុននិងមានឱកាសបានចូលលេងក្នុងពានរង្វាន់ Europe League លើកដំបូងក្នុងប្រវត្តិសាស្រ្តរបស់ក្លិប។

៣.កីឡាករ Kim Min-jae

ខ្សែការពារកណ្តាលរបស់ក្លិប FC Bayern Munich កីឡាករ Kim Min-jae វ័យ២៦ឆ្នាំ ជនជាតិកូរ៉េខាងត្បូងក៏ស្ថិតក្នុងបញ្ជីឈ្មោះបេក្ខភាព៣រូបចុងក្រោយដែរ ដោយផ្អែកលើសមិទ្ធផលកាលពីរដូវកាលមុន​ជាមួយក្លិប Napoli របស់ប្រទេសអ៉ីតាលី។ Kim បង្ហាញខ្លួនជាមួយក្លិប Napoli បាន៣៥ប្រកួត ស៊ុតបញ្ចូលទី២គ្រាប់ ជួយឲ្យក្លិបឈ្នះជើងឯកលីគកំពូលអ៉ីតាលី និងឡើងដល់វគ្គ៨ក្រុមចុងក្រោយក្នុងពានរង្វាន់ UEFA Champion League៕

អត្ថបទ៖ ផា រតនា