កីឡា

លោក Oleg និយាយថា ភ្នំពេញក្រោនត្រៀមខ្លួនគ្រប់គ្រាន់ទាំងលីគ និង AFC Cup

បានផុស

១ year មុន

នៅ

ថ្ងៃចន្ទ ២៣ តុលា ២០២៣

ដោយ

លោក Oleg Starynskyi ជឿជាក់លើកូនក្រុមរបស់លោកបានត្រៀមលក្ខណៈសម្បត្តិគ្រប់គ្រាន់ទាំងការប្រកួតខេមបូឌានព្រីមៀរលីគ និងជើងឯកទ្វីបអាស៊ីលំដាប់ទី២ AFC Cup បើទោះបីជាមមាញឹកច្រើនក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតសប្ដាហ៍ទី៨ ក្នុងជម្រើសជើងឯកជាតិ ខេមបូឌានព្រីមៀរលីគ កាលពីថ្ងៃសៅរ៍ទី២១ ខែតុលា ឆ្នាំ២០២៣ ភ្នំពេញក្រោនបានយកឈ្នះក្លិបបាល់ទាត់ព្រៃវែង ៣-១។ នៅថ្ងៃព្រហស្បតិ៍ ទី២៦ ខែតុលា ឆ្នាំ២០២៣ ភ្នំពេញក្រោននឹងត្រូវជួបក្លិបខ្លាំងមកពីអូស្រ្តាលី Macarthur FC ក្នុងពានរង្វាន់ AFC Cup និងថ្ងៃអាទិត្យទី២៩ ខែតុលា ត្រូវជួបជាមួយគិរីវង់សុខសែនជ័យ ក្នុងលីគកំពូលកម្ពុជា។

លោក Oleg Starynskyi គ្រូបង្វឹកភ្នំពេញក្រោននិយាយថា៖«សម្រាប់ខ្ញុំ ការប្រកួតញឹកញាប់មិនសូវមានបញ្ហាទេ ដោយសារកីឡាកររបស់ខ្ញុំគឺមានសមត្ថភាពគ្រប់គ្រាន់ ក្នុងការផ្លាស់ប្តូរគ្នាលេង។ នេះក៏ជាផលចំណេញសម្រាប់ក្រុមផងដែរ»។

«ការប្រកួតជាមួយព្រៃវែង ខ្ញុំគិតថា កីឡាករដែលទើបវិលត្រឡប់មកពីក្រុមជម្រើសជាតិអាចមានភាពហត់នឿយបន្ថិចដោយសារមិនបានសម្រាកគ្រប់គ្រាន់ ប៉ុន្តែការប្រកួតជាមួយ Macarthur នៅថ្ងៃព្រហស្បតិ៍ ខ្ញុំគិតថា ពួកគេមានពេលសម្រាកនិងតៀមខ្លួនគ្រប់គ្រាន់»។

ការប្រកួតផ្លូវការ១២លើកចុងក្រោយទាំងក្នុងខេមបូឌានព្រីមៀរលីគ និង AFC Cup ភ្នំពេញក្រោនចាញ់តែម្តងគត់ ក្រៅពីនេះទទួលបានជ័យជម្នះទាំងអស់។ គិតត្រឹមសប្តាហ៍ទី៨ ខេមបូឌានព្រីមៀរលីគ ភ្នំពេញក្រោនកំពុងឈរនៅលេខ២ ដោយប្រកួត៨លើក ឈ្នះ៧ ចាញ់១ មាន២១ពិន្ទុ។ ក្នុងពានរង្វាន់ AFC Cup ក្រុមតំណាងកម្ពុជាមួយនេះកំពុងឈរលេខ២ ក្នុងពូល F ដោយប្រកួត២លើក ឈ្នះទាំងអស់ និងមាន៦ពិន្ទុ បន្ទាប់ពីឈ្នះ២លើកជាប់គ្នាក្នុងវគ្គជម្រុះលើក្រុមឡាវ និងសិង្ហបុរី។