កីឡា

លោក នួន សូរិយា បញ្ជាក់មូលហេតុដែលចង់ឲ្យ ធឿន ធារ៉ា ជំនួស ព្រំ សំណាង ប៉ះ Dave Leduc

បានផុស

១ year មុន

នៅ

ថ្ងៃចន្ទ ២៣ តុលា ២០២៣

ដោយ

លោក នួន សូរិយា អតីតជើងខ្លាំងប្រដាល់គុនខ្មែរដែលកំពុងរស់នៅសហរដ្ឋអាមេរិកបានចេញវីដេអូបកស្រាយជុំវិញមូលហេតុដែលលោកចង់ឲ្យដាក់ ធឿន ធារ៉ា ជំនួស ព្រំ សំណាង សម្រាប់ការប្រកួតស្តេចប្រដាល់មីយ៉ាន់ម៉ា Dave Leduc នៅថ្ងៃទី៥ ខែវិច្ឆិកា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីពេលថ្មីៗនេះ លោក នួន សូរិយា ធ្លាប់បាននិយាយថា ប្រសិនបើ ព្រំ សំណាង ហ្វឹកហាត់មិនបានដិតដល់ និងមិនឡើងសមត្ថភាពខ្លាំងទេ គួរដាក់ ធឿន ធារ៉ា ជំនួសវិញសម្រាប់ការប្រកួតធំប្រចាំឆ្នាំនាខែវិច្ឆិកាខាងមុខ។

ទោះបីជាយ៉ាងណា អ្នកគាំទ្រមួយចំនួនហាក់មិនបានយល់ច្បាស់ពីគោលបំណងរបស់ នួន សូរិយា ដែលអាចគិតថា អតីតកីឡាករប្រដាល់រូបនេះមិនពេញនឹង ព្រំ សំណាង ហើយចង់ឲ្យ ធឿន ធារ៉ា ជំនួសវិញ។ អ្នកគាំទ្រមួយចំនួនបានរិះគន់ខ្លាំងលើ នួន សូរិយា។

លោក នួន សូរិយា បានចេញវីដេអូសាជាថ្មីដោយបានបញ្ជាក់ថា អ្វីដែលលោកនិយាយគឺមានគោលបំណងឲ្យ ព្រំ សំណាង មានការឈឺចិត្ត និងខិតខំប្រឹងឲ្យបានដិតសម្រាប់ការប្រកួតដ៏សំខាន់ជាប្រវត្តិសាស្ត្រ។

លោកបានពន្យល់ថា ៖«ខ្ញុំចង់មានន័យថា ប្រសិនបើ ព្រំ សំណាង ហ្វឹកហាត់ក្នុងរយៈពេលពីរបីសប្តាហ៍ ក្រោយមានក្លិបហ្វឹកហាត់ថ្មី មិនឡើង គួរដាក់ ធឿន ធារ៉ា ជំនួសវិញ ពីព្រោះជាការប្រកួតដ៏សំខាន់តំណាងឲ្យប្រទេសជាតិ។ ខ្ញុំចង់ឲ្យគាត់មានការខិតខំប្រឹងប្រែងឲ្យបានដល់ ពីព្រោះពីរប្រកួតចុងក្រោយ សំណាង ធ្វើមិនសូវបានល្អទេ»។

ចុងក្រោយ លោក នួន សូរិយា បានស្នើឲ្យអ្នកគាំទ្រមួយចំនួនឈប់រិះគន់លោកទៀត ពីព្រោះគោលបំណងរបស់លោកគ្មានចេតនារិះគន់ជាន់ពន្លិច ព្រំ សំណាង ហើយលោកក៏សូមមានការអធ្យាស្រ័យ ប្រសិនប៉ះពាល់ដល់អារម្មណ៍អ្នកគាំទ្រមួយចំនួនដែលចូលចិត្ត ព្រំ សំណាង។

តាមការគ្រោងទុក ព្រំ សំណាង នឹងប្រកួតជាមួយកីឡាករ Dave Leduc ដែលជាស្តេចប្រដាល់មីយ៉ាន់ម៉ា នៅថ្ងៃទី៥ ខែវិច្ឆិកា ឆ្នាំ២០២៣។ សម្រាប់ការត្រៀមខ្លួនប្រកួតនេះ ព្រំ សំណាង ទទូលបានប្រាក់រង្វាន់១០០លានរៀល ក្លិបហ្វឹកហាត់ទំនើបថ្មី និងគ្រូបង្វឹក១០រូប៕

អត្ថបទ៖ វីរបុត្រ