កីឡា

គ្រូព្រះខ័នរាជស្វាយរៀងប្រាប់ពីសក្តានុពលរបស់ Nick Taylor

បានផុស

១ year មុន

នៅ

ថ្ងៃអង្គារ ១៤ វិច្ឆិកា ២០២៣

ដោយ

កីឡាករខ្មែរ-អាមេរិក Nick Taylor កំពុងក្លាយជាសមាជិកដ៏សំខាន់ម្នាក់រួមចំណែកជួយដល់ក្លិបបាល់ទាត់ព្រះខ័នរាជស្វាយរៀងឲ្យទទួលបានជ័យជម្នះ១០លើកជាប់គ្នាក្នុងពានរង្វាន់ខេមបូឌានព្រីមៀរលីគរដូវកាល២០២៣-២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Nick Taylor ទើបមកលេងក្នុងលីគកំពូលកម្ពុជារដូវកាលដំបូងប៉ុណ្ណោះដោយបានចូលរួមជាមួយព្រះខ័នរាជស្វាយរៀងដែលជាក្រុមមានមូលដ្ឋាននៅខេត្តកំណើតរបស់ជីតារបស់ខ្លួន។ ការចាប់ផ្តើមជុំទី១ និងឈានចូលជុំទី២ រូបគេតែងតែត្រូវបានលោកគ្រូបង្វឹក Pep Muñoz ដាក់ឲ្យលេងជម្រើស១១នាក់ដំបូងជាញឹកញាប់ និងត្រូវបានដាក់ឲ្យលេងក្នុងវគ្គទី២តែពីរដងប៉ុណ្ណោះក្នុងចំណោម១០ប្រកួតចុងក្រោយ។

ក្នុងនាមជាគ្រូបង្វឹក លោក Pep Muñoz បានមើលឃើញពីភាពខ្លាំងរបស់កីឡាករមានកំណើតនៅសហរដ្ឋអាមេរិករូបនេះ។ លោកបានលើកឡើងថា ៖«គាត់ជាកីឡាករដ៏ល្អដែលមានកាយសម្បទាមាំមួន មានល្បឿនលឿន។ គាត់ជាកីឡាករយល់ច្បាស់ពីរបៀបលេងនៅលើទីលាន សហការជាមិត្តរួមក្រុមបានល្អ។ ការសម្រេចចិត្តរបស់គាត់លឿន ពេលត្រូវបញ្ជូនបាល់ឲ្យមិត្តរួមក្រុម ពេលណាត្រូវមានចលនាបណ្តើរបាល់ ពេលណាត្រូវលើកបាល់ឲ្យមិត្តរួមក្រុម ឬទាត់ទីជាដើម»។

«ខ្ញុំពិតជាសប្បាយរីករាយដែលមាន Nick Taylor នៅជាមួយក្រុមយើងរដូវកាលនេះ។ អ្វីដែលសំខាន់ ខ្ញុំសង្កេតឃើញថា គាត់មានការរីកចម្រើនច្រើន តែគាត់ត្រូវប្រឹងប្រែងបន្ថែមទៀតដើម្បីឲ្យសមត្ថភាពកាន់តែល្អប្រសើរ»។ លោក Pep Muñoz បានសង្កត់ធ្ងន់។

ជាមួយគ្នានេះ កីឡាករ Nick Taylor បាននិយាយថា ការប្រកួតលីគកំពូលកម្ពុជាល្អប្រសើរ ជាពិសេសនៅជើងទី២កាន់តែមានការប្រកួតប្រជែងខ្លាំងសម្រាប់ក្រុមនីមួយៗ។ កីឡាករប្រាប់ថា ៖«វាកាន់តែមានការប្រកួតប្រជែងខ្លាំង។ ពួកយើងត្រូវតែខិតខំប្រឹងប្រែងដើម្បីរក្សាទម្រង់លេងឲ្យនៅតែល្អ។ យើងសហការគ្នាបានល្អ ហើយស្រេកឃ្លានជ័យជម្នះរាល់ចុងសប្តាហ៍។ ខ្ញុំមានអារម្មណ៍ជឿជាក់លើមិត្តរួមក្រុម។ ខ្ញុំសប្បាយចិត្តដែលក្រុមយើងចាប់ផ្តើមបានល្អក្នុងលីគ។ លីគកំពូលកម្ពុជាខ្លាំងនៅឆ្នាំនេះ»។

ការស្នាក់នៅ និងប្រកបអាជីពបាល់ទាត់នៅកម្ពុជា កីឡាករ Nick Taylor មានអារម្មណ៍កក់ក្ដៅប្រៀបដូចជាផ្ទះរបស់ខ្លួនដែលមានឪពុកម្តាយ និងបងប្អូនបង្កើត ខណៈរូបគេក៏ជាតារាបាល់ទាត់ម្នាក់ដែលទទួលបានការផ្សាយពាណិជ្ជកម្មច្រើន។

មុនពេលផ្លាស់មកក្លិបព្រះខ័នរាជស្វាយរៀងក្នុងចុងឆ្នាំ២០២២ កីឡាករ Nick Taylor បានលេងឲ្យក្រុម Olando City B បង្ហាញខ្លួនបាន ២២ ប្រកួត ស៊ុតបញ្ចូលទី១គ្រាប់ ក្នុងនាមជាខ្សែបម្រើស្លាប៕