កីឡា

ត្រឹមតែ១ឆ្នាំ តម្លៃផ្ទេរកីឡាករជប៉ុន Kubo កើនឡើងជិត១០ដង

បានផុស

១ year មុន

នៅ

ថ្ងៃព្រហស្បតិ៍ ១៦ វិច្ឆិកា ២០២៣

ដោយ

ខ្សែបម្រើប្រយុទ្ធជប៉ុនកីឡាករ Takefusa Kubo វ័យ២២ឆ្នាំ ធ្វើបានយ៉ាងល្អក្រោយពីផ្លាស់ទៅកាន់ក្លិប Real Sociedad ដែលជាហេតុធ្វើឲ្យតម្លៃក្នុងការផ្ទេររបស់ខ្លួនកើនឡើងជិត១០ដងនាចុងឆ្នាំ២០២៣ បើប្រៀបធៀបនឹងឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឆ្នាំ២០២២ កីឡាករ Kubo បានផ្លាស់ទៅកាន់ក្លិប Real Sociedad ក្នុងតម្លៃត្រឹមតែ៦លានអឺរ៉ូប៉ុណ្ណោះ ក្រោយមិនអាចប្រជែងរកតំណាងលេងបានក្នុងក្លិប Real Madrid។ ទោះជាយ៉ាងណា រយៈពេលប្រហែលជា១ឆ្នាំចុងក្រោយនេះ តម្លៃក្នុងការផ្ទេររបស់កីឡាករជប៉ុនរូបនេះឡើងរហូតដល់៥០លានអឺរ៉ូ។ នេះបើយោងតាមការចេញផ្សាយរបស់គេហទំព័រ Transfermarkt ក្រោយពីរូបគេធ្វើបានយ៉ាងល្អនៅក្លិប Real Sociedad ក្នុងឆ្នាំ២០២៣។ សម្រាប់ទីផ្សារដោះដូរនៅពេលខាងមុខកីឡាករ Kubo អាចនឹងក្លាយជាគោលដៅរបស់ក្លិបធំៗនៅតំបន់អឺរ៉ុប។

កីឡាករ Kubo បង្ហាញខ្លួនឲ្យ Real Sociedad បាន៤៧ប្រកួត ស៊ុតបញ្ចូលទី១៤គ្រាប់។ ក្នុងរដូវកាលនេះរូបគេជាសមាជិកសំខាន់ក្នុងក្រុមជួយឲ្យក្លិប Real Sociedad ធ្វើបានល្អក្នុងពានរង្វាន់ UEFA Champion League ដោយកំពុងឈរលេខ១ ក្នុងពូល ដោយប្រកួត៤លើក ឈ្នះ៣ ស្មើ១ មាន១០ពិន្ទុ។ ចំណែកក្នុងពានរង្វាន់ Laliga ក្លិប Real Sociedad កំពុងឈរនៅលេខ៦ ដោយប្រកួត១៣លើក ឈ្នះ៦ ស្មើ៤ ចាញ់៣ មាន២២ពិន្ទុ។

Kubo បានផ្លាស់មកកាន់ទឹកដីប្រទេសអេស្ប៉ាញដំបូងនៅក្នុងឆ្នាំ២០១១ ដោយរូបគេចូលរួមជាក្លិបយុវជនរបស់ FC Barcelona។ ឆ្នាំ២០១៦ កីឡាករបានផ្លាស់ទៅលេងនៅទឹកដីកំណើតខ្លួនឯងវិញដោយលេងឲ្យក្លិប FC Tokyo។ ឆ្នាំ២០១៩ Real Madrid បានយករូបគេមកចូលរួមក្រុម ប៉ុន្តែខ្សែបម្រើប្រយុទ្ធជនជាតិជប៉ុនរូបនេះមិនបានបង្ហាញខ្លួនជាមួយក្រុមធំទេ ហើយត្រូវដាក់ឲ្យខ្ចីជើងទៅក្លិប Mallorca, Villarreal និង Getafe មុនពេលផ្ទេរទៅ Real Sociedad៕