កីឡា

អ្នកឧកញ៉ាម្នាក់ប្រកាសជូនមាសសុទ្ធ២គីឡូ បើក្រុមបាល់ទះកម្ពុជាឈ្នះមេដាយមាសស៊ីហ្គេម

បានផុស

១ year មុន

នៅ

ថ្ងៃពុធ ៦ ធ្នូ ២០២៣

ដោយ

អ្នកឧកញ៉ា លាង ម៉េង សេដ្ឋីស្រុកខ្មែរមួយរូបបានប្រកាសផ្តល់មាសសុទ្ធទម្ងន់២គីឡូក្រាម ប្រសិនបើក្រុមបាល់ទះជម្រើសជាតិកម្ពុជាទទួលបានមេដាយមាសពីព្រឹត្តិការណ៍កីឡាស៊ីហ្គេមនាពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសរបស់អ្នកឧកញ៉ា លាង ម៉េង បានធ្វើឡើងនៅពេលចូលរួមប្រកួតបាល់ទាត់មិត្តភាពសប្បុរសធម៌រវាងក្រុមបាល់ទាត់សសយកខេត្តព្រៃវែងជាមួយក្រុមបាល់ទាត់ផ្ការីកគ្រប់រដូវដើម្បីអបអរសាទរខួបលើកទី៤៥ ថ្ងៃកំណើតរបស់សហភាពសហព័ន្ធយុវជនកម្ពុជា កាលពីថ្ងៃទី១ ខែធ្នូ ឆ្នាំ២០២៣ នៅកីឡដ្ឋានខេត្តព្រៃវែង។

អ្នកឧកញ៉ា លាង ម៉េង ដែលបានចូលរួមលេងបាល់ទាត់ក្នុងពេលនោះដែរមានប្រសាសន៍ថា ៖«ខ្ញុំពិតជាសប្បាយចិត្តមែនទែនឯកឧត្តមឧប (ឧបនាយករដ្ឋមន្ត្រី ស សុខា) ជាពិសេសឯកឧត្តម អាំង សិរីពិសិដ្ឋ អគ្គលេខាធិការបានអង្គុយគិតគូរជាមួយគ្នា ធ្វើយ៉ាងម៉េចរកវិធីឲ្យក្រុមបាល់ទះប្រកួតស៊ីហ្គេមទទួលបានមេដាយមាស។ ខ្ញុំចង់សុំឯកឧត្តមឧបទុកឲ្យហើយថា ប្រសិនបើប្រកួតស៊ីហ្គេម បានមេដាយមាស ខ្ញុំធ្វើមាស២គីឡូជូនតែម្តងឯកឧត្តមឧប។ សន្យាអត់? ធ្វើម៉េចឲ្យបានមេដាយមាស ពីព្រោះបានមេដាយមាសគឺមិនមែនដើម្បីតែសហព័ន្ធទេគឺផ្តល់កិត្តិយសដល់ប្រជាជន១៦លាននាក់»។

កាលពីចុងខែវិច្ឆិកាកន្លងទៅ អ្នកឧកញ៉ារូបនេះទើបតែបានផ្តល់ប្រាក់ឧបត្ថម្ភចំនួន៥០ម៉ឺនដុល្លារអាមេរិក ពោលគឺ១០ម៉ឺនដុល្លារអាមេរិកក្នុង១ឆ្នាំរយៈពេល៥ឆ្នាំដើម្បីអភិវឌ្ឍកីឡាបាល់ទះកម្ពុជាឆ្ពោះទៅរកការដណ្តើមមេដាយស៊ីហ្គេម និងការប្រកួតអន្តរជាតិនានា ជាពិសេសស៊ីហ្គេមបន្ទាប់នៅឆ្នាំ២០២៥ដែលប្រទេសថៃធ្វើម្ចាស់ផ្ទះ។

ក្រុមបាល់ទះជម្រើសជាតិកម្ពុជាបានបង្កើតកំណត់ត្រាប្រវត្តិសាស្ត្រជាលើកដំបូងក្នុងការឈ្នះមេដាយសំរិទ្ធកីឡាស៊ីហ្គេម ឆ្នាំ២០២១ នៅប្រទេសវៀតណាម និងបានបង្កើតកំណត់ត្រាមួយកម្រិតទៀតគឺឈ្នះមេដាយប្រាក់កីឡាស៊ីហ្គេម ឆ្នាំ២០២៣ ដែលកម្ពុជាធ្វើម្ចាស់ផ្ទះ។

កាលពីខែវិច្ឆិកា សហព័ន្ធកីឡាបាល់ទះកម្ពុជាទើបតែបានរៀបចំព្រឹត្តិការណ៍ពានរង្វាន់សម្តេចក្រឡាហោម ស ខេង ឆ្នាំ២០២៣ ហើយតាមការគ្រោងទុកនឹងរៀបចំការប្រកួតលីគបាល់ទះកំពូលកម្ពុជាហៅថា «តេជោលីគ»ជាលើកដំបូងនាពេលដ៏ខ្លីខាងមុខ៕