កីឡា

ផល សោភ័ណ្ឌ ប្រាប់គន្លឹះថែរក្សាខ្លួនធ្វើឲ្យភាពខ្លាំងនៅបានយូរអង្វែង

បានផុស

១២ ខែ មុន

នៅ

ថ្ងៃព្រហស្បតិ៍ ៧ ធ្នូ ២០២៣

ដោយ

ដំរីភ្លុកពិឃាដ ផល សោភ័ណ្ឌ នៅតែមានសមត្ថភាពខ្លាំងដូចកាលពីមុន បើទោះជាបានប្រឡូកក្នុងអាជីពឈឺខ្លួនប្រមាណជាង១០ឆ្នាំ និងមានអាយុកាន់តែច្រើនក៏ដោយ ខណៈកីឡាករមួយចំនួនដែលស្រករគ្នាបានធ្លាក់ចុះសមត្ថភាពយ៉ាងឆាប់រហ័ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចសម្ភាសជាមួយសារព័ត៌មាន«កម្ពុជាថ្មី» ផល សោភ័ណ្ឌ បានបង្ហើយប្រាប់ពីគន្លឹះខ្លះៗរបស់ខ្លួនដែលកំពុងអនុវត្តជាប្រចាំដែលបានធ្វើឲ្យសមត្ថភាពរបស់ខ្លួននៅខ្លាំងយូរអង្វែង។

ផល សោភ័ណ្ឌ បាននិយាយថា៖«ទីមួយខ្ញុំស្រឡាញ់គុនខ្មែរ។ ខ្ញុំមិនទាន់ចង់បោះបង់ចោលវាទេ ហើយអ្វីដែលខ្ញុំដាក់ចិត្តស្រឡាញ់ហើយខ្ញុំនឹងថែវា។ ខ្ញុំនៅស្រឡាញ់អាជីពមួយនេះ ដូច្នេះខ្ញុំត្រូវថែខ្លួន។ ទី២គឺខ្ញុំមិនសូវចូលចិត្តការផឹកស៊ីច្រើនទេ។ ខ្ញុំហូបចុកតែពេលមានកម្មវិធី ហើយកាលណាតែវ័យច្រើន អត់ព្យាយាមហ្វឹកហាត់ អត់ថែសុខភាព គ្មានរបបអាហារត្រឹមត្រូវទេគឺជារឿងមិនល្អ។ ទទួលស្គាល់ថា ខ្ញុំពីមុនមានកម្លាំងជាងឥឡូវ អាចថាពីមុនមានកម្លាំង១០០ភាគរយ តែឥឡូវនៅអស់ត្រឹម៨០ភាគរយ តែខ្ញុំនៅអាចប្រកួតបានដោយសារការថែទាំសុខភាពបានល្អ»។

កូនសិស្សរបស់ក្លិបតាឡីដំរីមានឬទ្ធីបានឲ្យដឹងថា អាជីពជាអ្នកប្រដាល់ ការថែរក្សាសុខភាពគឺជារឿងសំខាន់បំផុត។ បើនិយាយពីកីឡាករមួយចំនួនបច្ចុប្បន្នឆាប់ថយចុះសមត្ថភាព គឺដោយសារការធ្វេសប្រហែស។ ការមិនភ្លេចខ្លួនអំពីការថែទាំសុខភាព និងបង្កើនការហ្វឹកហាត់គឺជាកត្តាជួយធ្វើឲ្យភាពខ្លាំងនៅបានយូរ។

កីឡាករ ផល សោភ័ណ្ឌ បានអរគុណដល់គុនខ្មែរ ដែលជួយឲ្យខ្លួនមានឈ្មោះក្នុងក្របខណ្ឌនគរបាល និងមានលទ្ធភាពរកចំណូលដើម្បីមានជីវភាពរស់នៅក្នុងសង្គមសមរម្យ ហើយទទួលបានការគាំទ្រពីមហាជនច្រើន។ កីឡាករក៏បានផ្ដាំទៅប្អូនៗដែលស្រឡាញ់គុនខ្មែរជំនាន់ក្រោយថា បើស្រឡាញ់គុនខ្មែរគឺត្រូវតែស្រឡាញ់ពិតប្រាកដទើបទទួលបានជោគជ័យ។

សម្រាប់ការប្រឡូកអាជីពប្រដាល់ប្រមាណ១០ឆ្នាំចុងក្រោយនេះ ផល សោភ័ណ្ឌ មានខ្សែក្រវាត់៧គ្រឿង ខណៈពេលដ៏ខ្លីខាងមុខ រូបគេទទួលបានឱកាសប្រកួតកម្មវិធីធំដែលមានរង្វាន់រថយន្តពីប៊ូសស្ត្រង៕