លោកពូទីន ព្រមាន IOC អាច “កប់ចលនាអូឡាំពិក” ក្រោយដាក់ច្បាប់កំហិតលើអត្តពលិករុស្ស៊ី

ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃព្រហស្បតិ៍ បានចោទប្រកាន់គណៈកម្មាធិការអូឡាំពិកអន្តរជាតិ (IOC) ពី​ការ​បង្កគ្រោះថ្នាក់ដល់ចលនាអូឡាំពិក ដោយការដាក់ច្បាប់លើអត្តពលិករុស្ស៊ី សម្រាប់ការប្រកួតកីឡាអូឡាំពិក​រដូវក្តៅ នៅទីក្រុងប៉ារីស ប្រទេស​បារាំង​ ឆ្នាំ២០២៤។

កាលពីដើមខែនេះ IOC បានសម្រេចថា អត្តពលិករុស្ស៊ី និងបេឡារុស្ស អាចចូល​រួម​ប្រកួត​បាន​នៅប្រទេសបារាំង​ក្នុងនាម​អព្យាក្រឹត លុះត្រាតែពួកគេប្រឆាំងការវាយលុករបស់ទីក្រុងម៉ូស្គូ លើអ៊ុយក្រែន។

លោកពូទីនបាននិយាយថា ៖«ប្រសិនបើពួកគេបន្តធ្វើសកម្មភាពតាមរបៀបនេះ ពួកគេនឹងកប់ចលនាអូឡាំពិក»។ លោកមិនបានផ្តល់ចម្លើយច្បាស់លាស់ថាតើអត្តពលិករុស្ស៊ីគួរទៅទីក្រុងប៉ារីសឬអត់​ទេ ប៉ុន្តែ​លោក​​បាន​លើក​ឡើង​ថា «ទៅឬមិនទៅ?…លក្ខខណ្ឌត្រូវតែវិភាគឱ្យបានលំអិត»។

លោកបានបន្ថែមថា ៖«ប្រសិនបើពួកគេត្រូវបានជម្រុញ​ដោយ​នយោបាយ លក្ខខណ្ឌសិប្បនិម្មិតដែលមានគោលបំណងកាត់ផ្តាច់អ្នកដឹកនាំ (នយោបាយ) របស់យើង… និងធ្វើឱ្យក្រុមរបស់យើងចុះខ្សោយ។ នោះក្រសួងកីឡា និងគណៈកម្មាធិការអូឡាំពិករុស្ស៊ី គួរតែធ្វើការសម្រេចចិត្តប្រកបដោយការយល់ដឹង»។

លោកបានចោទមន្ត្រីកីឡា​ពី​ការ​ប្រព្រឹត្តក្រោមសម្ពាធ​លោកខាងលិច។ នេះបើតាមការរាយការណ៍របស់ AFP៕

ប្រែសម្រួល៖ មន្នីរ័ត្ន
ប្រភព៖ Inside The Games