កីឡា

នារីបារាំងដ៏ស្រស់ស្អាត Ava Ruiz ហាត់ល្បុក្កតោដើម្បីស្គាល់វប្បធម៌ខ្មែរ

បានផុស

១១ ខែ មុន

នៅ

ថ្ងៃពុធ ២០ ធ្នូ ២០២៣

ដោយ

នារីជនជាតិបារាំងដ៏ស្រស់ស្អាតឈ្មោះ Ava Ruiz បានហ្វឹកហាត់គុនល្បុក្កតោរយៈពេលជាង២ខែហើយជាមួយមិត្តរួមការងារនៅគ្លីនិកមួយជាកន្លែងដែលនាងធ្វើការនៅក្នុងប្រទេសកម្ពុជាដែលមានកីឡាករ ចាន់ រតនា ជាគ្រូបង្វឹក។

កញ្ញា Ava Ruiz បានឲ្យដឹងថា កញ្ញាបានឃើញការសម្តែងក្បាច់គុនល្បុក្កតោតាម Facebook ហើយក៏មានអារម្មណ៍ចង់ស្គាល់កាន់តែច្រើន។ អ្វីដែលជាសំណាងទៀតនោះ ប្រធានគ្លីនិករបស់នាងបានស្គាល់កីឡាករ ចាន់ រតនា ដែលបាននាំបុគ្គលិកហាត់ក្បាច់គុនល្បុក្កតោទាំងអស់គ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីយប់ថ្ងៃទី១៥ ខែធ្នូ ឆ្នាំ២០២៣ កញ្ញា Ava Ruiz បានទៅមើលការប្រកួតគុនល្បុក្កតោ«អ្នកលេងគុន»។ កញ្ញាបាននិយាយថា ៖«នេះជាលើកទី១ដែលខ្ញុំបានមើលការប្រកួតគុនល្បុក្កតោផ្ទាល់ភ្នែក។ កីឡាករចុងក្រោយជាគ្រូបង្វឹករបស់ខ្ញុំ។ ខ្ញុំពិតជាចាប់អារម្មណ៍ខ្លាំងណាស់។ ជាអ្នកហ្វឹកហាត់ដំបូងៗ ពេលបានឃើញផ្ទាល់អីចឹង ខ្ញុំពិតជារីករាយចំពោះការប្រកួតកម្រិតខ្ពស់។ ជាការប្រកួតដ៏ល្អ កីឡាករទាំងអស់ប្រកួតគួរឲ្យចាប់អារម្មណ៍»។

នារីបារាំងរូបនេះបានប្រាប់ថា លោកគ្រូ ចាន់ រតនា បានសួរថាតើចង់ប្រកួតល្បុក្កតោទេ កញ្ញាមិនចាប់អារម្មណ៍នឹងការប្រកួតទេ ប៉ុន្តែការហ្វឹកហាត់របស់នាងមានគោលដៅសំខាន់ដើម្បីសុខភាព ភាពសប្បាយរីករាយ និងដើម្បីស្វែងយល់ពីក្បាច់គុនបុរាណខ្មែរ។

កញ្ញា Ava Ruiz បាននិយាយថា ៖«ការហ្វឹកហាត់គឺដើម្បីសុខភាព ដើម្បីភាពសប្បាយរីករាយ និងដើម្បីស្វែងយល់ពីវប្បធម៌ខ្មែរ។ នេះជាគោលដៅសំខាន់ដែលខ្ញុំបានហ្វឹកហាត់ល្បុក្កតោ។ មិត្តរួមការងាររបស់ខ្ញុំប្រហែល១៥នាក់បានហ្វឹកហាត់ល្បុក្កតោជាមួយគ្នា»។

នារីបារាំងរូបនេះបន្តឲ្យដឹងថា ការហ្វឹកហាត់រយៈពេល២ខែកន្លងទៅ ពិបាកខ្លាំងដែរពីដំបូង ប៉ុន្តែក្រោយមកមានអារម្មណ៍មិនមានអ្វីពិបាកទេ។ ផ្ទុយទៅវិញកញ្ញាចូលចិត្ត និងបានក្លាយជាពេលវេលាដ៏ល្អជាមួយមិត្តរួមការងារ និងគ្រូបង្វឹក។

រហូតដល់ពេលនេះ Ava Ruiz បានស្នាក់នៅ និងធ្វើការក្នុងប្រទេសកម្ពុជារយៈពេល២ឆ្នាំហើយ។ កញ្ញាបានប្រាប់ថា ៖«ខ្ញុំចូលចិត្តរស់នៅប្រទេសកម្ពុជា ជាពិសេសពីវប្បធម៌ ប៉ុន្តែអាកាសធាតុក្តៅជាងនៅបារាំង តែខ្ញុំអាចទ្រាំទ្របាន»។

នៅពេលសួរថា តើអ្វីដែលកញ្ញាពេញចិត្តបំផុតនៅកម្ពុជា? កញ្ញាបានឆ្លើយតបថា ៖«វ៉ូវ! នេះជារឿងពិបាកមួយ ខ្ញុំអាចនិយាយបានថា ប្រជាជនខ្មែរមានភាពកក់ក្តៅ។ រាល់ពេលខ្ញុំជួប ពួកគាត់តែងតែញញឹមដាក់ខ្ញុំជានិច្ច។ នេះជាអ្វីដែលខ្ញុំចូលចិត្តបំផុតនៅកម្ពុជា»៕

អត្ថបទ៖ វីរបុត្រ