Pep Guardiola និយាយពីអនាគតរបស់ខ្លួនជាមួយ Man City និង​ជម្រើសអេស្ប៉ាញ

អ្នកចាត់ការក្រុម Manchester City លោក Pep Guardiola មិនទាន់អាចកំណត់បានទេក្នុងការទៅដឹកនាំក្រុមជម្រើសជាតិអេស្ប៉ាញនាពេលអនាគត ខណៈកុងត្រារបស់​លោកជាមួយក្រុមមេឃខៀវសល់មួយឆ្នាំទៀត។

លោក Pep Guardiola កាន់តែខិតជិតដល់ឆ្នាំចុងក្រោយនៃកិច្ចព្រមព្រៀងនៅកីឡដ្ឋាន Etihad បន្ទាប់ពីជួយ​ Man City ឈ្នះពានរង្វាន់ UEFA Champions League ជាលើកដំបូងក្នុងប្រវត្តិសាស្ត្រ។ ឥឡូវនេះ លោក​​បានឈាន​ដល់វគ្គផ្តាច់ព្រ័ត្រ FIFA Club World Cup បន្ទាប់ពីឈ្នះពានរង្វាន់ UEFA Super Cup ។

មានសំណួរថ្មីៗ​ជា​ច្រើន​បានចោទសួរ​លោក Pep Guardiola អំពីលទ្ធភាពនៃ​ការទៅដឹកនាំក្រុមជម្រើសជាតិអេស្ប៉ាញ។ លោក Guardiola បាន​ឆ្លើយ​តប​ថា៖«ខ្ញុំពិតជារីករាយណាស់ដែលបាននៅទីនេះជាមួយក្លិប។ ខ្ញុំពិត​ជា​សប្បាយ​ចិត្ត។ ខ្ញុំ​នៅ​សល់​កុងត្រាមួយ​ឆ្នាំ​ទៀត។ សង្ឃឹម​ថា​ គេ​មិន​បញ្ចប់តួនាទីខ្ញុំ​ចុះ ហើយ​ខ្ញុំ​អាច​នៅ​ទី​នេះ បន្ត​ពេល​វេលា​ល្អៗ​ជាមួយ​ក្លិប​ទៀត»។

ថ្មីៗនេះ​មាន​ការ​ប៉ាន់ស្មានថា Manchester City ប្រហែល​ជា​រៀបចំ​ពីអនាគតគ្រូបង្វឹកថ្មីក្នុងការចូលមកដឹកនាំ ដោយក្លិបអាចនឹងបង្កើតការគោរពមួយដល់លោក Pep Guardiola ក្នុងការបញ្ចប់ភារកិច្ច ក្រោយចំណាយ​ពេល​ច្រើនឆ្នាំ និង​បាន​បង្កើតសមិទ្ធផលជោគជ័យ​ជា​ច្រើន​ឲ្យ​ក្លិប។ តាមប្រភព​ជិតស្និទ្ធ​បានរាយការណ៍ថា នាយក​ប្រតិបត្តិ​ផ្នែកកីឡា លោក Txiki Begiristain ក៏ទំនង​លាលែងពីតំណែងដែរ នៅពេល​មិត្តរួមការងារ​ដ៏​​ជិតស្និទ្ធរបស់​លោក គឺ​អ្នក​ចាត់​ការ​ Pep ត្រូវបានបញ្ចប់តួនាទីជា​មួយ​ Man City។

អនាគតរបស់ Pep Guardiola ក្នុងការទៅដឹកនាំក្រុមជម្រើសជាតិអេស្ប៉ាញនៅតែមិនទាន់អាចកំណត់បានទេ ដោយ​សារ​លោកនៅសល់ក្នុងត្រាជាមួយ​ Manchester City៕

ប្រែសម្រួល៖ ផា រតនា
ប្រភព៖ onefootball