កីឡា

សហព័ន្ធបាល់ទាត់រុស្ស៊ីបោះឆ្នោតប្រឆាំងការមកជ្រកក្រោមដំបូលអាស៊ី AFC

បានផុស

៩ ខែ មុន

នៅ

ថ្ងៃសុក្រ ២២ ធ្នូ ២០២៣

ដោយ

កាលពីថ្ងៃទី២០ ខែធ្នូ សហភាពកីឡាបាល់ទាត់រុស្ស៊ី (RFS) បានបោះឆ្នោតប្រឆាំងនឹងការចាកចេញពីសហព័ន្ធបាល់ទាត់ទ្វីបអឺរ៉ុប (UEFA) ទោះបីជាត្រូវបានហាមឃាត់មិនឱ្យចូលរួមប្រកួតដោយសារតែសង្រ្គាមជាមួយអ៊ុយក្រែនក៏ដោយ។ ជាលទ្ធផលការចូលរួមជាមួយសហព័ន្ធកីឡាបាល់ទាត់អាស៊ី (AFC) ត្រូវបានច្រានចោល។

ទោះបីជាមានការជជែកដេញដោលកាលពីខែមុនអំពីការចាកចេញពី UEFA ទៅចូលរួមជាមួយ AFC ក៏ដោយ ប៉ុន្តែនៅទីបញ្ចប់បន្តនៅជាមួយ UEFA ទោះបីជាមានការដាក់ទណ្ឌកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដូចឆ្នាំមុនដែរ រុស្ស៊ីបានសម្រេចចិត្តបន្តនៅជាមួយ UEFA។ អនុប្រធានសហព័ន្ធកីឡាបាល់ទាត់រុស្ស៊ី លោក Akhmed Aydamirov ត្រូវបានស្រង់សម្តីដោយទីភ្នាក់ងារសារព័ត៌មានរដ្ឋ TASS ថា ៖«យើងនឹងប្រយុទ្ធដើម្បីអឺរ៉ុប។ រុស្ស៊ីគឺជាអឺរ៉ុប។ យើងនឹងឈ្នះ»។

លោកបានបន្ថែមថា ៖«យើងបានសម្រេចចិត្តមិនចាកចេញពីអឺរ៉ុប ទៅចូលរួមទ្វីបអាស៊ីនោះទេ។ អ្នករាល់គ្នាបានគាំទ្រជាឯកច្ឆន្ទចំពោះការសម្រេចចិត្តនេះ»។

ប្រទេសរុស្ស៊ីត្រូវបានហាមឃាត់ចូលរួមក្នុងការប្រកួតដែលរៀបចំដោយ UEFA ចាប់តាំងពីត្រូវបានដាក់ទណ្ឌកម្មរយៈពេល៤ថ្ងៃបន្ទាប់ពីមានសង្គ្រាមជាមួយអ៊ុយក្រែនកាលពីខែកុម្ភៈ ឆ្នាំ២០២២។

ប្រទេសរុស្សី មានផ្ទៃដី៧៥ភាគរយនៅក្នុងទ្វីបអាស៊ី ទោះបីជាប្រវត្តិសាស្ត្រ ជាផ្នែកមួយនៃទ្វីបអឺរ៉ុបដោយមានរាជធានី និងទីក្រុងសំខាន់ៗនៅអឺរ៉ុប។ មានន័យថាប្រទេសនេះតែងតែលេងក្រោមស្លាកសហភាពអឺរ៉ុប ឬសមាគមអឺរ៉ុប។

ប្រសិនបើសហព័ន្ធកីឡាបាល់ទាត់រុស្ស៊ី (RFS) បានសម្រេចចិត្តចាកចេញពី UEFA ហើយចូលរួមជាមួយ AFC នោះ វានឹងអាចត្រឡប់ទៅការប្រកួតវិញ ប៉ុន្តែក្នុងកម្រិតកីឡាទាប និងកម្រិតសេដ្ឋកិច្ចទាបជាងខ្លាំង។ ដោយសារក្លិបរុស្ស៊ីត្រូវបោះបង់ចោលប្រាក់ចំណូលដ៏ច្រើន មិនមែនដើម្បីកិត្យានុភាពកើតចេញពីការចូលរួមក្នុងការប្រកួតនៅអឺរ៉ុប ដូចជា Champions League ជាដើម។

ជាងនេះទៅទៀត មិនមានការធានាថា FIFA នឹងទទួលយកប្រទេសដ៏ធំបំផុតរបស់ពិភពលោកដែលផ្លាស់ប្តូរពីអឺរ៉ុបមកអាស៊ីនោះទេ ហើយនៅក្នុងស្ថានភាពបច្ចុប្បន្ន វាជាការប្រសើរក្នុងការរង់ចាំមួយរយៈដើម្បីព្យាយាមដោះស្រាយស្ថានការណ៍៕

ប្រែសម្រួល៖ មន្នីរ័ត្ន
ប្រភព៖ Reuters