កីឡា

ក្លិបធំៗចំនួន១២នៅអឺរ៉ុបបដិសេធចូលរួមប្រកួតពានថ្មី Super League

បានផុស

១ year មុន

នៅ

ថ្ងៃអង្គារ ២៦ ធ្នូ ២០២៣

ដោយ

ក្លិបធំៗមួយចំនួន១២ នៅតំបន់អឺរ៉ុបបានប្រកាសពីគោលជំហររបស់ខ្លួនដោយប្រឆាំងការចូលរួមប្រកួតប្រជែងក្នុងពានរង្វាន់ថ្មី European Super League បន្ទាប់ពីគម្រោងនេះត្រូវបានដាក់ឲ្យដំណើរកាលជាផ្លូវការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តុលាការយុត្តិធម៌អឺរ៉ុបបានសម្រេចកាលពីថ្ងៃព្រហស្បតិ៍ ពីការចោទប្រកាន់របស់សហព័ន្ធកីឡាបាល់ទាត់ទ្វីបអឺរ៉ុប (UEFA) និងសហព័ន្ធកីឡាបាល់ទាត់ពិភពលោក (FIFA) ក្នុងការហាមកីឡាករ និងក្លិបនៅអឺរ៉ុប ប្រសិនបើពួកគេយល់ព្រមចូលរួមជាមួយ Super League ជារឿងផ្ទុយនឹងច្បាប់។ តាមរយៈសេចក្ដីសម្រេចរបស់តុលាការយុត្តិធម៌អឺរ៉ុប មានន័យថា ស្ថាប័ន UEFA និង FIFA មិនអាចរារាំង ឬបញ្ឍប់ការបង្កើតពានរង្វាន់ថ្មីនេះបានទេ។

ទោះជាយ៉ាងណាក៏ដោយ រហូតដល់ពេលនេះ មានក្លិប២ប៉ុណ្ណោះនៅបន្តគាំទ្រពាន Super League គឺ Barcelona និង Real Madrid របស់អេស្ប៉ាញ។ ផ្ទុយទៅវិញ ក្លិបធំចំនួន១២នៅទ្វីបអឺរ៉ុបបានប្រកាសពីគោលជំហររបស់ខ្លួននៅតែបន្តគាំទ្រ UEFA។

ក្លិប Manchester United បានប្រកាសជាផ្លូវការពីការមិនចូលរូមពាន Super League ដោយបានបញ្ជាក់ថា៖«ជំហររបស់យើងមិនផ្លាស់ប្តូរទេ។ យើងនៅតែប្តេជ្ញាពេញទំហឹងក្នុងការចូលរួមជាមួយ UEFA និងកិច្ចសហប្រតិបត្តិការវិជ្ជមានជាមួយ UEFA, Premier League និងក្លិបផ្សេងទៀតតាមរយៈ ECA លើការអភិវឌ្ឍបន្តនៅអឺរ៉ុប»។

ចំណែក ក្លិប Manchester City បានប្រកាសជាផ្លូវការថា ៖«Manchester City បានបញ្ជាក់កាលពីឆ្នាំ២០២១ ថា ខ្លួនបានអនុម័តជាផ្លូវការពីការដកខ្លួនចេញពី European Super League។ គោលជំហររបស់យើងមិនផ្លាស់ប្តូរទេ។ យើងនៅតែប្តេជ្ញាចិត្តចំពោះតម្លៃបាល់ទាត់អឺរ៉ុប។ យើងនឹងបន្តធ្វើការជាមួយក្លិបផ្សេងទៀតតាមរយៈ ECA និងចូលរួមក្នុងការប្រកួតពានរបស់ UEFA»។

ក្លិប Tottenham Hotspur ប្រកាសជាផ្លូវការ កាលពីថ្ងៃព្រហស្បតិ៍ ទី២១ ខែធ្នូ ដោយបានសង្កត់ធ្ងន់ថា ៖«យើងបញ្ជាក់ពីជំហររបស់យើងមិនផ្លាស់ប្តូរទេ។ យើងនៅតែប្តេជ្ញាចិត្តចំពោះតម្លៃបាល់ទាត់អឺរ៉ុប។ យើងនឹងបន្តធ្វើការជាមួយក្លិបរួមគ្នាតាមរយៈ ECA និងចូលរួមក្នុងការប្រកួតប្រជែង UEFA»។

ក្លិប Chelsea មិនផ្លាស់ប្តូរជំហររបស់ពួកគេដែរតាមរយៈខ្លឹមសារថា ៖«យើងជឿជាក់យ៉ាងមុតមាំដោយធ្វើការជាមួយ Premier League, FA, ក្លិបអឺរ៉ុបផ្សេងទៀត។ តាមរយៈទំនាក់ទំនងដ៏រឹងមាំរបស់យើងជាមួយ ECA និងជាមួយ UEFA និង FIFA។ យើងអាចរួមគ្នាបន្តអភិវឌ្ឍហ្គេមអឺរ៉ុបដើម្បីជាប្រយោជន៍ដល់អ្នករាល់គ្នា»។

ក្លិប Arsenal បានចេញសេចក្ដីប្រកាសថា ៖«Arsenal នៅតែប្រកាន់គោលជំហរមិនមានការផ្លាស់ប្តូរទេ។ យើងនឹងបន្តលេងក្នុងការប្រកួត UEFA ហើយបន្តធ្វើការជាមួយក្លិបនៅអឺរ៉ុប និងសមាគមក្លឹបអឺរ៉ុប (ECA)»។

ក្លិប Liverpool បានចេញសេចក្តីប្រកាសថា ៖«Liverpool នៅតែមិនចូលរួមក្នុងពាន European Super League។ យើងនឹងបន្តធ្វើការជាមួយក្លិបផ្សេងទៀតតាមរយៈ ECA និងចូលរួមក្នុងការប្រកួត UEFA»។

ក្រៅពីក្លិបធំៗនៅអង់គ្លេសប្រកាសមិនចូលរួមពាន Super League ក្លិបធំនៅអឺរ៉ុបផ្សេងទៀតមាន Bayern Munich, Atletico Madrid, Borussia Dortmund, Roma, PSG និង Inter Milan សុទ្ធតែបានប្រកាសពីការមិនចូលរួមក្នុងពានរង្វាន់ថ្មីនោះដែរ៕

ប្រែសម្រួល៖ ផា រតនា
ប្រភព៖ 90min