កីឡា

លន បញ្ញា ទទួលបានជោគជ័យខ្លាំងក្នុងអាជីពគុនខ្មែរជាង៧ឆ្នាំ

បានផុស

១១ ខែ មុន

នៅ

ថ្ងៃសុក្រ ២៩ ធ្នូ ២០២៣

ដោយ

អ្នកលេងគុនខ្មែរ លន បញ្ញា បានប្រឡូកក្នុងអាជីពប្រដាល់អស់រយៈពេល៧ឆ្នាំហើយគិតត្រឹមឆ្នាំ២០២៣ដោយទទួលបានជោគជ័យគួរជាទីគាប់ប្រសើរទាំងសមិទ្ធផលជូនជាតិ និងផ្ទាល់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករដែលមានដើមកំណើតមកពីខេត្តព្រៃវែង លន បញ្ញា ត្រូវបានចាត់ទុកជាកីឡាករដែលជោគជ័យមួយរូបក្នុងវិស័យគុនខ្មែរនាពេលបច្ចុប្បន្ន។ រូបគេបានឈ្នះមេដាយមាសកីឡាស៊ីហ្គេម ឆ្នាំ២០២៣ និងឈ្នះមេដាយប្រាក់ស៊ីហ្គេម ឆ្នាំ២០២១ នៅប្រទេសវៀតណាមដែលនេះជាសមិទ្ធផលជូនជាតិ។ កាលពីពេលថ្មីៗនេះ រូបគេទទួលបានរង្វាន់រថយន្តថ្មីសន្លាង១គ្រឿង ក្រោយផ្ដួលកីឡាករ មឿន សុខហ៊ុច ក្នុងទឹកទី២ នៅវគ្គផ្ដាច់ព័្រត្រ ហើយជាម្ចាស់ខ្សែក្រវាត់៤គ្រឿង ព្រមទាំងប្រកួតគុនខ្មែរមិនដែលចាញ់សោះក្នុងរយៈពេលប្រមាណ៣ឆ្នាំចុងក្រោយ។

តាមរយៈសមិទ្ធផលក្នុងកាឈ្នះមេដាយជូនជាតិ ការឈ្នះរង្វាន់រថយន្ត និងខ្សែក្រវាត់៤គ្រឿង អាចនិយាយបានថា លន បញ្ញា ស័ក្តិសមជាអ្នកប្រដាល់មួយរូបដែលទទួលបានជោគជ័យបំផុតក្នុងឆ្នាំ២០២៣។

ក្នុងអាជីពគុនខ្មែរជាង៧ឆ្នាំ កីឡាករ លន បញ្ញា បានពុះពារជំនះគ្រប់ឧបសគ្គដើម្បីសម្រេចគោលដៅរបស់ខ្លួន ដែលមានក្តីស្រមៃចង់មានរថយន្តមួយជិះជូនអ្នកម្ដាយដើរលេង។ ជីវភាពបច្ចុប្បន្នរបស់អ្នកប្រដាល់មកពីខេត្តព្រៃវែងម្នាក់នេះហាក់ល្អប្រសើរ ស្របពេលរូបគេកំពុងមានទីផ្សារខ្លាំង៕

អត្ថបទ៖ ផា រតនា