កើតក្នុងគ្រួសារក្រីក្រ Gabriel Jesus តស៊ូរហូតទទួលបានជោគជ័យក្នុងអាជីព

Gabriel Jesus កើត​នៅ​​​សង្កាត់ Jardim Peri ទី​ក្រុង São Paulo ប្រទេស​ប្រេស៊ីល ក្នុងគ្រួសារក្រីក្រ​ដែល​ មានបងប្អូនប្រុស២នាក់។ ម្តាយរបស់គេ​គឺ​អ្នកស្រី Vera ជាស្រ្តីមេម៉ាយ។ រូប​គេ​បាន​ផ្តើមចេញពីក្មេងលេងបាល់​តាមផ្លូវ បន្ទាប់មក​លេង​​ឲ្យ​ក្រុម​ស្ម័គ្រចិត្តក្នុងតំបន់ មុនពេលផ្លាស់ទៅក្រុមក្នុងតំបន់ Associação Atlética Anhanguera។

នៅថ្ងៃទី១ ខែកក្កដា ឆ្នាំ២០១៣ Jesus បានចុះកិច្ចសន្យា​ជាមួយ​ក្រុម​យុវជន​ Palmeiras។ គាត់​ជាកីឡាកររកគ្រាប់បាល់បានច្រើនជាងគេរបស់​ក្រុម​ក្នុងឆ្នាំនោះ ដោយស៊ុត​​បាន៥៤គ្រាប់ ក្នុងការបង្ហាញខ្លួន៤៨​លើក​។ នៅ​ឆ្នាំ​២០១៥ រូប​គេ​បានចូលរួមជាក្រុម​ធំ Palmeiras ជាកន្លែងដែល​ត្រូវបានបោះឆ្នោតជ្រើសរើសជាកីឡាករចំណូលថ្មីល្អបំផុតនៅលីគកំពូលក្នុងប្រេស៊ីល និងជួយ​ឲ្យក្លិបឈ្នះ​ជើង​ឯក​ Copa do Brasil។ ឆ្នាំ២០១៦ រូបគេជួយ​ក្រុម Palmeiras ឈ្នះ​ជើង​ឯក​លីគ​កំពូល​ប្រេស៊ីល​ជាលើកដំបូង ក្រោយខកខាន​អស់រយៈពេល២២ឆ្នាំ។

Jesus បានចុះហត្ថលេខាចូល​រួម​ជាមួយក្លិបអង់គ្លេស Manchester City នៅខែមករា ឆ្នាំ២០១៧ ដោយ​មាន​តម្លៃ​​​ផ្ទេរ​​២៧លានផោន។ នៅ​​ក្លិប​អង់គ្លេស កីឡាករ​ប្រេស៊ីល​​រូប​នេះ​​បានឈ្នះ​ជើង​ឯក​លីគ​កំពូល​ Premier League ចំនួន៤លើក, League Cup ចំនួន៣លើក និងFA Cup ចំនួន១លើក។ នៅខែកក្កដា ឆ្នាំ២០២២ រូប​គេ​បាន​ផ្លាស់​ទៅ​ក្លិប​កាំភ្លើង​ធំ​ Arsenal ក្នុង​តម្លៃ​ផ្ទេរ​៤៥លានផោន។

ឆ្នាំ២០២៣ ទ្រព្យសម្បត្តិរបស់ Jesus ​មាន​ប្រមាណ​​៣០លានដុល្លារ។ កិច្ចសន្យាបច្ចុប្បន្នរបស់​កីឡាករ​នៅកីឡដ្ឋាន Emirates រហូត​ដល់​ឆ្នាំ២០២៧។ ខ្សែប្រយុទ្ធរូបនេះ​ទទួលបាន​តម្លៃ​ពលកម្ម​​​ ២៦៥,០០០ ផោនក្នុងមួយសប្តាហ៍ ​ស្មើនឹង ១៣,៧៨០,០០០ ផោនក្នុងមួយឆ្នាំ ព្រម​ទាំង​មាន​ដៃគូសហការ​ជា​មួយ​ក្រុមហ៊ុន​​ Adidas ផងដែរ។

Gabriel Jesus បានមកប្រទេសអង់គ្លេសជាមួយម្តាយ និងបងប្រុសរបស់​ខ្លួន​ រួម​នឹងមិត្តភក្តិ​២​នាក់ទៀត។ កើតក្នុងត្រកូល​ដែលគោរព​សាសនាគ្រីស្ទ រូប​គេ​ពិតជាគោរពនិងឲ្យតម្លៃសាសនាណាស់។ នៅពេលផ្ទេរមកកាន់ក្លិបមេឃខៀវ Manchester City រូបគេសម្រេច​ជ្រើសរើសពាក់លេខ៣៣ គឺដើម្បីបញ្ជាក់ការគោរពដល់អាយុដែលព្រះយេស៊ូ​គ្រីស្ទត្រូវបានគេឆ្កាង។

ការអបអរសាទរ​គ្រាប់បាល់របស់ Gabriel Jesus ដោយប្រើដៃធ្វើជានិមិត្តសញ្ញាលើកទូរស័ព្ទបានបង្កប់​អត្តន័យថា Alô mãe មានន័យថា (ជំរាបសួរ​ម៉ែ ជាភាសាអង់គ្លេស)​ និងត្រូវបានដាក់បញ្ចូលនៅក្នុងហ្គេមបាល់ទាត់របស់ FIFA ផងដែរ។

នៅថ្ងៃទី២៥ ខែកញ្ញា ឆ្នាំ២០២១ បន្ទាប់ពីស៊ុតបញ្ចូលទីបានតែ១គ្រាប់ ក្នុងជ័យជម្នះ​លើ​ Chelsea កីឡាករ​ Jesus និង​មិត្ត​ស្រី​ អ្នកនាង Raiane Lima បានប្រកាសថា ពួកគេកំពុងរំពឹងថានឹងមានកូនដំបូង។ មួយសប្តាហ៍បន្ទាប់ពីការឈ្នះ​ជើង​ឯក​ Premier League លើកទី៤​ជាមួយក្លិប Man City កូនស្រីរបស់ពួកគេឈ្មោះ​ Helena ​បានកើត។

កីឡាករ Jesus និង Neymar ​មាន​ស្នាមសាក់ដូចគ្នាកាលពីខែសីហា ឆ្នាំ២០១៦ ដែល​ជា​រូបភាព ក្មេងប្រុសវ័យក្មេងដែលមានបាល់ទាត់នៅក្រោមដៃ​ដោយសម្លឹងមើលទៅលើ favela ភ្ជាប់ជាមួយ​នឹង​ក្ដីសុបិននៃភាពជោគជ័យនាពេលអនាគត៕

អត្ថបទ៖ ផា រតនា