Justin Hubner នៅលីគ​កំពូលអង់គ្លេសនឹងមានវត្តមានក្នុងការប្រកួត AFC Asian Cup

ខ្សែការពារវ័យក្មេង Justin Hubner ជាកូនកាត់ហុល្លង់​-ឥណ្ឌូណេស៊ី ត្រូវបាន​គ្រូ​បង្វឹក​ជម្រើស​ជាតិឥណ្ឌូណេស៊ី​កោះ​ហៅ​ចូល​រូម​ក្រុម​ធំ​​ដើម្បីតៀមការប្រកួតពានរង្វាន់ AFC Asian Cup ក្នុងខែមករានេះ។

កីឡាករ Justin Hubner កើតថ្ងៃទី១៤ ខែកញ្ញា ឆ្នាំ២០០៣ ជាកីឡាករបាល់ទាត់អាជីព ដែលលេងជាខ្សែការពារកណ្តាលនៅក្លិប Wolverhampton Wanderers ក្របខណ្ឌ Premier League។ រូបគេកើតនៅប្រទេសហុល្លង់​ មានម្តាយជាជនជាតិហុល្លង់ និង​ឪពុកជាជនជាតិឥណ្ឌូណេស៊ី ប៉ុន្តែរូបគេបានសម្រេចចិត្តលេងតំណាងឲ្យឥណ្ឌូណេស៊ី។

នៅខែតុលា ឆ្នាំ២០២២ Hubner ត្រូវបានហៅ​ចូល​រួម​ក្រុម​ឥណ្ឌូណេស៊ី​អាយុក្រោម២០ឆ្នាំ ក្រោមការដឹកនាំរបស់លោក Shin Tae-yong។ ខ្សែការពារវ័យក្មេងរូបនេះក៏បានចូលរួម​ក្រុមឥណ្ឌូណេស៊ី ក្នុងការទៅហ្វឹកហាត់នៅប្រទេសតួកគី​ក្នុងខែវិច្ឆិកា ឆ្នាំ២០២២។ កាលពី​ថ្ងៃទី២ ខែមករា ឆ្នាំ២០២៤ Hubner បានបង្ហាញខ្លួនជាលើកដំបូងសម្រាប់ក្រុម​​ធំរបស់ឥណ្ឌូណេស៊ីទល់នឹង​លីប៊ីក្នុងការប្រកួតមិត្តភាព។

ខ្សែការពារកណ្ដាល Justin Hubner ធ្លាប់បានចូលរួមជាមួយក្រុមជម្រើសហុល្លង់​អាយុក្រោម២០ឆ្នាំ កាលពីឆ្នាំ២០២១ ដោយបង្ហាញខ្លូនបាន១២លើក។ នៅឆ្នាំ២០២២ រូបគេ​បានចូលរួមជាមួយក្រុមឥណ្ឌូណេស៊ី​អាយុក្រោម២០ឆ្នាំ បង្ហាញបាន២លើក ខណៈឆ្នាំ២០២៤ ត្រូវបានក្រុម​​ធំ​ឥណ្ឌូណេស៊ី កោះហៅចូលរួមក្នុងការប្រកួតពានរង្វាន់ AFC Asian Cup។

ក្រុមឥណ្ឌូណេស៊ី ស្ថិតក្នុងពូល D រួមមានក្រុមជប៉ុន អុីរ៉ាក់ និង វៀតណាម។ ការប្រកួតដំបូងរបស់ឥណ្ឌូណេស៊ី ត្រូវជួបក្រុមអុីរ៉ាក់ នៅថ្ងៃទី១៥ ខែមករា ឆ្នាំ២០២៤ នៅកីឡដ្ឋាន Ahmed bin Ali ក្នុងប្រទេសកាតារ៕

អត្ថបទ៖ ផា រតនា