កីឡា

លោក Macron ជំរុញពលរដ្ឋលេងកីឡាស្រដៀងនឹងប្រមុខដឹកនាំកម្ពុជាមុនពេលស៊ីហ្គេម

បានផុស

៩ ខែ មុន

នៅ

ថ្ងៃពុធ ១០ មករា ២០២៤

ដោយ

ប្រធានាធិបតីបារាំង លោក Emmanuel Macron កាលពីថ្ងៃចន្ទបានអំពាវនាវឱ្យប្រជាជនបារាំងចាប់ផ្តើមធ្វើលំហាត់ប្រាណជារៀងរាល់ថ្ងៃ ខណៈទីក្រុងប៉ារីស នឹងត្រូវរៀបចំធ្វើជាម្ចាស់ផ្ទះកីឡាអូឡាំពិក និងប៉ារ៉ាឡាំពិក នៅរដូវក្តៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញប្រជាពលរដ្ឋរបស់លោកប្រធានាធិបតីបារាំងមុនពេលព្រឹត្តិការណ៍កីឡាអូឡាំពិកឈានចូលមកដល់ស្រដៀងគ្នានឹងប្រមុខដឹកនាំកម្ពុជាដែលមានសម្តេចតេជោ ហ៊ុន សែន អតីតនាយករដ្ឋមន្ត្រីបានជំរុញឲ្យប្រជាពលរដ្ឋ«លេងកីឡាហោចណាស់មួយមុខក្នុងជីវិត» កាលមុនព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើម្ចាស់ផ្ទះជាលើកដំបូង។

ការបង្ហោះវីដេអូឃ្លីបរបស់លោក Macron នៅលើគណនី X ដែលពីមុនហៅថា Twitter ក្នុងរូបភាពអាវយឺតជាមួយស្រោមដៃប្រដាល់នៅលើស្មា និងមានបាវសាក់នៅខាងក្រោយ លោកប្រធានាធិបតីបានជំរុញឱ្យជនរួមជាតិហាត់ប្រាណឱ្យបាន«ហោចណាស់៣០នាទីក្នុងមួយថ្ងៃ»។

លោក Macron វ័យ៤៦ឆ្នាំ បាននិយាយថា ការធ្វើលំហាត់ប្រាណមានប្រយោជន៍ «សម្រាប់សុខភាព និងអ្វីៗជាច្រើនទៀត។ វាក៏ជាវិធីធ្វើឱ្យកីឡាអូឡាំពិកក្លាយទៅជាផ្នែកមួយនៃទម្លាប់ប្រចាំថ្ងៃរបស់យើង»។

លោកធ្លាប់បានប្រាប់សារព័ត៌មាន AFP ថា នឹងលើកកម្ពស់កីឡា “ដើម្បីជាបុព្វហេតុជាតិដ៏អស្ចារ្យ” នៅឆ្នាំនេះ រួមទាំងការជំរុញការអប់រំកាយនៅក្នុងសាលារៀន។ លោកសង្ឃឹមប្រទេសបារាំងនឹងឈ្នះ “មេដាយជាច្រើន” នៅក្នុងកីឡាអូឡាំពិក ហើយសង្ឃឹមអ្នកលេងកីឡាពាក់កណ្ដាលអាជីពកាន់តែច្រើននឹងចាប់យកកីឡាជាអាជីព។

ប្រភពមួយនៅក្នុងការិយាល័យរបស់លោក Macron បាននិយាយថា រដ្ឋាភិបាលបានសម្រេចគោលដៅដែលបានកំណត់ក្នុងឆ្នាំ២០១៧ រួចហើយ ដើម្បីទទួលបានមនុស្សចំនួន ៣លាននាក់បន្ថែមទៀតចូលរួមធ្វើលំហាត់ប្រាណទៀងទាត់។ ឥឡូវនេះបារាំងកំពុងមានគោលដៅចំនួន ៣លាននាក់បន្ថែមទៀតនៅឆ្នាំ២០២៧។

កីឡាអូឡាំពិករដូវក្តៅ នៅទីក្រុងប៉ារីស ឆ្នាំ២០២៤ នឹងដំណើរការពីថ្ងៃទី២៦ ខែកក្កដា ដល់ថ្ងៃទី១១ ខែសីហា បន្ទាប់មកកីឡាប៉ារ៉ាឡាំពិក នឹងចាប់ផ្ដើមពីថ្ងៃទី២៨ ខែសីហា ដល់ថ្ងៃទី០៨ ខែកញ្ញា៕