កីឡា

កាតារបើកការប្រកួត AFC Asian Cup យប់មិញជាប្រទេសធ្វើម្ចាស់ផ្ទះច្រើនជាងគេ

បានផុស

១ year មុន

នៅ

ថ្ងៃសៅរ៍ ១៣ មករា ២០២៤

ដោយ

ក្រុមបាល់ទាត់ជម្រើសជាតិកាតារបានយកឈ្នះក្រុមជម្រើសជាតិលីបង់ដោយលទ្ធផល ៣-០ សម្រាប់ការប្រកួតបើកឆាកជើងឯកទ្វីបអាស៊ី AFC Asian Cup លើកទី១៨ ឆ្នាំ២០២៣ លើកមកដើមឆ្នាំ២០២៤ ដែលកាតារទទួលធ្វើម្ចាស់ផ្ទះច្រើនជាងគេក្នុងប្រវត្តិសាស្ត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតចាប់តាំងពីឆ្នាំ១៩៥៦ ជើងឯកទ្វីបអាស៊ី AFC Asian Cup ត្រូវបានបង្កើតឡើង ក្នុងនោះប្រទេសកាតារទទួលរៀបចំចំនួន៣ច្រើនលើកដែលច្រើនជាងប្រទេសផ្សេងៗនៅអាស៊ីគឺលើកទី១ឆ្នាំ១៩៨៨ លើកទី២ ឆ្នាំ២០១១ និងលើកទី៣ឆ្នាំ២០២៣ លើកមកដើមឆ្នាំ២០២៤។

ប្រទេសដែលអាចរៀបចំការប្រកួតបានទាល់តែមានហេដ្ឋារចនាសម្ព័ន្ធគ្រប់គ្រាន់ ស្របតាមលក្ខខណ្ឌរបស់សហព័ន្ធកីឡាបាល់ទាត់ពិភពលោក និងសហព័ន្ធបាល់ទាត់ទ្វីបអាស៊ីកំណត់កម្រិតតំបន់និងពិភពលោក។ ជាក់ស្តែងប្រទេសកាតារទើបតែរៀបចំការប្រកួតជើងឯកពិភពលោក World Cup ឆ្នាំ២០២២។

បន្ទាប់ពីប្រទេសកាតារគឺអុីរ៉ងធ្លាប់ទទួលរៀបចំ AFC Asian Cup ២ដងគឺឆ្នាំ១៩៦៨ និងឆ្នាំ១៩៧៦ និងអារ៉ាប់រួម២លើកគឺឆ្នាំ១៩៩៦ និង២០១៩ ក្រៅពីនោះសុទ្ធតែធ្លាប់ធ្វើបានមម្តងដូចគ្នាគឺហុងកុង (១៩៥៦) កូរ៉េខាងត្បូង (១៩៦០) អ៉ីស្រាអែល(១៩៦៤) ថៃ(១៩៧២) គុយវែត(១៩៨០) សិង្ហបុរី(១៩៨៤) ជប៉ុន(១៩៩២) លីបង់(២០០០) ចិន(២០០៤) អូស្ត្រាលី(២០១៥) ខណៈប្រទេសឥណ្ឌូណេស៊ី ថៃ ម៉ាឡេស៊ី និងវៀតណាមធ្វើម្ចាស់ផ្ទះរួមគ្នាក្នុងឆ្នាំ២០០៧។

ក្រុមបាល់ទាត់ជម្រើសជាតិកាតារជាម្ចាស់ជើងឯកពានរង្វាន់ AFC Asian Cup ឆ្នាំ២០១៩ ដោយបានយកឈ្នះក្រុមជម្រើសជាតិជប៉ុន ក្នុងវគ្គផ្ដាច់ព្រ័ត្រ ៣-១ កាលពីថ្ងៃទី១ ខែកុម្ភៈ នៅអារ៉ាប់រួម ធ្វើជាម្ចាស់ផ្ទះ។ ឆ្នាំ២០២៤នេះគឺជាការប្រកួតលើកទី១៨ ដែលប្រទេសកាតារធ្វើម្ចាស់ផ្ទះក្នុងនាមក្រុមការពារដំណែងជើងឯកឆ្នាំចាស់។

ក្រុមជម្រើសជាតិកាតារស្ថិតក្នុងពូល A រួមមានក្រុមជម្រើសជាតិចិន តាជីគីស្ថាន និងលីបង់ ដែលមានសមត្ថភាពប្រហាក់ប្រហែលគ្នា។ ការប្រកួតបើកយប់មិញ ម្ចាស់ផ្ទះកាតាររកបាន៣ពិន្ទុ បន្ទាប់ពីបានយកឈ្នះលីបង់ដោយលទ្ធផល ៣-០៕

អត្ថបទ៖ ផា រតនា