កីឡា

នេះព័ត៌មានលំអិតពីពាន«ស្វាយរៀងស៊ុបភើខាប់»ប្រចាំខេត្តស្វាយរៀង

បានផុស

១២ ខែ មុន

នៅ

ថ្ងៃសៅរ៍ ១៣ មករា ២០២៤

ដោយ

កាលពីថ្ងៃទី១២ ខែមករា ឆ្នាំ២០២៤ ឯកឧត្តមឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្ដាលសន្តិសុខបានបានសម្រេចបង្កើតពានរង្វាន់«ស្វាយរៀងស៊ុបភើខាប់ (Svay Rieng Super Cup)» បន្ទាប់ពីទទួលបានការគាំទ្រច្រើនពីមហាជន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី១៣ ខែមករា ឆ្នាំ២០២៤ ឯកឧត្តមបានបង្ហាញព័ត៌មានលំអិតអំពីកម្មវិធីប្រកួតស្វាយរៀងស៊ុបភើខាប់។ លក្ខខណ្ឌនៃការចូលរួមគឺក្រុមដែលបានឡើងដល់វគ្គ១៦ក្រុមចុងក្រោយនៃពានរង្វាន់ស្វាយរៀងខាប់រដូវកាលទី៦ ឆ្នាំ២០២៣-២៤ ចូលរួមទាំងអស់ ខណៈពានរង្វាន់ស្វាយរៀងខាប់រដូវកាលទី៦កំពុងប្រកួតសន្សំពិន្ទុក្នុងពូល ឈានដល់សប្តាហ៍ទី៣។

រូបមន្តនៃការប្រកួត ក្រុមទាំង១៦ត្រូវបានចាប់ឆ្នោតរកដៃគូដើម្បីប្រកួតវគ្គខ្វែងដែលមានន័យថា ក្រុមឈ្នះឡើងវគ្គ៨ក្រុមចុងក្រោយ ហើយក្រុមចាញ់អស់ឱកាស។ ក្រុមឈ្នះនៅវគ្គ៨ក្រុម បន្តវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ។

កាលបរិច្ឆេទនៃ ការប្រកួតនឹងចាប់ផ្តើម បន្ទាប់ពីពានរង្វាន់ស្វាយរៀងខាប់រដូវកាលទី៦បានបញ្ចប់។

ការប្រកួតគ្រោងចំណាយពេលចន្លោះ១ទៅ២ខែដែលធ្វើឡើងរាល់ថ្ងៃសៅរ៍ និងអាទិត្យ។ ពានរង្វាន់ស្វាយរៀងស៊ុបភើខាប់នេះមានតែជយលាភីលេខ១ប៉ុណ្ណោះ ពោលគឺគ្មានពានរង្វាន់សម្រាប់ក្រុមលេខ២ ឬលេខ៣ឡើយ។

ស្វាយរៀងស៊ុបភើខាប់ បានក្លាយជាពានរង្វាន់ថ្មីមួយទៀតសម្រាប់យុវជននៅខេត្តស្វាយរៀងទទួលបានឱកាសចូលរួមប្រកួតដើម្បីជំរុញឲ្យវិស័យកីឡាបាល់ទាត់នៅខេត្តមួយនេះកាន់តែរីកចម្រើន។ កន្លងមកថ្នាក់ដឹកនាំខេត្តស្វាយរៀងដែលមានឯកឧត្តម ឌី វិជ្ជា បានបង្កើតពានរង្វាន់ជាច្រើនគឺ ពានរង្វាន់ស្វាយរៀងខាប់ ពានរង្វាន់ស្វាយរៀងខាប់អាយុ១៨ឆ្នាំ ពានរង្វាន់ស្វាយរៀងខាប់អាយុ១៥ឆ្នាំ៕