កីឡា

ធ្លាប់ឈ្នះជើងឯក៥ដង អ៊ុំ វិចិត្រ ប្រាប់ក្តីស្រមៃធំមួយក្នុងអាជីពអ្នកចាំទី

បានផុស

១ year មុន

នៅ

ថ្ងៃសុក្រ ២ កុម្ភៈ ២០២៤

ដោយ

អ្នកចាំទីជម្រើសជាតិកម្ពុជា និងក្លិបភ្នំពេញក្រោន អ៊ុំ វិចិត្រ មានក្តីស្រមៃធំមួយគឺចង់ស្គាល់រសជាតិពានរង្វាន់អ្នកចាំទីឆ្នើមឲ្យបានម្តងក្នុងអាជីព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កើតនៅឆ្នាំ១៩៩៣ អ៊ុំ វិចិត្រ បានចាប់ផ្តើមលេងបាល់តាំងពីតូចក្នុងនាមជាយុវជនរបស់ក្លិបបាល់ទាត់ក្រសួងការពារជាតិតាំងពីឆ្នាំ២០០៨។ នៅក្លិបដំបូងនេះ រូបគេបានជួយឲ្យក្លិបទ័ពឈ្នះពានរង្វាន់សម្តេចតេជោ ហ៊ុន សែន ២លើកគឺឆ្នាំ២០១០ និង២០១៦ ប៉ុន្តែនៅឆ្នាំ២០១៦ រូបគេមិនបានលេងទេដោយសារបានរបួសដៃតាំងពីឆ្នាំ២០១៥។

បន្ទាប់ពីជាសះស្បើយពីរបួសនៅចុងឆ្នាំ២០១៧ រូបគេបានវិលត្រឡប់ចូលទីលានវិញ ដោយបានលេងពេញលេញចន្លោះឆ្នាំ២០១៨ និង២០១៩ ជាពេលដែលប្អូនប្រុសបង្កើតរបស់ខ្លួន អ៊ុំ សេរីរ័ត្ន បានរបួសម្តង។ នៅឆ្នាំ២០២០ រូបគេចូលរួមជាមួយក្លិបភ្នំពេញក្រោនជាកន្លែងដែលរូបគេបានឈ្នះជើងឯកលីគកំពូលកម្ពុជាជាលើកដំបូងនៅឆ្នាំ២០២១។

រដូវកាល២០២២ អ៊ុំ វិចិត្រ បានវិលត្រឡប់ទៅក្រសួងការពារជាតិវិញ និងបានត្រឡប់ទៅភ្នំពេញក្រោនជាថ្មីនៅឆ្នាំ២០២៣ ជាពេលដែលរូបគេបានឈ្នះជើងឯក២ទៀតគឺខេមបូឌានលីគខាប់ និងខេមបូឌានស៊ុបភើខាប់។

បើទោះបីជាធ្លាប់ឈ្នះជើងឯក៥លើកក៏ដោយ ក៏ក្នុងនាមជាអ្នកចាំទីរូបនេះមិនទាន់ធ្លាប់បានឈ្នះពានរង្វាន់អ្នកចាំទីឆ្នើមឡើយ។ អ៊ុំ វិចិត្រ បានប្រាប់សារព័ត៌មាន«កម្ពុជាថ្មី»ថា ៖«ចំពោះសមិទ្ធផល ខ្ញុំនៅជាមួយក្រសួងការពារជាតិ ខ្ញុំធ្លាប់ឈ្នះពានសម្តេចតេជោបាន២ដង។ បន្ទាប់ពីផ្លាស់មកចូលរួមជាមួយភ្នំពេញក្រោន ខ្ញុំបានឈ្នះជើងឯកលីគកំពូលកម្ពុជា។ ក្រោយមក ខ្ញុំបានត្រឡប់ទៅទ័ពវិញ ហើយត្រឡប់ទៅភ្នំពេញក្រោនម្តងទៀត ខ្ញុំក៏បានឈ្នះជើងឯកខេមបូឌានលីគខាប់ និង ខេមបូឌានស៊ុបភើខាប់»។

អ៊ុំ វិចិត្រ បន្ថែមថា ៖«ក្តីស្រមៃមួយដ៏ធំគឺចង់ឈ្នះពានរង្វាន់ជាអ្នកចាំទីឆ្នើម។ រហូតដល់ឥឡូវនេះ ខ្ញុំមិនទាន់ធ្លាប់ឈ្នះពានជាអ្នកចាំទីឆ្នើមទេ។ នៅតែមានក្តីស្រមៃចង់ឈ្នះ ពីព្រោះយើងលេងអាជីពនេះ យើងត្រូវតែស្គាល់រសជាតិនេះឲ្យបានម្តង»។

ក្រោយជាសះស្បើយពីរបួស និងវិលចូលទីលានវិញក្នុងរយៈពេលបីបួនឆ្នាំចុងក្រោយនេះ អ៊ុំ វិចិត្រ បានក្លាយជាដៃទី១របស់ក្លិបភ្នំពេញក្រោន និងចុងក្រោយត្រូវបានកោះហៅចូលក្រុមបាល់ទាត់ជម្រើសជាតិកម្ពុជា៕

អត្ថបទ៖ វិរបុត្រ