កីឡា

សហព័ន្ធបាល់ទះបង្កើតពាន Special Cup ក្រុមបរទេសសុទ្ធក៏ចូលរួមបាន

បានផុស

៨ ខែ មុន

នៅ

ថ្ងៃសុក្រ ២ កុម្ភៈ ២០២៤

ដោយ

សហព័ន្ធកីឡាបាល់ទះកម្ពុជាបានបង្កើតពានរង្វាន់មួយទៀតគឺ Special Volleyball Cup ឆ្នាំ២០២៤ ដែលក្រុមកីឡាករបរទេសសុទ្ធក៏អាចចូលរួមប្រកួតបាន។

តាមការឲ្យដឹងពី លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជាថា ពានរង្វាន់ Special Volleyball Cup គឺលេង៤នាក់ទល់នឹង៤នាក់ ដូច្នេះក្រុម១ដែលមានសមាជិក៦រូបអាចចុះឈ្មោះចូលរួមការប្រកួតបាន។ ក្រុមនីមួយៗអាចមានកីឡាករខ្មែរសុទ្ធ កីឡាករខ្មែរលាយជាមួយបរទេស ឬកីឡាករបរទេសសុទ្ធក៏អាចចូលរួមប្រកួតបានដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបង្កើតឲ្យមានពានរង្វាន់នេះឡើងគឺដើម្បីឲ្យអ្នកលេងបាល់ទះមហាជនងាកចូលមកចូលរួមប្រកួតលក្ខណៈអាជីព និងស្តង់ដាដែលមានគោលការណ៍ប្រកួតច្បាស់។ ជាពិសេសក៏ជាព្រឹត្តិការណ៍មហាជនដ៏សំខាន់មួយដែលបំផុសបំផុល ជំរុញ និងបង្កើនសកម្មភាពបាល់ទះនៅក្នុងប្រទេសកម្ពុជាឲ្យកាន់សកម្មឡើង។

តាមការគ្រោងទុក ការប្រកួតត្រូវបានបែងចែកជា២ដំណាក់កាលគឺដំណាក់កាលភូមិភាគ និងដំណាក់កាលផ្តាច់ព្រ័ត្រ។ ដំណាក់កាលភូមិភាគគឺមាន៥មណ្ឌល និងជុំផ្តាច់ព្រ័ត្រនៅរាជធានីភ្នំពេញ។

មណ្ឌលភូមិភាគ

មណ្ឌលបាត់ដំបង (ខេត្តបាត់ដំបង កំពង់ឆ្នាំង ពោធិ៍សាត់ ប៉ៃលិន និងបន្ទាយមានជ័យ ទី២៤-២៦ កុម្ភៈ )
មណ្ឌលសៀមរាប (ខេត្តសៀមរាប ឧត្តរមានជ័យ ព្រះវិហារ និងកំពង់ធំ ទី២-៣ មីនា)
មណ្ឌលកំពង់ចាម (ខេត្តកំពង់ចាម ក្រចេះ ត្បូងឃ្មុំ ស្ទឹងត្រែង មណ្ឌលគិរី និងរតនគិរី ទី៩-១០ មីនា)
មណ្ឌលព្រៃវែង (ខេត្តព្រៃវែង ស្វាយរៀង និងកណ្តាល ទី១៦-១៦ មីនា)
មណ្ឌលព្រះសីហនុ (ខេត្តព្រះសីហនុ កំពង់ស្ពឺ កែប កំពត និងកោះកុង ទី២៣-២៤ មីនា)

ជុំផ្តាច់ព្រ័ត្រភ្នំពេញ (ទី២២-២៨ ខែមេសា)

ក្រុមទាំង៦នៅពានរង្វាន់បាល់ទះតេជោលីគ (វិសាខា បញ្ជាការដ្ឋានអង្គរក្ស បញ្ជាការដ្ឋាននគរបាលរាជធានីភ្នំពេញ កងពលធំអន្តរាគមន៍លេខ៣ ក្រសួងមហាផ្ទៃ និងនគរបាលខេត្តពោធិ៍សាត់) រង់ចាំនៅជុំផ្តាច់ព្រ័ត្រ (៦ក្រុម)
ក្រុមលេខ១ និងលេខ២ ពីមណ្ឌលទាំង៥ខាងលើ (១០ក្រុម)

ប្រសិនបើ កីឡាករដែលលេងនៅលីគតេជោលីគទៅលេងឲ្យក្រុមនៅតាមបណ្តាខេត្តក្នុងវគ្គមណ្ឌលភូមិភាគ កីឡាករនោះនឹងមិនអាចលេងឲ្យក្រុមនៅពេលជុំផ្តាច់ព្រ័ត្រក្នុងរាជធានីភ្នំពេញឡើយ។

ព្រឹត្តិការណ៍នេះមានប្រាក់រង្វាន់៥០លានរៀលសម្រាប់ជយលាភីនៅជុំផ្តាច់ព្រ័ត្រ។ ការលក់ពាក្យចូលរួមប្រកួតចាប់ពីផ្សាយដំណឹងនេះរហូតដល់ថ្ងៃទី១៣ ខែកុម្ភៈ៕

ប្រាក់រង្វាន់ថ្នាក់ខេត្ត