កាតារជិតតាមស្មើកំណត់ត្រាកូរ៉េខាងត្បូងជើងឯកអាស៊ី Asian Cup

ក្រុម​បាល់ទាត់​ជម្រើសជាតិកាតារបានយកឈ្នះក្រុមជម្រើសជាតិអុីរ៉ង់​ដោយ​លទ្ធផល ៣-២ ដើម្បី​ឡើង​ទៅ​វគ្គផ្ដាច់ព័្រត្រពានរង្វាន់ AFC Asian Cup ក្នុងនាមជាក្រុមការពារតំណែងជើងឯកឆ្នាំចាស់និងជាក្រុមម្ចាស់ផ្ទះ។

ក្រុមកាតារហាក់មានភាគរយខ្ពស់ក្នុងការប្រជែង​ដើម្បីក្លាយជាក្រុមម្ចាស់ជើងឯក AFC Asian Cup ឆ្នាំនេះដោយសារពួកគេជាក្រុមម្ចាស់ផ្ទះ និង​ធ្លាប់ឈ្នះពានរង្វាន់នេះ​កាល​ពី​រដូវ​កាល​មុន ខណៈហ្សកដានីជាក្រុម​ទើបឡើងមកវគ្គផ្ដាច់ព្រ័ត្រនេះលើកដំបូង។

បើនិយាយពីក្រុមដែលឈ្នះពានរង្វាន់ AFC Asian Cup ច្រើនជាងគឺក្រុមជប៉ុន​ដែល​បាន​ឈ្នះ​៤លើក(ឆ្នាំ១៩៩២, ២០០០, ២០០៤​និង ២០១១)។ អុីរ៉ង់ និងអារ៉ាប៊ីសាអ៊ូឌីត​ បាន​ឈ្នះ​ជើង​ឯក​៣​ដង​ដូចគ្នា។ កូរ៉េខាងត្បូងធ្លាប់ឈ្នះ២លើក ក្នុងឆ្នាំ១៩៥៦ និង ១៩៦០។ ប្រសិនបើម្ចាស់ផ្ទះកាតារយកឈ្នះក្រុមហ្សកដានីក្នុងវគ្គផ្ដាច់ព្រ័ត្រ នោះ​ពួក​គេ​នឹងតាមស្មើកំណត់​ត្រា​របស់កូរ៉េខាងត្បូង ខណៈ​​គុយវ៉ែត អូស្រ្ដាលី និងអុីរ៉ាក់ ធ្លាប់ឈ្នះ​ម្តង​ដូច​គ្នា។

សម្រាប់ការប្រកួត​វគ្គផ្ដាច់ព័្រត្រ AFC Asian Cup នឹងធ្វើ​នៅថ្ងៃទី១០ ខែកុម្ភៈ ឆ្នាំ២០២៤ វេលាម៉ោង១០យប់​ នៅកីឡដ្ឋាន Lusail Stadium។ ប្រវត្តិជួបគ្នារវាងក្រុមកាតារនិងហ្សកដានី​គឺ​​៩លើក ក្នុងនោះកាតារឈ្នះ៦លើក ហ្សកដានីឈ្នះ២ និងស្មើ១លើក។

កាតារហាក់មានប្រៀបជាងទាំងបទពិសោធការប្រកួតក្នុងវគ្គផ្ដាច់ព្រ័ត្រ និងក្នុងនាមជាម្ចាស់ផ្ទះទៀត។ បើនិយាយពីក្រុមហ្សកដានី ទោះបីមិនធ្លាប់ឡើងដល់វគ្គផ្ដាច់ព្រ័ត្រ ប៉ុន្តែពួកគេកំពុងតែមានកម្លាំង​ចិត្ត​យ៉ាង​ធំ​ធេង​ដោយ​សារ​បាន​បង្កើតប្រវត្តិសាស្រ្តថ្មីក្នុង​ការ​ឡើង​វគ្គ​ផ្តាច់​ព្រ័ត្រ​ជាលើកដំបូង៕

អត្ថបទ៖ ផា រតនា