កីឡា

ជើងឯកស្វាយរៀងខាប់ដល់សប្តាហ៍ទី៨ប្រជែងចំណាត់ថ្នាក់ក្នុងពូល

បានផុស

១២ ខែ មុន

នៅ

ថ្ងៃព្រហស្បតិ៍ ១៥ កុម្ភៈ ២០២៤

ដោយ

ការប្រកួតជើងឯកស្វាយរៀងខាប់រដូវកាលទី៦ ឆ្នាំ២០២៤ ឈានដល់សប្តាហ៍ទី៨សម្រាប់វគ្គសន្សំពិន្ទុក្នុងពូល ស្របពេលក្រុមនីមួយៗកំពុងប្រជែងយកចំណាត់ថ្នាក់លេខ១ និងលេខ២។

សប្តាហ៍ទី៨ ថ្ងៃសៅរ៍-អាទិត្យ ទី១៧-១៨ ខែកុម្ភៈ ឆ្នាំ២០២៤ ការប្រកួត៦គូនៅពូល ច ឆ និងជ នៅទីលានវិទ្យាល័យ ស្វាយរំពារ។ សម្រាប់ពូល (ច) ក្រុមស្នងការដ្ឋាននគរបាលខេត្តស្វាយរៀងកំពុងឈរលើកំពូលតារាង បន្ទាប់ពីឆ្លងកាត់២ប្រកួត ឈ្នះទាំង២ប្រកួត ទទួលបាន៦ពិន្ទុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុម សសយក បាទី ប៉ះ ក្រុម ឆ្មាបុងបុងដើម្បីស្វែងរកពិន្ទុជាលើកដំបូង។ ក្រុមទាំងពីរទើបតែឆ្លងកាត់១ប្រកួត ប៉ុន្តែចាញ់ដូចគ្នា។ សសយក បាទី កំពុងឈរលេខ៤ ខណៈក្រុមឆ្មាបុងបុងកំពុងនៅបាតតារាង។ ក្រុមលេខ២ សសយក ស្រុកចន្ទ្រា ប៉ះ ក្រុមលេខ៣ ដារ៉ូពិទូសុខសាន្ត ដើម្បីស្វែងរកពិន្ទុបន្ថែមទៀត។ ក្រុមទាំងពីរមាន៣ពិន្ទុដូចគ្នា បន្ទាប់ពីឈ្នះ១ និងចាញ់១ដូចគ្នា។

ពូល(ឆ) ក្រុមបក្សីស្វាយរៀងកំពុងឈរលើកំពូលតារាង បន្ទាប់ពីឈ្នះ១ ស្មើ១ រកបាន៤ពិន្ទុ។ ក្រុមលេខ២ យុវជនជីភូ អេហ្វស៊ី មាន៣ពិន្ទុ បន្ទាប់ពីឆ្លងកាត់១ប្រកួត ទទួលបានជ័យជម្នះ។ ពួកគេត្រូវប៉ះក្រុមលេខ៣ នគរបាលច្រកទ្វារព្រំដែនបាវិត ដែលទើបឆ្លង១ប្រកួត និងឈ្នះ ហើយមាន៣ពិន្ទុដូចគ្នា។ គូនេះ ក្រុមណាឈ្នះឡើងទៅកាន់កំពូលតារាង។ មួយគូទៀតជាការប៉ះគ្នារវាងក្រុមលេខ៤ CRS SPORT និងក្រុមបាតតារាង សសយក ស្រុករំដួល។ CRS Sport មាន១ពិន្ទុ បន្ទាប់ពី ស្មើ១ និងចាញ់១ ខណៈក្រុមស្រុករំដួលមិនទាន់មានពិន្ទុ បន្ទាប់ពីចាញ់ទាំង២ប្រកួត។

ពូល (ជ) មានការប្រកួត២គូនៅសប្តាហ៍នេះដោយក្រុមលេខ២ សាកលវិទ្យាល័យស្វាយរៀង ប៉ះក្រុមលេខ៣ រមាសក្រហម។ សាកលវិទ្យាល័យស្វាយរៀង ឈ្នះ១ ចាញ់១ មាន៣ពិន្ទុ ខណៈរមាសក្រហម ឈ្នះ១ ចាញ់១ មាន៣ពិន្ទុដែរ។ ១គូទៀតជាការប៉ះគ្នារវាងក្រុមលេខ៤ សសយក ស្រុកកំពង់រោទិ៍ និងក្រុមលេខ៥ សាំម៉ូរៃភូមិតាកឹង។ ក្រុមទាំងពីរទើបឆ្លងកាត់១ប្រកួត ប៉ុន្តែចាញ់ដូចគ្នា។ នៅពូលនេះ ក្រុមយុវជនព្រះខ័នរាជស្វាយរៀងកំពុងឈរលេខ១ បន្ទាប់ពីឈ្នះទាំង២ប្រកួត មាន៦ពិន្ទុ។

សូមបញ្ជាក់ថា បន្ទាប់ពីចប់វគ្គសន្សំពិន្ទុក្នុងពូល ក្រុមលេខ១ និង២ក្នុងពូលទាំង៨នឹងឡើងទៅកាន់វគ្គ១៦ក្រុមចុងក្រោយ ដែលមានសិទ្ធិលេងក្នុងពានរង្វាន់ ស្វាយរៀងស៊ុបភើខាប់ ឆ្នាំ២០២៤៕