កីឡា

Lee Kang In បង្ហោះសារសុំទោស ក្រោយជ្រុលដាក់មួយដៃចំមុខ Son Heung Min

បានផុស

១០ ខែ មុន

នៅ

ថ្ងៃព្រហស្បតិ៍ ១៥ កុម្ភៈ ២០២៤

ដោយ

កាលពីថ្ងៃទី១៤ ខែកុម្ភៈ ប្រព័ន្ធផ្សព្វផ្សាយផ្សេងៗបានរាយការណ៍ពីជម្លោះដ៏ធ្ងន់ធ្ងរនៅក្នុងក្រុមជម្រើសជាតិកូរ៉េខាងត្បូង ដែលបណ្ដាលឲ្យខ្សែបម្រើ Lee Kang-in ដាល់កណ្ដាលមុខប្រធានក្រុម Son Heung-min អំឡុងពេលអាហារពេលល្ងាចនៅ Asian Cup ។

កាសែត The Sun និង alkpop បានរាយការណ៍ថាដូចៗគ្នាថា ក្រុមបាល់ទាត់ជម្រើសជាតិកូរ៉េ កំពុងជួបប្រទះនឹងជម្លោះដ៏ធ្ងន់ធ្ងររវាងកីឡាករ ដែលបណ្តាលឲ្យមានការបែកបាក់ក្នុងក្រុម។ ប្រព័ន្ធផ្សព្វផ្សាយក៏បានរាយការណ៍ផងដែរ អំពីឧប្បត្តិហេតុមួយដែលកីឡាករសំខាន់ពីរគឺ Son Heung Min និង Lee Kang In បានឆ្លងកាត់ការប៉ះទង្គិចរាងកាយ ក្លាយជាការប្រេះឆាកាន់តែស៊ីជម្រៅ។

ទោះយ៉ាងណាក៏ដោយ ចំពេលមានសេចក្តីរាយការណ៍អំពីការមិនចុះសម្រុងគ្នារវាងកីឡាករ២រូបនេះ ខ្សែបម្រើវ័យ២២ឆ្នាំរូបនេះ បានបង្ហោះសារសុំទោសទាក់ទងនឹងជម្លោះរបស់គាត់ជាមួយ Son Heung Min តាមរយៈបណ្ដាញសង្គម Instagram របស់លោកថា “ជម្រាបសួរ ខ្ញុំគឺជា Lee Kang In! បន្ទាប់ពីមានរបាយការណ៍ព្រោងព្រាតទាក់ទិននឹងជម្លោះជាមួយ Son Heung Min មុនពេលការប្រកួតវគ្គពាក់កណ្តាលផ្តាច់ព្រ័ត្រ Asian Cup ។ ខ្ញុំសូមអភ័យទោសយ៉ាងជ្រាលជ្រៅដែលធ្វើឲ្យមានការខកចិត្តយ៉ាងខ្លាំងចំពោះអ្នកគាំទ្របាល់ទាត់ តែងតែគាំទ្រក្រុមជម្រើសជាតិរបស់យើង។ ខ្ញុំពិតជាសុំទោសពិតមែន! ខ្ញុំគួរតែមានសុជីធម៌និងស្ដាប់រៀមច្បង ប៉ុន្តែខ្ញុំបែរជាបង្ហាញរូបភាពមិនល្អដល់អ្នកគាំទ្របាល់ទាត់។ ខ្ញុំដឹងយ៉ាងច្បាស់អំពីចំណាប់អារម្មណ៍ និងការរំពឹងទុកដែលអ្នកគាំទ្របាល់ទាត់មានចំពោះខ្ញុំ។ នៅពេលអនាគត ខ្ញុំនឹងខិតខំក្លាយជាកីឡាករល្អ និងជាមនុស្សល្អជាងនេះ ដោយមានជំនួយពីមនុស្សដែលមានវ័យច្រើនជាងខ្ញុំ”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្វីបើផ្ទុះការជជែកញែកពេញបណ្ដាញសង្គមទាក់ទងនឹងជម្លោះរវាងកីឡាករទាំងពីរយ៉ាងណាក្ដី ប៉ុន្តែបន្ទាប់ពី Lee Kang In ចេញមុខសុំទោស អ្នកលេងអ៊ីនធឺណេតកូរ៉េជាច្រើនមិនជឿជាក់លើភាពត្រឹមត្រូវនៃរបាយការណ៍នេះ ហើយបានសម្តែងការភ្ញាក់ផ្អើលយ៉ាងខ្លាំង។ ពួកគេបានបញ្ចេញមតិថា សំបុត្រសុំទោសហាក់ដូចជាមិនស្មោះត្រង់ នេះគឺជាប្រវត្តិសាស្រ្តដែលកីឡាករវ័យក្មេងបំផុត បានដាល់ប្រធានក្រុមខ្លួនឯងឬក្រុមវ័យចាស់ជាង។

លើសពីនេះទៀតដែរ អ្នកគាំទ្រក្នុងវិស័យបាល់ទាត់បានសម្ដែងការខកចិត្តយ៉ាងខ្លាំងក្លា ចំពោះ Lee Kang In ដែលធ្វើទង្វើមិនសមរមម្យដាក់ប្រធានក្រុម។ ក្នុងនោះថែមទៀត មនុស្សជាច្រើនបានប្រាប់ជម្រើសជាតិរូបនេះ ឲ្យត្រលប់ទៅសុំទោស Son Heung Min ផ្ទាល់ មិនមែនសុំទោសតាមអ៉ីនធើណេត ឬសុំទោសអ្នកគាំទ្រទេ។

យ៉ាងណាមិញ មកដល់បច្ចុប្បន្ននេះ អ្នកលេងអ៊ីនធឺណិតកូរ៉េជាច្រើនកំពុងទាមទារឲ្យសមាគមកីឡាបាល់ទាត់កូរ៉េ លុបចោលការលើកលែងកាតព្វកិច្ចយោធាជាកាតព្វកិច្ចរបស់ Lee Kang In ដែលគាត់ទទួលបានបន្ទាប់ពីក្រុមជម្រើសជាតិកូរ៉េខាងត្បូងឈ្នះមេដាយមាសផ្នែកបាល់ទាត់បុរសក្នុងព្រឹត្តិការណ៍ 2022 Hangzhou Asian Games។

សូមរម្លឹកជាថ្មីថា សារព័ត៌មាន Dispatch ក៏បានផ្សាយថានាពេលនោះថា Lee Kang In បានវាយកូនឃ្លីលើតុជាមួយមិត្តក្នុងក្រុម ដែលរំខានដល់ការទទួលទានអាហារ ទើបធ្វើឲ្យ Son Heung Min ទៅហាមតែគេមិនស្ដាប់រហូតកើតជាជម្លោះ។ ក្រោយមក Lee Kang In បានជ្រុលដាក់មួយដៃចំមុខ Son Heung Min ដោយសារតែកីឡាករបាល់ទាត់របស់ក្លឹបមាន់ខ្នាយមាស Tottenham Hotspur រូបនេះ ចាប់កអាវ Lee Kang In។ ជាពិសេសទៀតនោះ Son Heung Min បានបាក់ម្រាមដៃ ដល់ថ្នាក់ត្រូវរុំរបួសយ៉ាងធ្ងន់ធ្ងរថែមទៀតផង៕