កីឡា

ក្លិបកីឡាការ៉ាតេ៥ ហ្វឹកហាត់នៅស្តាតចាស់ ត្រៀមចូលរួមប្រកួតជើងឯក នៅខែតុលានេះ

បានផុស

៤ years មុន

នៅ

ថ្ងៃសុក្រ ១៦ តុលា ២០២០

ដោយ

chhanny chia

កីឡាករ-កីឡាការិនីចំនួន៤២នាក់ មកពីក្លិបកីឡាការ៉ាតេ៥ក្លិប ធ្វើការហ្វឹកហាត់ជាប្រចាំ រៀងរាល់ថ្ងៃនៅស្តាតចាស់។

ក្នុងនោះ ដើម្បីត្រៀមខ្លួនចូលរួមព្រឹត្តិការណ៍ នៃការប្រកួតកីឡាការ៉ាតេជ្រើសរើសជើងឯកទូទាំងប្រទេស២០២០ នៅថ្ងៃ២២ ដល់ ២៤ ខែតុលា ឆ្នាំ២០២០ នាសាកលវិទ្យាល័យភូមិន្ទភ្នំពេញ។

លោក ឡាច ច័ន្ទដារ៉ា គ្រូបង្វឹកក្លិបក្រសួងមហាផ្ទៃ បានប្រាប់ឲ្យដឹងថា ក្នុងដំណាក់កាលត្រៀមប្រកួតកីឡាការ៉ាតេជ្រើសរើសជើងឯកទូទាំងប្រទេស២០២០ ក្លិបកីឡាការ៉ាតេចំនួន៥ បានមករួមគ្នាហ្វឹកហាត់នៅកន្លែងតែមួយ ដែលមានកីឡាករ-កីឡាការិនីចំនួន៤២នាក់ ចូលរួមរៀងរាល់ថ្ងៃរួមមាន ក្លិបក្រសួងការពារជាតិ ក្លិបក្រសួងមហាផ្ទៃ ក្លិបឫស្សីកែវ ក្លិបទីក្រុងសេះមកពីខេត្តព្រះសីហនុ និងក្លិបសុរិយា។

លោកគ្រូបង្វឹក បានបន្តថា ក្លិបទាំង៥ ធ្វើការហ្វឹកហាត់ ចាប់ពីថ្ងៃច័ន្ទ ដល់ថ្ងៃសុក្រ នៅស្តាតចាស់ ហើយថ្ងៃសៅរ៍ និងថ្ងៃអាទិត្យ ហាត់ក្លិបសុរិយា។ នាល្ងាច កីឡាករ-កីឡាការិនី តែងតែសាកល្បងសមត្ថភាព និងបច្ចេកទេសជាមួយគ្នាជានិច្ច ដើម្បីដកស្រង់បទពិសោធន៍របស់កីឡាករ-កីឡាការិនី ពីក្លិបមួយ ទៅក្លិបមួយទៀត។

លោក ឡាច ច័ន្ទដារ៉ា បានបន្ថែមទៀតថា ការប្រកួតកីឡាការ៉ាតេជ្រើសរើសជើងឯកទូទាំងប្រទេសឆ្នាំ២០១៩ កន្លងទៅ ទទួលបានមេដាយសរុប១១គ្រឿង។ ក្នុងនោះ មេដាយមាស៥គ្រឿង មេដាយប្រាក់៣គ្រឿង និងមេដាយសំរឹទ្ធ៣គ្រឿង ជាប់ចំណាត់ថ្នាក់លេខ២ ចំណែកក្លិបកងយោធពលខេមរភូមិន្ទ ជាប់ចំណាត់ថ្នាក់លេខ១៕
អត្ថបទ ៖ វិសិទ្ធ

Related Topics: