កីឡា

កីឡាករជប៉ុន Ito ប្តឹងស្ត្រី២រូបដែលចោទខ្លួនពីបទរំលោភផ្លូវភេទពេល Asian Cup

បានផុស

១២ ខែ មុន

នៅ

ថ្ងៃពុធ ២១ កុម្ភៈ ២០២៤

ដោយ

ខ្សែបម្រើស្លាបជនជាតិជប៉ុនដែលលេងឱ្យក្លិបបារាំង Reims កីឡាករ Junya Ito កំពុងប្តឹងស្ត្រីពីរនាក់ ទាមទារសំណងចំនួន ២០០លានយ៉េន (១.៣លានដុល្លារ) ដែលចោទប្រកាន់ខ្លួនពីបទរំលោភផ្លូវភេទ និងបើទោះបីជារូបគេបានបដិសេធ។ ប៉ូលិសកំពុងស៊ើបអង្កេតលើឧប្បត្តិហេតុដែលគេត្រូវបានចោទប្រកាន់នៅទីក្រុងអូសាកា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ូលិសជប៉ុនកំពុងស៊ើបអង្កេតឧប្បត្តិហេតុដែលត្រូវបានចោទប្រកាន់នៅទីក្រុង Osaka កាលពីឆ្នាំមុនពាក់ព័ន្ធនឹងខ្សែបម្រើស្លាបវ័យ៣០ឆ្នាំ Junya Ito។ មេធាវីរបស់ Ito គឺលោក Hirotaro Kato ដែលត្រូវបានស្រង់សំដីដោយសារព័ត៌មាន AFP បាននិយាយថា ៖«Junya Ito បានដាក់ពាក្យប្តឹងស្ត្រីទាំងពីរនាក់នោះ ទាមទារសំណង២០០លានយ៉េន។ កីឡាកររូបនេះបដិសេធប្រព្រឹត្តខុសអ្វីឡើយ។ មេធាវីរបស់លោកកំពុងអំពាវនាវឲ្យដោះស្រាយបញ្ហានេះឲ្យបានឆាប់តាមដែលអាចធ្វើទៅបានដោយសារផលវិបាកដែលកូនក្តីលោកអាចប្រឈមមុខ»។

លោក Kato បានប្រាប់អ្នកយកព័ត៌មានកាលពីថ្ងៃចន្ទថា ៖«វាមានសារសំខាន់ខ្លាំងក្នុងការស្តារកិត្តិយសរបស់កីឡាករឱ្យបានឆាប់ ពីព្រោះអាជីពរបស់កីឡាកររូបនេះកំពុងមានកម្រិត»។

យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក គ្រូបង្វឹកកាយសម្បទារបស់កីឡាករ Ito ក៏ជាប់ពាក់ព័ន្ធដែរ។ នៅពេល Ito កំពុងចូលរួមប្រកួតពានរង្វាន់ជើងឯកទ្វីបអាស៊ី AFC Asian Cup ក្នុងប្រទេសកាតារកាលពីខែមុន ក៏មានព័ត៌មានស្តីពីការចោទប្រកាន់រូបគេត្រូវបានចុះផ្សាយក្នុងទស្សនាវដ្តីជប៉ុនមួយ។ ភ្លាមៗនោះ រូបគេបានចាកចេញពីក្រុមជប៉ុន មុនការប្រកួតវគ្គ៨ចុងក្រោយជាមួយអ៊ីរ៉ង់។

នៅពេលនោះ សមាគមបាល់ទាត់ជប៉ុនបាននិយាយថា ការសម្រេចចិត្តរបស់ Ito ក្នុងការចាកចេញពីជំរុំក្រុមជម្រើសជាតិគឺដើម្បីការពារក្រុមពី “សំលេងរំខាន” និង “បង្កើតបរិយាកាសមួយដែលពួកគេអាចផ្តោតលើបាល់ទាត់”។

បន្ទាប់ពី Asian Cup កីឡាករ Ito បានត្រឡប់ទៅក្លិបបារាំង Reims ដែលគេបានលេងពីរប្រកួតរួចមកហើយផងដែរ៕