កីឡា

ជើងឯកស្វាយរៀងខាប់នារីលើកទី១មានក្រុម៩ចូលរួមប្រកួត

បានផុស

១២ ខែ មុន

នៅ

ថ្ងៃអាទិត្យ ២៥ កុម្ភៈ ២០២៤

ដោយ

ការប្រកួតបាល់ទាត់ពានរង្វាន់ស្វាយរៀងខាប់នារី លើកទី១ ឆ្នាំ២០២៤ មានក្រុមចំនួន៩ចូលរួមប្រកួតប្រជែង បន្ទាប់ពីឯកឧត្តមឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្ដាលសន្តិសុខបានប្រកាសរៀបចំកាលពីដើមខែមករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចប្រជុំបច្ចេកទេសកាលពីរសៀលថ្ងៃទី២៤ ខែកុម្ភៈ ឆ្នាំ២០២៤បានរៀបចំគោលការណ៍នៃការប្រកួត និងចាប់ពូលរួចរាល់។ ក្រុមដែលចូលរួមទាំង៩មានដូចខាងក្រោម៖

សសយក ស្រុកចន្ទ្រា
សសយក ក្រុងស្វាយរៀង
វិទ្យាល័យព្រះពន្លា
ប្រសូតិ អេហ្វស៊ី
សសយក ស្រុកស្វាយទាប
សសយក ស្រុករំដួល
សសយក ស្រុករមាសហែក
សសយក ស្រុកកំពង់រោទិ៍
សសយក ស្រុកស្វាយជ្រំ

ក្រុមទាំង៩ត្រូវបានបែងចែកជា២ពូលដោយពូល«ក»មាន៥ក្រុម និងពូល«ខ»មាន៤ក្រុម។ បន្ទាប់ពីការប្រកួតសន្សំពិន្ទុក្នុងពូលរួចរាល់ ក្រុមចំណាត់ថ្នាក់លេខ១ និងលេខ២នៃពូលនីមួយៗនឹងឡើងទៅវគ្គពាក់កណ្តាលផ្តាច់ព្រ័ត្រ (វគ្គ៤ក្រុមចុងក្រោយ)។

ការប្រកួតធ្វើឡើងនៅរសៀលថ្ងៃព្រហស្បតិ៍ដែលមាន២គូគឺនៅម៉ោង១:៣០នាទីរសៀល និងម៉ោង៣រសៀលដែលនឹងចាប់ផ្តើមនៅថ្ងៃទី៨ ខែមីនា ដល់ខែឧសភា ឆ្នាំ២០២៤។

រង្វាន់ជយលាភី

លេខ១៖ មេដាយមាស និងប្រាក់៦លានរៀល
លេខ២៖ មេដាយប្រាក់ និងប្រាក់៤លានរៀល
លេខ៣៖ មេដាយសំរិទ្ធ និងប្រាក់២លានរៀល

នេះគឺជាព្រឹត្តិការណ៍បាល់ទាត់ដ៏កម្រមួយដែលស្ថាប័នឯកជនបានរៀបចំឡើងសម្រាប់នារី។ កន្លងមកមានតែក្រសួងអប់រំ យុវជន និងកីឡាបានរៀបចំការប្រកួតកីឡាមហាជនកម្រិតសិស្សានុសិស្សប្រចាំឆ្នាំ ក៏ដូចជាសហព័ន្ធកីឡាបាល់ទាត់កម្ពុជាបានរៀបចំជើងឯកបាល់ទាត់នារី។ ទោះបីជាយ៉ាងណា ការប្រកួតជើងឯកនារី ឬ លីគបាល់ទាត់នារីក៏មិនមានទៀតបច្ចុប្បន្ននេះដែលធ្វើឲ្យឱកាសបង្ហាញសមត្ថភាពរបស់កីឡាការិនីមិនសូវមាន។

ពេលថ្នាក់ដឹកនាំខេត្តស្វាយរៀងបានរៀបចំឲ្យមានការប្រកួតបាល់ទាត់នារីនេះឡើងពិតជាសំខាន់ណាស់ ជាពិសេសសម្រាប់កីឡាការិនីនៅខេត្តស្វាយរៀងបានបង្ហាញសមត្ថភាព និងអភិវឌ្ឍខ្លួនឲ្យកាន់តែល្អប្រសើរ៕