កីឡា

វ៉ៃនៅ ONE មិនដែលចាញ់ ជើងខ្លាំង Petlampun ប៉ះ ពេជ្រ សម្បត្តិ សប្តាហ៍នេះ

បានផុស

១ year មុន

នៅ

ថ្ងៃអង្គារ ២៦ មីនា ២០២៤

ដោយ

កីឡាករកំពុងល្អនៅប្រទេសថៃ Petlampun Muadablampang នឹងធ្វើដំណើរមកទឹកដីកម្ពុជាដោយត្រូវប៉ះជើងខ្លាំង ពេជ្រ សម្បត្តិ នៅថ្ងៃទី២៨ ខែមីនា ឆ្នាំ២០២៤ នៅសង្វៀនបាយ័ន ក្នុងខេត្តស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករថៃរូបនេះមិនទាន់អាចចាត់ទុកលំដាប់ A នៅប្រទេសថៃទេ ប៉ុន្តែរូបគេជាជើងខ្លាំងម្នាក់ដែលកំពុងល្អទាំងស្មារតីអង់អាច បច្ចេកទេសល្អ អាវុធធ្ងន់ និងកម្លាំងស៊ុហ្វពេញល្អ។ រូបគេជាប្រភេទកីឡាករវ៉ៃជំហរឆ្វេងពោលគឺការទាត់ជើងឆ្វេង និងកណ្តាប់ដៃឆ្វេងជាអាវុធពិឃាតរបស់គេ។

ក្រៅពីជំហរឆ្វេងជាអាវុធដ៏គ្រោះថ្នាក់បំផុត Petlampun ក៏អាចចេញកែង និងជង្គង់ទាំងឆ្វេង-ស្តាំបានយ៉ាងល្អដែរ។ អ្វីដែលមិនអាចមើលរំលងបានគឺការវ៉ៃខាវកណ្តាប់ដៃរបស់គេពិតជាគ្រោះថ្នាក់។ ភាគច្រើនរូបគេផ្តួលដៃគូដោយប្រើកណ្តាប់ដៃខាវ បន្ទាប់មកសន្ធាប់កណ្តាប់ដៃស្តាំ ដូច្នេះចំណុចនេះជាកត្តាដែលដៃគូត្រូវការប្រុងប្រយ័ត្នបំផុត។

ស្ថិតក្នុងវ័យ២៨ឆ្នាំ Petlampun មានប្រវត្តិឡើងសង្វៀនប្រមាណ១០៥ដង ក្នុងនោះទទួលបាន៨៥ដង និងបរាជ័យ២០ដង។ តាមស្ថិតិរបស់អ្នកជំនាញនៅសង្វៀន ONE បានបង្ហាញថា រូបគេមានអត្រាទទួលបានជ័យជម្នះ៨១%ក្នុងប្រវត្តិឡើងសង្វៀន។

ចាប់ពីពេលមានឈ្មោះវ៉ៃនៅសង្វៀន ONE Lumpinee តាំងពីខែមីនា ឆ្នាំ២០២៣មក រូបគេមានកំណត់ត្រាឈ្នះរហូតពោលគឺមិនទាន់បរាជ័យម្តងណាឡើយ។ ការប្រកួតចុងក្រោយបំផុតនៅសង្វៀន ONE កាលពីថ្ងៃទី៨ ខែមីនា ឆ្នាំ២០២៤ រូបគេបានផ្តួលកីឡាករជប៉ុន Hiroto Sameshima សន្លប់ក្នុងទឹកទី២។ ៣ប្រកួតផ្សេងទៀតនៅសង្វៀននេះ រូបគេបានយកឈ្នះមិត្តរួមជាតិ Petakake ដោយពិន្ទុ នៅខែមិថុនា ឆ្នាំ២០២៣, ឈ្នះមិត្តរួមជាតិ Sunvo Tded99 ដោយពិន្ទុ នៅខែមេសា ឆ្នាំ២០២៣ និងផ្តួលមិត្តរួមជាតិ Rambong ឲ្យសន្លប់ក្នុងទឹកទី៣ នៅខែមីនា ឆ្នាំ២០២៣។

នៅពេលនេះ Petlampun ត្រូវធ្វើដំណើរមកទឹកដីកម្ពុជាជាលើកដំបូងដោយត្រូវប្រឈមនឹងជើងខ្លាំងកម្រចាញ់ ពេជ្រ សម្បត្តិ នៅថ្ងៃទី២៨ ខែមីនា ឆ្នាំ២០២៤ នៅទីរួមខេត្តស្វាយរៀង។ ជំនួបនេះអាចចាត់ទុកជាការជួបដៃគូខ្លាំងបំផុតម្នាក់របស់ Petlampun ពីព្រោះថ្វីបើរូបគេបានឡើងសង្វៀនជាង១០០ដងមែន ប៉ុន្តែនិយាយពីដៃគូរបស់គេកន្លងមកអាចនិយាយបានថា នៅមិនទាន់ដូច ពេជ្រ សម្បត្តិ ដែលធ្លាប់ដៃគូខ្លាំងៗច្រើនរូបមកហើយ។

ក្របីព្រៃ ពេជ្រ សម្បត្តិ ប្រភេទកីឡាករដើរចូលវ៉ៃបុក ចេញកណ្តាប់ដៃផ្ទួនៗដែលត្រូវគ្នានឹង Petlampun ដែលចូលចិត្តចូលវ៉ៃដូចគ្នា។ ជឿជាក់ថា គូនេះមិនចាំបាច់អាជ្ញាកណ្តាលបង្ខំឲ្យវ៉ៃទេ ប៉ុន្តែអ្នកទាំងពីរនឹងវ៉ៃបុកសម្រុកធ្វើឲ្យកក្រើកសង្វៀនទីរួមខេត្តស្វាយរៀង។

ក្រៅពីគូសំខាន់ខាងលើ ក៏នៅមាន ឃីម បូរ៉ា និង ព្រុំ សំណាង ដែលសុទ្ធតែជួបដៃគូខ្លាំងៗ។ ជាពិសេសជើងខ្លាំងកម្ពុជា៤រូបដែលជាបេក្ខភាពដណ្តើមរថយន្តថ្មីសន្លាង១គ្រឿងគឺ ចាន់ ប៊ុនហឿន, មឿន សុខហ៊ុច, ធន់ ចាន់តាក់ និង សូត្រ វាសនា។ ទាយទាំងអស់គ្នាមើល៍ នរណាម្ចាស់រថយន្តថ្មីទំនើបនេះ?