កីឡា

Rice សង្ឃឹម White ផ្លាស់ប្តូរការសម្រេចចិត្តដើម្បីវិលចូលក្រុមអង់គ្លេសវិញ

បានផុស

៦ ខែ មុន

នៅ

ថ្ងៃអង្គារ ២៦ មីនា ២០២៤

ដោយ

ខ្សែបម្រើ Declan Rice នឹងព្យាយាមបញ្ចុះបញ្ចូលមិត្តរួមក្រុម Arsenal កីឡាករ Ben White ឲ្យគិតឡើងវិញហើយបើកចិត្តចូលរួមជាមួយក្រុមជម្រើសអង់គ្លេសជាថ្មី ក្នុងព្រឹត្តិការណ៍ Euro ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខ្សែការពារវ័យ២៦ឆ្នាំ Ben White ពិតជាធ្វើបានយ៉ាងល្អជាមួយក្រុមកាំភ្លើងធំ Arsenal ក្នុងក្របខណ្ឌ Premier League ក្នុងរដូវកាលនេះ ប៉ុន្តែរូបគេមិនបានបង្ហាញខ្លួន ក្នុងក្រុមជម្រើសជាតិអង់គ្លេសចាប់តាំងពី World Cup ឆ្នាំ២០២២។ Ben White បានចាកចេញពីក្រុមជម្រើសជាតិអំឡុងពេលប្រកួត World Cup ក្នុងប្រទេសកាតារ ដោយសារហេតុផលផ្ទាល់ខ្លួន ហើយក្រោយមកត្រូវបានគេរបាយការណ៍ថា មានការប៉ះទង្គិចគ្នាជាមួយជំនួយការគ្រូបង្វឹកអង់គ្លេសលោក Steve Holland។

កីឡាករ Ben White ក៏ត្រូវបានលោក Gareth Southgate គ្រូបង្វឹកក្រុមជម្រើសជាតិអង់គ្លេស កោះហៅចូលក្នុងការប្រកួតមិត្តភាពដែរ ប៉ុន្តែខ្សែការពាររូបនេះបានបដិសេដចូលរួមជាមួយក្រុមជម្រើសជាតិទេ។

កីឡាករ Rice ត្រូវបានតែងតាំងជាប្រធានក្រុមអង់គ្លេស ក្នុងការប្រកួតមិត្តភាពចុងក្រោយនៅថ្ងៃអង្គារនេះ។ ចំពោះលោក Gareth Southgate នឹងសម្រេចចិត្តក្នុងការជ្រើសរើសកីឡាករ២៣នាក់ចុងក្រោយ ដើម្បីតៀមចូលរួមការប្រកួតព្រឹត្តិការណ៍ Euro ឆ្នាំ២០២៤។ ប្រការនេះធ្វើឲ្យ Rice ត្រៀមបញ្ចុះបញ្ចូល White ឲ្យផ្លាស់ប្តូរគំនិត។

Declan Rice បាននិយាយថា៖«ពេលខ្ញុំត្រឡប់ទៅ Arsenal វិញ ខ្ញុំនឹងនិយាយជាមួយ Ben White។ ហើយសង្ឃឹមថា គាត់នឹងផ្លាស់ប្តូរចិត្តលើរឿងនេះ ពីព្រោះគាត់កំពុងធ្វើបានល្អនៅ Premier League។ ពិតណាស់វានឹងជាការផលចំណេញបន្ថែមដ៏ល្អសម្រាប់ក្រុមជម្រើសជាតិអង់គ្លេស»។

«រឿងតែមួយគត់ដែលខ្ញុំអាចនិយាយបានគឺវាជាជីវិតរបស់ Ben White។ វាជាការសម្រេចចិត្តរបស់គេ។ យើងមិនអាចប្រកែកជាមួយគាត់ពីអ្វីដែលគាត់ចង់ធ្វើ»៕

ប្រែសម្រួល៖ ផា រតនា
ប្រភព៖ Beinsports